ପୁରୀ(ମଧୁସୂଦନ ମିଶ୍ର):ପୁରୀ-ଭୁବନେଶ୍ୱର ମାଳତୀପାଟପୁର ଓଭର ବ୍ରିଜରେ ଆଜି ଭୋର ୪ଟା ସମୟରେ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ଏଥିରେ ଦୁଇ ଜଣଙ୍କର ମୃତ୍ୟୁ ଘଟିଥିବା ବେଳେ ଆଉ ଜଣେ ଆହତ ହୋଇଛନ୍ତି। ମୃତକ ହେଲେ ବିଶ୍ୱଜିତ୍ ବାରିକ ଓ ରୁଦ୍ର ପ୍ରତାପ ବାରିକ।
ସେମାନଙ୍କ ଘର ଭଦ୍ରକ ଜିଲ୍ଲା ଭଣ୍ଡାରିପୋଖରୀରେ ବୋଲି ଜଣାପଡ଼ିଛି। ଆହତ ରାକେଶ ପୁହାଣଙ୍କୁ ପୁରୀ ଡାକ୍ତରଖାନାରେ ଭର୍ତ୍ତି କରାଯାଇଛି।
ଆଜି ଭୋର ୪ଟା ସମୟରେ ୬ଜଣ ସାଙ୍ଗ ଦୁଇଟି ବାଇକ୍ରେ ପୁରୀ ବୁଲିବାକୁ ଆସିଥିଲେ। ତେବେ ବିଶ୍ୱଜିତ୍, ରୁଦ୍ର ଓ ରାକେଶ ଥିବା ବାଇକ୍ଟି ଦୁର୍ଘଟଣା ଗସ୍ତ ହୋଇଥିଲା। ପୁରୀ-ଭୁବନେଶ୍ୱର ମାଳତୀପାଟପୁର ଓଭର ବ୍ରିଜରେ ହମ୍ପସ୍ ଥିବା ଜାଣି ନ ପାରି ବ୍ରିଜରେ ବାଡ଼େଇ ହୋଇ ତଳକୁ ଛିଟ୍କି ପଡ଼ିଯାଇଥିଲା। ଘଟଣାସ୍ଥଳରେ ବିଶ୍ୱଜିତ୍ ଓ ରୁଦ୍ରଙ୍କର ମୃତ୍ୟୁ ଘଟିଥିଲା। ଆହତ ରାକେଶଙ୍କୁ ପୁରୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଅନ୍ୟ ତିନିଜଣଙ୍କ ଅବସ୍ଥା ଭଲ ଥିବା ଜଣାପଡ଼ିଛି। ପୁଲିସ୍ ଘଟଣାର ତଦନ୍ତ କରୁଛି।