ନୂଆପଡ଼ା(ମାୟାଧର ସରାଫ୍): ନୂଆପଡ଼ା ଜିଲ୍ଲା ଲଖନା ଥାନା ଅର୍ନ୍ତଗତ ବଙ୍ଗାମୁଣ୍ଡା ଗାଁରେ ଏକ ଦୁଃଖଦ ଘଟଣା ଘଟିଛି। ଗାଁର ଆଲୋକ କୁମାର ସାହୁ ଗତ ନଭେମ୍ୱର ୧୦ ତାରିଖରେ ବାହା ହୋଇ ଥାଆନ୍ତେ। ଏଥିପାଇଁ ସେ ୭ ତାରିଖ ଦିନ ସେ ତାଙ୍କ ବନ୍ଧୁବାନ୍ଧବଙ୍କୁ ବାହାଘର କାର୍ଡ ଦେବାକୁ ଯାଇଥିଲେ। ସେ କାର୍ଡ ବାଣ୍ଟି ସନ୍ଧ୍ୟାରେ ଗାଁକୁ ଫେରିବା ବେଳେ ତାଙ୍କ ଉପରକୁ କେହି ଏସିଡ୍ ଫୋପାଡ଼ି ଦେଇଥିଲେ। ଏହାପରେ ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ନୂଆପଡ଼ା ଡାକ୍ତରଖାନାରେ ଭର୍ତ୍ତି କରାଯାଇଥିଲା। ହେଲେ ତାଙ୍କ ଅବସ୍ଥା ସଙ୍କଟାପନ୍ନ ହେବାରୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ହେଲେ ୩ ମାସ ମୃତ୍ୟୁ ସହ ସଂଗ୍ରାମ କରିବା ପରେ ଗତ ଗୁରୁବାର ଦିନ ତାଙ୍କର ମୃତ୍ୟୁ ଘଟିଛି।
ତେବେ ଏକ ପ୍ରେମ ବ୍ୟାପାରକୁ ନେଇ ଏହି ଏସିଡ ମାଡ ହୋଇଥିବା ଅଭିଯୋଗ ହୋଇଛି। ଆଲୋକ ଜଣେ ଯୁବତୀଙ୍କୁ ପ୍ରେମ କରୁଥିଲେ। ହେଲେ ଆଲୋକଙ୍କ ବିବାହ ଅନ୍ୟ ସ୍ଥାନରେ ଠିକ୍ ହୋଇଥିଲା। ବାହାଘରକୁ ୩ ଦିନ ବାକି ଥିବାରୁ ସେ ବାହାଘର କାର୍ଡ ବାଣ୍ଟି ଘରକୁ ଫେରୁଥିଲେ। ଏହି ସମୟରେ ତାଙ୍କ ଗାଁ ପୋଖରୀ ନିକଟରେ ତାଙ୍କୁ କେହି ଏସିଡ ମାଡ ହୋଇଥିଲା। ଯୁବକଙ୍କ ଅନ୍ୟତ୍ର ବିବାହ ଠିକ୍ ହୋଇଥିବାରୁ ପ୍ରେମିକାଙ୍କ ସହ ମିଶି ଅନ୍ୟ ୨ ଜଣ ତାଙ୍କୁ ଏସିଡ୍ ଫୋପାଡ଼ିଥିଲେ। ତେବେ ପୂରା ଷଡ଼ଯନ୍ତ୍ରରେ ସମ୍ପୃକ୍ତ ଥିବା ପ୍ରେମିକାଙ୍କ ସମେତ ୬ ଜଣଙ୍କୁ ପୁଲିସ ଗିରଫ କରି କୋର୍ଟ ଚଲାଣ କରିଛି। ଏହି ଘଟଣାରେ ଆଉ କେତେ ଜଣ ସମ୍ପୃକ୍ତ ଥିବା ମଧ୍ୟ ପରିବାର ଲୋକେ ଅଭିଯୋଗ କରିଛନ୍ତି। ସେମାନଙ୍କୁ ଏଯାଏ ଗିରଫ କରା ଯାଇ ନଥିବା ପରିବାର ଲୋକେ ଅଭିଯୋଗ କରିଛନ୍ତି। ଅନ୍ୟ ଅଭିଯୁକ୍ତଙ୍କୁ ଶୀଘ୍ର ଗିରଫ କରିବାକୁ ତାଙ୍କ ପରିବାର ଲୋକେ ଦାବି କରିଛନ୍ତି। ଏନେଇ ପୁଲିସର ପ୍ରତିକ୍ରିୟା ମିଳିପାରି ନାହିଁ।