ଏମିତି ଚାଲିଛି ପ୍ରଶାସନ: ୬ ବର୍ଷ ହେଲାଣି ସରୁନି ପୋଲ, ନିଜେ ଡଙ୍ଗା ଚଲାଇ ସ୍କୁଲ୍ ଯାଉଛନ୍ତି ଛୁଆ  

<p>ଯାଜପୁର (ଓଡ଼ିଶା ରିପୋର୍ଟର): ପୋଲ ହେବ। ଆଉ ଯିବାଆସିବାରେ ଅସୁବିଧା ହେବ ନାହିଁ। ବର୍ଷା ଦିନରେ ପୂରିଲା ନଦୀରେ ବିପଦସଙ୍କୁଳ ଅବସ୍ଥାରେ ଦେଶୀ ଡଙ୍ଗାରେ ଯିବାକୁ ପଡ଼ିବ ନାହିଁ। ୨୦୧୧ ମସିହାରେ ଯେତେବେଳେ ଗେଙ୍ଗୁଟି ନଦୀ ଉପରେ ବାଇଶିମୌଜା ସେତୁର କାମ ଆରମ୍ଭ ହେଲା ଯାଜପୁର ଜିଲ୍ଲା ବଡ଼ଚଣା ବ୍ଳକବାସୀଙ୍କ ମନରେ ଆସିଥିଲା ଏମିତି ଭାବନା। ସେମାନଙ୍କ ଖୁସିର ସୀମା ରହିଲା ନାହିଁ। ତେବେ ଏବେ ଆଉ ସେହି ଖୁସି ନାହିଁ। କାରଣ ୬ ବର୍ଷ ତଳେ ଅବସ୍ଥା ଯେମିତି ଥିଲା ଏବେ ବି ସେମିତି ରହିଛି। ଲୋକେ ସେମିତି ଡଙ୍ଗାରେ ଯିବାଆସିବା କରୁଛନ୍ତି।</p><p>୨୦୧୧ ମସିହାରେ ବାଇଶିମୌଜା ସେତୁର ନିର୍ମାଣ କାମ ଆରମ୍ଭ କରାଯାଇଥିଲା। ଏଥିପାଇଁ ୧୪ କୋଟି ଟଙ୍କା ବ୍ୟୟ ଅଟକଳ ରଖାଯାଇଥିଲା। ଦୁଇ ବର୍ଷ ମଧ୍ୟରେ କାମ ଶେଷ ହେବ ବୋଲି ପୂର୍ତ୍ତ ବିଭାଗ ସହ ଚୁକ୍ତି କରିଥିଲା ଏକ ଠିକା ସଂସ୍ଥା। କିନ୍ତୁ କାର୍ଯ୍ୟ ଆରମ୍ଭ କରିବାର କିଛି ମାସ ପରେ ସଂପୃକ୍ତ ଠିକା ସଂସ୍ଥା କାମ ଛାଡ଼ି ପଳାଇ ଥିଲା। ସେହି ଦିନଠାରୁ ସେତୁ କାର୍ଯ୍ୟ ଅଧପନ୍ତରିଆ ହୋଇ ପଡ଼ି ରହିଛି। ମାତ୍ର କେତୋଟି ପିଲର ନିର୍ମାଣ କରାଯାଇଛି। ସେଗୁଡ଼ିକ ବି ଶେଷ ହୋଇନାହିଁ। ଏବେ ଯେଉଁ ଠିକା ସଂସ୍ଥା କାମ ନେଇଛି ସେ ବି ବଡ଼ ମନ୍ଥର ଗତିରେ କାମ କରୁଛି। ଏନେଇ ବାରମ୍ବାର ବିଭାଗୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରାଯାଇଥିଲେ ମଧ୍ୟ କିଛି ଲାଭ ମିଳୁନି।</p><p>ସେତୁଟି ନିର୍ମାଣ ହୋଇପାରୁ ନଥିବା ଯୋଗୁଁ ବଡ଼ଚଣା ବ୍ଳକ୍&zwnj;ର ଚାରୋଟି ପଞ୍ଚାୟତ ସହିତ ମାହାଙ୍ଗା ବ୍ଳକ୍&zwnj;ର ତିନୋଟି ପଞ୍ଚାୟତର ଲୋକେ ଯିବା ଆସିବାରେ ବହୁତ ହଇରାଣ ହେଉଛନ୍ତି। ସ୍କୁଲ୍ ଓ କଲେଜ ଛାତ୍ରଛାତ୍ରୀମାନେ ଅଧିକ ହଇରାଣ ହେଉଛନ୍ତି। ଦୁଇ ଶହରୁ ତିନି ଶହ ଛାତ୍ରଛାତ୍ରୀ ସବୁ ଦିନେ ଏକ ଦେଶୀ ଡଙ୍ଗାରେ ଯିବା ଆସିବା କରୁଛନ୍ତି। ବେଳେ ବେଳେ ସେମାନେ ସ୍କୁଲ୍&zwnj; ଓ କଲେଜ୍&zwnj;ରେ ଠିକ୍ ସମୟରେ ପହଞ୍ଚି ପାରୁ ନାହାନ୍ତି। ବର୍ଷା ଦିନ କଥା ନ କହିବା ଭଲ। ଭରାନଈରେ ଜୀବନକୁ ବାଜି ଲଗାଇ ସେମାନେ ଡଙ୍ଗାରେ ଯିବାଆସିବା କରନ୍ତି।