କଂଗ୍ରେସ ଦଳର ମୁଖ୍ୟ ସଚେତକ ପଦରୁ ଇସ୍ତଫା ଦେଲେ ତାରା!

ଭୁବନେଶ୍ୱର (ଓଡ଼ିଶା ରିପୋର୍ଟର): ବରିଷ୍ଠ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ଦଳର ମୁଖ୍ୟ ସଚେତକ ପଦରୁ ଇସ୍ତଫା ଦେଇଥିବା ନେଇ ଚର୍ଚ୍ଚା ହେଉଛି। ତେବେ ଏନେଇ ସେ କିଛି ସ୍ପଷ୍ଟ କରି ନାହାନ୍ତି।

ଏହା ପୂର୍ବରୁ ନରସିଂହ ମିଶ୍ର କଂଗ୍ରେସ ବିଧାୟକ ଦଳ ନେତା ପଦ ଛାଡ଼ିଥିବା ନେଇ ଖବର ଆସିଥିଲା। କିନ୍ତୁ ସେ ବି ଏ ସଂପର୍କରେ କିଛି ସ୍ପଷ୍ଟ କରି ନାହାନ୍ତି।

ପିସିସି ସଭାପତି ପରିବର୍ତ୍ତନକୁ ନେଇ କଂଗ୍ରେସରେ ଏବେ ଆଭ୍ୟନ୍ତରୀଣ ରାଜନୀତି ଜୋର ଧରିଥିବା ବେଳେ ଏହି ସବୁ ଖବର ଆସିଛି। ଜଣେ ବିଧାୟକଙ୍କୁ ପିସିସି ସଭାପତି କରିବାକୁ ବେଶ୍ କିଛି ଦିନ ହୋଇଗଲାଣି ତାରା ପ୍ରସାଦ ବାହିନୀପତି ଦାବି କରି ଆସୁଥିବା ବେଳେ ଦଳୀୟ ପଦରୁ ତାଙ୍କ ଇସ୍ତଫା ଖବରକୁ ନେଇ ଜୋର ଚର୍ଚ୍ଚା ଧରିଛି।

ଅନ୍ୟପକ୍ଷରେ ଆଜି କଂଗ୍ରେସର ରାଜ୍ୟ ପ୍ରଭାରୀ ଚେଲା କୁମାର କହିଛନ୍ତି ଯେ ପିସିସି ସଭାପତିଙ୍କ ସହିତ ଏଥିରେ ଆମୂଳଚୂଳ ପରିବର୍ତ୍ତନ କରାଯିବ। ସେ କହିଛନ୍ତି, ଏନେଇ ଦୁଇ ଦିନ ଧରି ଦଳର ନେତା ଓ କର୍ମୀଙ୍କ ସହିତ ଆଲୋଚନା କରାଯାଇଛି। ରିପୋର୍ଟ ପ୍ରଦାନ କରାଯିବା ପରେ ହାଇକମାଣ୍ଡ ଏନେଇ ନିଷ୍ପତ୍ତି ନେବେ ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।