ସାପ ଏପରି ଏକ ଜୀବ ଯାହାକୁ ସମସ୍ତଙ୍କର ଡର। ବାସ୍ତବରେ କିନ୍ତୁ ସାପ ବହୁତ ଶାନ୍ତ ଓ ଭୟାଳୁ ସ୍ୱଭାବର। ନିଜ ପ୍ରତି ବିପଦ ନ ଆସିବା ପର୍ଯ୍ୟନ୍ତ ସାପ କାହାକୁ ଆକ୍ରମଣ କରି ନଥାଏ। ଏହାସତ୍ତ୍ୱେ ସାପ ନାଁ ଶୁଣିଲେ ଲୋକଙ୍କ ହୃତକମ୍ପନ ବଢିଯାଏ ଓ ମନରେ ଅଜଣା ଭୟ ସୃଷ୍ଟି ହୋଇଥାଏ। ଏବେ କେରଳର ଏକ ଗାଁରେ ସାପକୁ ନେଇ ଭୟର ବାତାବରଣ ଖେଳି ଯାଇଛି। କାରଣ ଏହି ଗାଁରେ ଜନ୍ମ ନେଇଛନ୍ତି ଡଜନେରୁ ଅଧିକ କିଙ୍ଗ୍ କୋବ୍ରା ବା ଗୋଖର।
କଥାଟି ଏମିତି। କେରଳର କୋଟ୍ଟିପୁରରେ ଗୋଟିଏ କିଙ୍ଗ କୋବ୍ରା ୧୦୦ଟି ଅଣ୍ଡା ଦେଇଥିଲା। ତେବେ ନିଜ ଜୀବନକୁ ବିପଦ ଥିବାରୁ ମାଆ ସାପଟି ଅଣ୍ଡାଗୁଡିକୁ ଛାଡି ଅଞ୍ଚଳ ଛାଡି ଚାଲି ଯାଇଥିଲା। ଯେତେବେଳେ ଗ୍ରାମବାସୀ ଏତେ ସଂଖ୍ୟାରେ ସାପ ଅଣ୍ଡା ପାଇଲେ ଭୟର ବାତାବରଣ ଖେଳି ଯାଇଥିଲା। ଗ୍ରାମବାସୀ ଅଣ୍ଡାଗୁଡିକୁ ନଷ୍ଟ କରିଦେବାକୁ ଉଦ୍ୟମ କରିଥିଲେ। ଏହି ସମୟରେ ବନ କର୍ମଚାରୀ ବିଜୟ ଦିଲକଣ୍ଠନ୍, ଗୌରୀଶଙ୍କର ଏବଂ ଚନ୍ଦ୍ରନ୍ ସେଠାରେ ପହଞ୍ଚି ଅଣ୍ଡାଗୁଡିକୁ ଉଦ୍ଧାର କରିବା ସହ ସୁରକ୍ଷିତ ରଖିଥିଲେ।
ପ୍ରାୟ ୧୦୦ ଦିନ ପରେ ଏବେ ଅଣ୍ଡା ଫୁଟି ଛୁଆ ବାହାରିଛନ୍ତି। ତେବେ ଗ୍ରାମବାସୀଙ୍କ ଭୟକୁ ଦୃଷ୍ଟିରେ ରଖି କେତେ ସଂଖ୍ୟାରେ ଛୁଆ ଜନ୍ମ ହୋଇଛନ୍ତି ତାହା ଘୋଷଣା କରାଯାଇନାହିଁ। ଅଣ୍ଡାରୁ ଛୁଆ ଫୁଟିବା ପର୍ଯ୍ୟନ୍ତ ସାପଙ୍କ ପ୍ରତି ଗ୍ରାମବାସୀଙ୍କ ନମରେ ଥିବା ଭୟ ଦୂର କରିବାକୁ ଏହି ତିନି ବନ କର୍ମଚାରୀ ବହୁତ ଉଦ୍ୟମ କରିଥିଲେ।