</p><p>ରୁଦ୍ର ପ୍ରତାପ ସ୍ୱାଇଁ ନାମକ ଜଣେ ସ୍କୁଲ୍ ଛାତ୍ର କହିଛନ୍ତି,&ldquo;ବେଳେ ବେଳେ ନାଉରିଆ ନଥାଆନ୍ତି। ତେଣୁ ଆମେ ନିଜେ ଆହୁଲା ମାରି ଡଙ୍ଗାକୁ ନେଇଥାଉ। ବେଳେ ବେଳେ ଠିକ୍ ସମୟରେ ସ୍କୁଲ୍&zwnj;ରେ ପହଞ୍ଚି ପାରୁନି।&rdquo;</p><p>ଅର୍ପିତା ନାୟକ ନାମକ ଜଣେ ଛାତ୍ରୀ କହିଛନ୍ତି,&ldquo;ବର୍ଷା ହେଲେ ଆମେ ବେଳେ ବେଳେ ସ୍କୁଲ୍ ଯାଉନୁ। କାରଣ ବର୍ଷାରେ ଡଙ୍ଗାରେ ଯିବା ବଡ଼ ମୁକ୍ସିଲ। ଅନେକ ସମୟରେ ଡଙ୍ଗା ଆର ମୁଣ୍ଡରୁ ଆସେନି, ତେଣୁ ଆମେ ଯାଇପାରୁନି। ପୋଲଟିକୁ ଶୀଘ୍ର ଶେଷ କରିବାକୁ ଆମେ ସରକାରଙ୍କ ନିକଟରେ ଦାବି କରୁଛୁ।&rdquo;</p><p>ସ୍ଥାନୀୟ ବାସିନ୍ଦା ବିଷ୍ଣୁଚରଣ ସ୍ୱାଇଁ କହିଛନ୍ତି,&ldquo;ସ୍କୁଲ୍ ଛୁଆଙ୍କ ସହିତ ସ୍ଥାନୀୟ ଅଞ୍ଚଳର ଲୋକେ ଯିବାଆସିବାରେ ଭାରି ହଇରାଣ ହେଉଛନ୍ତି। ବ୍ୟବସାୟ କରୁଥିବା ଲୋକେ ଜିନିଷପତ୍ର ଆଣିବାକୁ ହଇରାଣ ହେଉଛନ୍ତି। ବେଳେବେଳେ ନାଉରିଆ ଡଙ୍ଗାରେ ରହୁନି। ସେତେବେଳେ ଅଧିକ ଅସୁବିଧା। କଣ୍ଟ୍ରାକ୍ଟରମାନେ ଆସୁଛନ୍ତି ଟିକେ କ&rsquo;ଣ କାମ କରି ଛାଡ଼ି ଚାଲି ଯାଉଛନ୍ତି। ଏବେ ଯେଉଁ ଠିକାଦାର କାମ ନେଇଛନ୍ତି ସେ କହୁଛନ୍ତି ଆସନ୍ତା ମାର୍ଚ୍ଚ ସୁଦ୍ଧା କାମ ସରିଯିବ। ଦେଖାଯାଉ କ&rsquo;ଣ ହେଉଛି?&rdquo;</p><p>ଯାଜପୁର ଜିଲ୍ଲାପାଳ ରଞ୍ଜନ କୁମାର ଦାସ କହିଛନ୍ତି,&ldquo;ସଂପୃକ୍ତ ଠିକା ସଂସ୍ଥାକୁ ତାଗିଦ କରାଯାଇଛି। ମାର୍ଚ୍ଚ ସୁଦ୍ଧା କାମ ଶେଷ କରିବାକୁ କୁହାଯାଇଛି।&rdquo;</p><p>ତେବେ ଆସନ୍ତା ବର୍ଷାଋତୁ ବେଳକୁ ସେତୁ ନିର୍ମାଣ କାର୍ଯ୍ୟ ଶେଷ ହେଉଛି କି ନାହିଁ ତାହାକୁ ଅପେକ୍ଷା କରି ରହିଛନ୍ତି ବଡ଼ଚଣା ଅଞ୍ଚଳର ଲୋକେ।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।