ଦୁଇ ବାଇକ୍ ମଧ୍ୟରେ ମୁହାଁମୁହିଁ ଧକ୍କା: ଦୁଇ ମୃତ, ଦୁଇ ଗୁରୁତର

ଉମରକୋଟ (କାର୍ତ୍ତିକ ମଲ୍ଲିକ): ନବରଙ୍ଗପୁର ଜିଲ୍ଲା ଡାବୁଗାଁ ବ୍ଲକ୍ ଅନ୍ତର୍ଗତ ବିରିଶୋଲା ଗାଁ ନିକଟରେ ଦୁଇଟି ବାଇକ୍‌ ମଧ୍ୟରେ ମୁହାଁମୁହିଁ ଧକ୍କା ହେବାରୁ ଦୁଇ ଜଣଙ୍କ ମୃତ୍ୟୁ ଘଟିଥିବା ବେଳେ ଆଉ ଦୁଇ ଜଣ ଗୁରୁତର ଆହତ ହୋଇଛନ୍ତି।

ମୃତକ ଦ୍ୱୟ ହେଲେ ବଂଶୀଧର ଭତରା (୩୫) ଓ ପ୍ରଣୟ ଭୂୟାଁ (୩୩)। ଗୁରୁତର ଆହତ ମାଧବ ଭତରା ଓ ବଳି ଭତରାଙ୍କୁ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।

ବଂଶୀଧର, ମାଧବ ଓ ବଳି ଭତରା ଗୋଟିଏ ବାଇକ୍‌ରେ ପାପଡ଼ାହାଣ୍ଡିରୁ ଉମରାହାଣ୍ଡି ଯାଉଥିବା ବେଳେ ପ୍ରଣୟ ବାଇକ୍ ଯୋଗେ ରାଇଘରରୁ ନବରଙ୍ଗପୁର ଯାଉଥିଲେ। ଡାବୁଗାଁ ନିକଟରେ ସେମାନଙ୍କ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା।

ଡାବୁଗାଁ ପୁଲିସ୍ ଓ ଅଗ୍ନିଶମ କର୍ମଚାରୀ ପହଞ୍ଚି ମୃତାହତଙ୍କୁ ଉଦ୍ଧାର କରି ଡାକ୍ତରଖାନା ନେଇଥିଲା।