ନିୟମଗିରିର ଝିକା ବିବାହ, ଦେଖନ୍ତୁ ଭିଡିଓ

ରାୟଗଡ଼ା( ଓଡ଼ିଶା ରିପୋର୍ଟର): “ଆଖି ଆଖିରେ ପ୍ରେମ ହେଲା ପ୍ରଥମ ଦେଖାରେ। ଆଉ ତା ପରେ କୋଉ ଗୋଟେ ପର୍ବ ଦେଖି ମନ ହେଲା ସେଇ ଝିଅକୁ ଦେଖି ଆସିବାକୁ । ବାସ୍‌ ତା ପରେ ଆଉ ଗୋଟେ କାହାଣୀ । ସେଇ ଝିଅକୁ ଏକୁଟିଆ ଦେଖି ଝିଙ୍କି ଆଣିବାକୁ ପଡେ। ଏଥିରେ ପ୍ରତିବାଦ କରେନା ଝିଅଟି । ଆଉ ତା ପରେ ଦୁହେଁ ଦୁହିଁଙ୍କୁ ବନାନ୍ତି ଜୀବନସାଥୀ। ନିୟମଗିରିର ଏହା ହିଁ ରହିଛି ନିୟମ।”

ଆଜିର ଯୁଗରେ ବି ଆଦିବାସୀଙ୍କ ଏହି ନିଆରା ପରମ୍ପରା ବଳବତ୍ତର ରହିଛି।  ନିୟମଗିରି ଅଞ୍ଚଳରେ ଡଙ୍ଗରିଆଙ୍କ ମଧ୍ୟରେ ବର୍ତ୍ତମାନ ମଧ୍ୟ ଝିକା ବିବାହ ଚାଲିଛି। ପରମ୍ପରା ମୁତାବକ ନିଜ ପସନ୍ଦର ଯୁବତୀଙ୍କୁ ଉଠାଇ ଆଣିଲେ ଯୁବକ  ବିଲକୁଲ୍ ପ୍ରତିବାଦ କରନ୍ତି ନାହିଁ ଯୁବତୀ। ତା’ ପରଦିନ ଉଭୟ ପକ୍ଷ ମୁଖିଆଙ୍କୁ ନେଇ ଯୁବକଙ୍କ ଗାଁରେ ବୈଠକ ବସେ। ଝିଅ ବାପା ମାଆଙ୍କ ଦାବି ମୁତାବକ ଯୁବକଙ୍କ ପରିବାର ଲୋକେ କିଛି ଅର୍ଥ, ଛେଳି, ମେଣ୍ଡା ଆଦି ଦେଇଥାନ୍ତି।  ଗାଁ ଲୋକଙ୍କୁ ମଧ୍ୟ କିଛି ଦେବାକୁ ପଡ଼େ।  ତା’ ପରେ ହୁଏ ବାହାଘର। ବର୍ତ୍ତମାନ ସମୟରେ ଏହାକୁ କିଛି ଲୋକ ନାପସନ୍ଦ କରୁଥିଲେ ବି ଜାରି ରହିଛି ପରମ୍ପରା।

କଲ୍ୟାଣସିଂହପୁର ଥାନା ଆଇଆଇସି କପିଳେନ୍ଦ୍ର ବେହେରା କହିଛନ୍ତି, “ଯଦି ପୁଅଟି ଗୋଟିଏ ଝିଅକୁ ଜୀବନସାଥୀ କରିବା ପାଇଁ ଚାହେଁ, ଝିଅକୁ ଜାନିଯାତ୍ରା ହେଉ ବା ହାଟ ସେଠାରୁ ତାକୁ ଜବରଦସ୍ତ ଉଠାଇ ଆଣିଥାଏ। ପରେ ଉଭୟଙ୍କ ପରିବାର ମିଶି ଦୁହିଁଙ୍କ ବିବାହ କରିଥାନ୍ତି। ଏନେଇ ଥାନାରେ କୌଣସି ରିପୋର୍ଟ ଦିଆଯାଏ ନାହିଁ।