ସେ ବ୍ରହ୍ମଚାରୀ। ଆଜୀବନ ଅବିବାହିତ ରହିଛନ୍ତି। ତାଙ୍କ ଭକ୍ତମାନେ ମଧ୍ୟ ବ୍ରହ୍ମଚର୍ଯ୍ୟ ପାଳନ କରିଥାନ୍ତି। ହେଲେ ତାଙ୍କ ପାଖକୁ ଆସୁଥିବା ପ୍ରେମୀ ଯୁଗଳ ଖାଲି ହାତରେ ଫେରନ୍ତି ନାହିଁ। ପ୍ରେମୀ ଯୁଗଳଙ୍କ ବିବାହ କରାଇବା ସହ ବିବାହ ପ୍ରମାଣପତ୍ର ମଧ୍ୟ ତାଙ୍କ ତରଫରୁ ମିଳିଥାଏ। ସେ ହେଉଛନ୍ତି ଆଜୀବନ ବ୍ରହ୍ମତ୍ୱ ପାଳନ କରୁଥିବା ରାମଭକ୍ତ ହନୁମାନ। ଅହମ୍ମଦାବାଦରେ ରହିଛି ହନୁମାନଙ୍କ ‘ଲଗନିଆ ହନୁମାନ’ ନାମରେ ଏହି ମନ୍ଦିର। ଏଠାରେ ପ୍ରେମୀ ଯୁଗଳ ବିବାହ ବନ୍ଧନରେ ଆବଦ୍ଧ ହୋଇ ସାରା ଜୀବନ ଏକାଠି ରହିବାକୁ ପ୍ରତିଜ୍ଞା କରିଥାନ୍ତି।
ଚାରିଆଡୁ ସମସ୍ୟାରେ ପଡି ଘରୁ ଲୁଚି ପଳାଇ ଆସିଥିବା ପ୍ରେମୀ ଯୁଗଳଙ୍କର ଏହି ମନ୍ଦିରରେ ରୀତିନୀତି ଅନୁସାରେ ବିବାହ ସମ୍ପନ୍ନ ହୋଇଥାଏ। ମନ୍ଦିରର ପୂଜାରୀ ଏହି ବିବାହ କରାଇଥାନ୍ତି। ଆଜି ପର୍ଯ୍ୟନ୍ତ ଏହି ମନ୍ଦିରରେ ୧୦,୦୦୦ରୁ ଅଧିକ ପ୍ରେମୀ ଯୁଗଳଙ୍କ ବିବାହ ହୋଇସାରିଲାଣି।
ପ୍ରେମୀ ଯୁଗଳଙ୍କ ମଧ୍ୟରେ ପୂଜାରୀ ହରିଭାଇ ଜାଗୁଜୀ ଭାଲେନ୍ଟାଇନ୍ ବାବା ଭାବେ ପରିଚିତ।
ପ୍ରେମୀ ଯୁଗଳଙ୍କ ପାଇଁ ମନ୍ଦିର ୨୪ ଘଣ୍ଟା ଖୋଲା ରହିଥାଏ। ମନ୍ଦିରରେ ଜଣେ ଫଟୋଗ୍ରାଫର ମଧ୍ୟ ଅଛନ୍ତି। ଏଠାକୁ ବିବାହ କରିବାକୁ ଆସୁଥିବା ଯୋଡ଼ିଙ୍କୁ ଏକ ଫର୍ମ ପୂରଣ କରିବାକୁ ପଡିଥାଏ। ବିବାହ ପ୍ରମାଣପତ୍ର ପାଇଁ ସେମାନଙ୍କୁ ଆଇଡି ପ୍ରୁଫ୍ ଦେବାକୁ ହୋଇଥାଏ। ଉକ୍ତ ପ୍ରମାଣପତ୍ରକୁ ମ୍ୟାରେଜ୍ ରେଜିଷ୍ଟାରରେ ଜମା କରାଯାଇଥାଏ। ପରେ ପ୍ରେମୀ ଯୁଗଳଙ୍କୁ ବିବହାରର ପ୍ରମାଣପତ୍ର ମିଳିଯାଇଥାଏ।