ଭୁବନେଶ୍ୱର(ଓଡ଼ିଶା ରିପୋର୍ଟର): “ମୁଣ୍ଡ ଉପରେ ଦାୟିତ୍ୱ ଅଛି ତ ତାହାକୁ ତୁଲାଇବାକୁ ପଡ଼ିବ । ନିଜ ପିଲା ମୁହଁରେ ହସ ଫୁଟାଇବାକୁ ତାକୁ ମଣିଷ କରିବାକୁ କିଛି ନା କିଛି ତ କରିବାକୁ ପଡ଼ିବ । ” ନିଜ ଝିଅକୁ ମଣିଷ କରିବାକୁ ରାଜଧାନୀ ରାଜରାସ୍ତାରେ ପଇଡ଼ ବିକୁଥିବା ଜଣେ ମହିଳା ଏପରି କହିଛନ୍ତି ।
ଯେତେ ଝଡ଼ଝଞ୍ଜା ଆସିଲେ ବି ରାତି ପାହିଲେ ରାଜଧାନୀ ରାସ୍ତା କଡ଼ରେ ନିଜ ପଇଡ ପସରା ମେଲାଇ ବସିଯାନ୍ତି ମମିତା ମହାନ୍ତି ନାମ୍ନୀ ମହିଳା। ହାତରେ କାତି ଧରି ପଇଡ଼ରୁ ପାଣି ବାହର କରି ଗ୍ରାହକଙ୍କୁ ସନ୍ତୁଷ୍ଟ କରନ୍ତି ମମିତା । ଯେଉଁ କାମ ସାଧାରଣତଃ ପୁରୁଷମାନେ କରନ୍ତି, ସେଥିରେ ସିଦ୍ଧହସ୍ତ ମହିଳାମାନେ । ଭୁବନେଶ୍ୱର ପ୍ରଦର୍ଶନୀ ପଡିଆ ନିକଟସ୍ଥ ରାସ୍ତା କଡରେ ବସି ପଇଡ଼ ବିକ୍ରି କରୁଛନ୍ତି ମମିତା ।
ମମିତାଙ୍କ କହିବାନୁଯାୟୀ, ତାଙ୍କ ଘର ନୟାଗଡ଼ରେ । ସେ ୨୦୦୬ ମସିହାରେ ବିବାହ କରିଥିଲେ । ହେଲେ ପରବର୍ତ୍ତୀ ସମୟରେ କୌଣସି କାରଣରୁ ସ୍ୱାମୀଙ୍କଠାରୁ ଦୂରେଇ ରହିଲେ । ଇତି ମଧ୍ୟରେ ସେ ଏକ କନ୍ୟା ସନ୍ତାନକୁ ଜନ୍ମ ଦେଇ ସାରିଥିଲେ।
[caption id="attachment_691172" align="aligncenter" width="650"]
ସ୍ୱାମୀଙ୍କଠାରୁ ଅଲଗା ହେବା ପରେ ନିଜେ କିପରି ଚଳିବେ, ଛୁଆ ମୁହଁରେ କିପରି ୨ ଓଳି ଦାନା ଦେବେ ସେହି ଚିନ୍ତା ତାଙ୍କୁ ଘାରିଲା। ହେଲେ ହାର ମାନି ନ ଯାଇ ବଞ୍ଚିବା ପାଇଁ ସଂଘର୍ଷ ଆରମ୍ଭ କରିଦେଲେ ମମିତା। ୨ ପଇସା ରୋଜଗାର କରିବାକୁ ଘରୁ ଗୋଡ଼ କାଢ଼ିବାକୁ ସ୍ଥିର କଲେ । ନିଜର ତଥା ଝିଅର ଗୁଜରାଣ ମେଣ୍ଟାଇବାକୁ ପୂର୍ବରୁ ବସ୍ କଣ୍ଡକ୍ଟର କାମ କରୁଥିବା ମମିତା ଏହି କାମ ଛାଡି ଏବେ ପଇଡ ବିକି ଦୁଇ ପଇସା ରୋଜଗାର କରୁଛନ୍ତି ।
ମମିତାଙ୍କ ଝିଅ ଏବେ ରାଜଧାନୀର ଏକ ପବ୍ଲିକ ସ୍କୁଲରେ ନବମ ଶ୍ରେଣୀରେ ପାଠ ପଢୁଛି । ଝିଅ ୯୦ ପ୍ରତିଶତରୁ ଅଧିକ ମାର୍କ ବି ରଖୁଛି । ତେଣୁ ଝିଅକୁ ଊଜ୍ଜ୍ୱଳ ଭବିଷ୍ୟତ ଦେବା ପାଇଁ ସେ ଏଭଳି ବ୍ୟବସାୟରୁ ରୋଜଗାର କରିବାକୁ ମନ ବଳାଇଛନ୍ତି । ପଇଡ ବିକି ଦିନକୁ ୪ଶହରୁ ୫ଶହ ଟଙ୍କା ରୋଜଗାର କରୁଛନ୍ତି । ହେଲେ ରୋଜଗାରର ଅଧା ପଇସା କେବଳ ଝିଅ ପାଠ ପଢାରେ ଖର୍ଚ୍ଚ ହୋଇଯାଉଛି ।
ଏନେଇ ମମିତା କହିଛନ୍ତି, “ଘର ଭଡ଼ା ସାଙ୍ଗକୁ ଝିଅର ପାଠପଢ଼ା, ଟ୍ୟୁସନ ଫି ଦେବାକୁ ପଡ଼ୁଛି। ମୁଣ୍ଡ ଉପରେ ଦାୟିତ୍ୱ ଥିବାରୁ କିଛି ବେପାର କରିବାକୁ ଭାବିଲି। ଝିଅ ପାଇଁ ମାସକୁ ୫-୬ ହଜାର ଟଙ୍କା ଖର୍ଚ୍ଚ ହେଉଛି। ଦିନକର ରୋଜଗାର ଯାହା ଅଧାରୁ ଅଧିକ ଝିଅ ପାଠପଢ଼ାରେ ଯାଉଛି। ଯାହା ରହୁଛି ଘର ଭଡ଼ା ଦେବା ସହ ଚଳିବାକୁ ପଡ଼ୁଛି । ”