ଭାରତୀୟ ସୁଇମର୍ ସାଜନ ପ୍ରକାଶ ବେକରେ ଆଘାତ କାରଣରୁ ସୁଇମିଂ କରିବାରେ ଅସମର୍ଥ ଥିଲେ, କିନ୍ତୁ ସେ ଜଦରବସ୍ତ ପ୍ରତ୍ୟାବର୍ତ୍ତନ କରି ଟୋକିଓ ଅଲିମ୍ପିକ୍ ପାଇଁ ‘ଏ’ କଟ୍ ହାସଲ କରିଛନ୍ତି । ଅଲିମ୍ପିକ୍ ପାଇଁ ସିଧାସଳଖ କ୍ୱାଲିଫାଏ କରିବାରେ ଭାରତର ପ୍ରଥମ ସୁଇମର୍ ହୋଇଥିବା କେରଳର ଏହି ଖେଳାଳିଙ୍କର ଖୁବ୍ ପ୍ରଶଂସା କରାଯାଉଛି । ୨୭ ବର୍ଷୀୟ ସାଜନ ପ୍ରକାଶ ରୋମରେ ସେଟେ କୋଲି ଟ୍ରଫିର ପୁରୁଷ ୨୦୦ ମିଟର୍ ବଟରଫ୍ଲାଇ ଇଭେଣ୍ଟରେ ୧ ମିନିଟ୍ ୫୬.୩୮ ସେକେଣ୍ଡର ରେକର୍ଡ ସମୟ ସହ ଅଲିମ୍ପିକ୍ କ୍ୱାଲିଫାଇଙ୍ଗ୍ ଟାଇମ୍ ହାସଲ କରିଥିଲେ।
କୋଭିଡ୍-୧୯ ମହାମାରୀ କାରଣରୁ ଗତ ବର୍ଷ ଦେଶରେ ଲାଗୁ ହୋଇଥିବା ଲକଡାଉନ୍ ସମୟରେ ସାଜନ ଥାଇଲ୍ୟାଣ୍ଡରେ ଫସି ଯାଇଥିଲେ । ସେ ଆହତ କାରଣରୁ ୭ରୁ ୮ ମାସ ସୁଇମିଂ ପୁଲରୁ ଦୂରେଇ ରହିଥିଲେ । ଆହତ ଏବଂ ଏହିସବୁ କାରଣରୁ ସେ ବହୁତ ଭାଙ୍ଗିପଡ଼ି ଥିଲେ, କିନ୍ତୁ ଅଗଷ୍ଟ ୨୦୨୦ରେ ଅଭ୍ୟାସ ପାଇଁ ଦୁବାଇ ଯିବା ପରେ ତାଙ୍କର ଆତ୍ମବିଶ୍ୱାସ ବଢ଼ିଥିଲା । ଦୁବାଇରେ କୋଚ୍ ପ୍ରଦୀପ କୁମାରଙ୍କ ମାର୍ଗଦର୍ଶନରେ ଅଭ୍ୟାସ କରିବା ଦ୍ୱାରା ତାଙ୍କ ଖେଳରେ ଅନେକ ସୁଧାର ଆସିଥିଲା ।
ସାଜନ ପିଟିଆଇକୁ କହିଛନ୍ତି, ୨୦୧୯ରେ ବିଶ୍ୱ ଚାମ୍ପିୟନଶିପ୍ ବେଳେ ବେକରେ ଯନ୍ତ୍ରଣା ହୋଇଥିଲା, କିନ୍ତୁ ମୋତେ ଲାଗିଲା ଯେ ଏହା କୌଣସି ଚମତ୍କାରିତା ଦ୍ୱାରା ଶେଷ ହୋଯିବ। ମୁଁ ପେନକିଲର୍ ମେଡିସିନ୍ ସହ କିଛି ପ୍ରତିଯୋଗିତାରେ ଭାଗ ନେଲି । ନେପାଳରେ ହୋଇଥିବା ଦକ୍ଷିଣ ଏସୀୟ କ୍ରୀଡ଼ାରେ ମୁଁ ହାତ ଉଠାଇ ପାରୁନଥିଲି । ଏହା ପରେ ମୁଁ ସ୍କାନ୍ କରାଇଥିଲି, ଯେଉଁଥିରେ ଜଣାପଡ଼ିଲା ଯେ ମୋ ବେକ ପାଖରେ ସ୍ଲିପ୍ ଡିସ୍କ ରହିଛି । ଏହାର ପ୍ରଭାବରେ ମୋର ବାମ ହାତରେ ଖୁବ୍ ଯନ୍ତ୍ରଣା ହେଉଥିଲା । ଏହା ପରେ ମୁଁ ଯେତେବେଳେ ଫିଟ୍ ହେଲି, ହଠାତ୍ ଲକଡାଉନ୍ ହୋଇଗଲା । ମୁଁ ସେହି ସମୟରେ ଥାଇଲ୍ୟାଣ୍ଡରେ ଥିଲି ଏବଂ ମୋ ସହ କେହି ଫିଜିଓ ନଥିଲେ । ଅଗଷ୍ଟରେ ଦୁବାଇ ଚାଲିଗଲି। ମୋ ଫିଜିଓ ରିଚାର୍ଡ ମୋତେ ସହାୟତା କରିଥିଲେ । ମୁଁ ନିଜ ଭିତରେ ସୁଧାର କରିବା ଆରମ୍ଭ କଲି । ଏଥିପାଇଁ ମୋର କୋଚ୍ ଓ ତାଙ୍କ ପତ୍ନୀ ଖୁବ୍ ସହାୟତା କରିଥିଲେ ।
ସାଜନ କହିଛନ୍ତି, ‘ପ୍ରଥମ ତିନି ମାସ ମୁଁ ବଟରଫ୍ଲାଇକୁ ଥରେ ବି କରିପାରୁନଥିଲି । ଏଭଳି ସମୟରେ ମୋ ପାଇଁ ସୁସ୍ଥ ରହିବା ମୁଖ୍ୟ ପ୍ରାଥମିକତା ଥିଲା। ମୁଁ ଆହତ ହୋଇଥିଲି ଏବଂ ମାନସିକ ଭାବେ ଦୃଢ଼ ନଥିଲି । ଏଥରୁ ବାହାରିବା ପାଇଁ ମୋ ପାଇଁ ବହୁତ କଷ୍ଟକର ଥିଲା।’ ନଭେମ୍ବର-ଡିସେମ୍ବରରେ ସାଜନଙ୍କ ଯନ୍ତ୍ରଣା କମ୍ ହୋଇଥିଲା ଏବଂ ପୁଣିଥରେ ସୁଇମିଂ ପୁଲ୍ ଯିବା ପାଇଁ ତାଙ୍କର ଆତ୍ମବିଶ୍ୱାସ ବଢ଼ିଥିଲା । ଫେବୃଆରୀରେ ଲାଟଭିଆ ଓପନରେ ଭଲ ଫଳାଫଳା ମିଳିବାପରେ ଅଲିମ୍ପିକ ପାଇଁ ସାଜନଙ୍କର ଆଶା ବଢ଼ିଥିଲା ।
ସାଜନ କହିଛନ୍ତି, ଯେତେବେଳେ ମୁଁ ଲାଟଭିଆରେ ପ୍ରଥମ ଅଲିମ୍ପିକ୍ କ୍ୱାଲିଫାୟର୍ ପାଇଁ ଯାଇଥିଲି, ମୁଁ ବଟରଫ୍ଲାଇ ପାଇଁ ବେଶୀ ଅଭ୍ୟାସ କରିନଥିଲି । ସେଠାରେ ଯେତେବେଳେ ମୁଁ ଦୁଇ ମିନିଟରୁ କମ୍ ସମୟରେ ସୁଇମିଂ ପୂରଣ କଲି, ମୋର ଆଶା ବଢ଼ିଯାଇଥିଲା । ସମୟ ଅନୁସାରେ ମୁଁ ପ୍ରଦର୍ଶନରେ ସୁଧାର କରିବାରେ ଲାଗିଲି । ଏବେ ମୁଁ ବାସ୍ତବରେ ଅଲିମ୍ପିକ୍ ପାଇଁ କ୍ୱାଲିଫାଏ କରିଥିବାରୁ ବହୁତ ଖୁସି ।