ମୋହନା(ମିହିରି ଯତି): ମନରେ ଇଛା ଶକ୍ତି ଥିଲେ, ସବୁ ପ୍ରତିବନ୍ଧକ ହାର ମାନିଥାଏ। ଏହାକୁ ପ୍ରମାଣିତ କରି ଦେଖାଇଛନ୍ତି ଗଜପତି ଜିଲ୍ଳା ମୋହନା ବ୍ଳକ ଲିଲିଗଡ ଗାଁର ଭିନ୍ନକ୍ଷମ ଝିଅ ଜସ୍ମିନ୍ ଦଳାଇ। ନିଜର କୃତିତ୍ୱ ପାଇଁ ସେ ଏବେ ଅନ୍ୟମାନଙ୍କ ଲାଗି ଉଦାହରଣ ପାଲଟିଛନ୍ତି। ଭଲ ପାଠ ପଢି ଭଲ ମଣିଷଟିଏ ହେବା ସହ ଆଗାମୀ ଦିନରେ ସମାଜ ସେବା କରିବାକୁ ସେ ଲକ୍ଷ୍ୟ ରଖିଛନ୍ତି।
ଲିଲିଗଡ ଗାଁର ସରକାରୀ ଉଚ୍ଚ ବିଦ୍ୟାଳୟର ୧୦ ଶ୍ରେଣୀରେ ପଢ଼ୁଛନ୍ତି ଜସ୍ମିନ୍। ଜନ୍ମର ମାତ୍ର ୧୨ ଦିନ ପରେ ଦିନ ପରେ କୌଣସି ଏକ କାରଣରୁ ତାଙ୍କର ଗୋଡ ଦୁଇଟି ଅଚଳ ହୋଇଯାଇଥିଲା। ବାପା-ମା କୁଲି କାମ କରି ଜସ୍ମିନ୍ଙ୍କୁ ଗାଁ ସ୍କୁଲରେ ପାଠ ପଢ଼ାଇଥିଲେ। ବୟସ ବଢିବା ସହ ଜସ୍ମିନ୍ଙ୍କ ପାଠ ପଢ଼ା ପ୍ରତି ଆଗ୍ରହ ବଢ଼ିଥିଲା। ସ୍କୁଲରେ ଭଲ ପାଠ ପଢ଼ିବା ସହ ଖେଳକୁଦ, ଗୀତ, ନାଚ, ବକ୍ତୃତା ସମେତ ବିଭିନ୍ନ ପ୍ରତିଯୋଗିତାରେ ଭାଗ ନେଉଥିଲେ। ସ୍କୁଲରୁ ଆରମ୍ଭ କରି ବ୍ଳକ୍ ଓ ଜିଲ୍ଳାସ୍ତରୀୟ ପ୍ରତିଯୋଗିତାରେ ସେ ଅଂଶ ଗ୍ରହଣ କରୁଥିଲେ। ବିଭିନ୍ନ ପ୍ରତିଯୋଗିତାରେ ପ୍ରଥମ ସ୍ଥାନ ଅଧିକାର କରିବା ସହ ସେ ବହୁ ମାନପତ୍ର ପାଇଛନ୍ତି। ଜସ୍ମିନ୍ଙ୍କ କୃତିତ୍ୱ ପାଇଁ ବାପା-ମାଙ୍କ ସମେତ ଗ୍ରାମବାସୀମାନେ ଗର୍ବ ଅନୁଭବ କରୁଛନ୍ତି। ସାରା ସ୍କୁଲ ଓ ବ୍ଳକ ପାଇଁ ସେ ପ୍ରେରଣାର ଉତ୍ସ ପାଲଟିଛନ୍ତି। ସରକାରଙ୍କ ପକ୍ଷରୁ ଜସ୍ମିନ୍ଙ୍କୁ ଭିନ୍ନକ୍ଷମ ଭତ୍ତା ସମେତ ଷ୍ଟାଇପେଣ୍ଡ ବି ଯୋଗାଇ ଦିଆଯାଉଛି।
ସ୍କୁଲର ପ୍ରଧାନ ଶିକ୍ଷକ ପ୍ରତାପ ଚନ୍ଦ୍ର ନାୟକ କହିଛନ୍ତି,“ ଭିନ୍ନକ୍ଷମ ହେଲେ ବି ଜସ୍ମିନ୍ ନିଜକୁ ଭାବୁଛି ସେ କାହାଠାରୁ କମ୍ ନୁହେଁ। ପାଠ ପଢ଼ିବା ଠାରୁ ଆରମ୍ଭ କରି ସବୁଥିରେ ତାର ଆଗ୍ରହ ରହିଛି। ଗତବର୍ଷ ସୁରଭି କାର୍ଯ୍ୟକ୍ରମରେ ପୁରସ୍କାର ପାଇ ସାରିଛି। ଭିନ୍ନକ୍ଷମ ହେଲେ ବି ସେ ସ୍କୁଲକୁ ଚାଲିଚାଲି ଆସିଥାଏ। ଜସ୍ମିନ୍ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛି। ”
ଜସ୍ମିନ୍ର ବାପା ରାଜୀବ ଦଳାଇ କହିଛନ୍ତି,“ ଝିଅର ପାଠ ପଢ଼ିବା ପାଇଁ ଭାରି ଆଗ୍ରହ। ସେ ସ୍କୁଲରେ ପ୍ରଥମ ହେଉଛି। ସରକାରଙ୍କ ପକ୍ଷରୁ ଆମକୁ ସାହାଯ୍ୟ ମିଳୁଛି। ଝିଅକୁ ଆଗକୁ ଆହୁରି ପଢ଼ାଇବୁ।”
ଜସ୍ମିନ୍ ଦଳାଇ କହିଛନ୍ତି,“ c। ମୋ ସାଙ୍ଗସାଥିମାନେ ମୋତେ ବହୁତ ଭଲ ପାଆନ୍ତି। ସ୍କୁଲ ଆସିଲା ବେଳେ ସେମାନେ ମୋ ବହିପତ୍ର ଧରି ନେଇ ଆସିଥାନ୍ତି।”
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
