ମୀରପୁର: ବାଂଲାଦେଶରେ ବୁଧବାରଠାରୁ ଆରମ୍ଭ ହେଉଛି ଏସିଆ କପ୍ ଟି-ଟ୍ୱେଣ୍ଟି ଟୁର୍ଣ୍ଣାମେଣ୍ଟ୍। ମୀରପୁରର ଶେର-ଏ-ବାଂଲା ଷ୍ଟାଡିୟମ୍ରେ ଆଜି ସନ୍ଧ୍ୟା ୭ଟାରେ ଖେଳା ଯିବାକୁ ଥିବା ଉଦ୍ଘାଟନୀ ମ୍ୟାଚ୍ରେ ମୁହାଁମୁହିଁ ହେବେ ଭାରତ ଓ ବାଂଲାଦେଶ। ଏଥିପାଇଁ ଉଭୟ ଦଳ ବେଶ୍ ଉତ୍ସାହିତ ରହିଛନ୍ତି। ଗତକାଲି ଉଭୟ ଦଳ ଦୀର୍ଘ ସମୟ ଧରି ଫତୁଲ୍ଲାରେ ଅଭ୍ୟାସ ମଧ୍ୟ କରିଥିଲେ।
ଏହି ମ୍ୟାଚ୍ ପାଇଁ ଦୁଇ ଦଳ ସ୍ୱତନ୍ତ୍ର ରଣକୌଶଳ ନେଇ ପଡ଼ିଆକୁ ଓହ୍ଲାଇବ। ଅଷ୍ଟ୍ରେଲିଆ ଓ ଶ୍ରୀଲଙ୍କା ବିପକ୍ଷ ଟି-ଟ୍ୱେଣ୍ଟିର ସଫଳତାକୁ ବାଂଲାଦେଶରେ ଦୋହରାଇବାକୁ ଭାରତ ଚେଷ୍ଟା କରିବ। ଦଳ ମୁଖ୍ୟତଃ ଅଲରାଉଣ୍ଡର ଓ ବୋଲରଙ୍କ ଉପରେ ଫୋକସ୍ କରିବ। ଦଳର ଟପ୍ ଅର୍ଡର ବ୍ୟାଟ୍ସମ୍ୟାନ ଶିଖର ଧାୱନ, ରୋହିତ ଶର୍ମା, ବିରାଟ କୋହଲି, ଯୁବରାଜ ସିଂହ, ସୁରେଶ ରାଇନା ଓ ଏମଏସ ଧୋନି ବାଂଲାଦେଶର ବୋଲିଂ ଲାଇନ୍କୁ ଭାଙ୍ଗିବାକୁ ଚେଷ୍ଟା କରିବେ। ବାଂଲାଦେଶର ବ୍ୟାଟିଂ ଲାଇନ୍କୁ ଭାଙ୍ଗିବାକୁ ଦଳ ଅଶ୍ୱିନ୍, ଜାଡେଜା, ନେହରା ଓ ବୁମ୍ରାଙ୍କ ଉପରେ ନିର୍ଭର କରିବ।
ଅନ୍ୟପକ୍ଷରେ ବାଂଲାଦେଶ ମଧ୍ୟ ଭାରତକୁ କଡ଼ା ଟକ୍କର ଦେବାକୁ ପ୍ରସ୍ତୁତି ଚଳାଇଛି। ଭାରତର ବ୍ୟାଟିଂ ଲାଇନ୍କୁ ବିଗାଡ଼ିବାକୁ ଦଳ ସକିବ୍ ଅଲ ହାସନ୍,ଶବୀର ହାସନ୍,ନୁରୁଲ୍ ହାସନ୍ ଓ ସୌମ୍ୟ ସରକାରଙ୍କୁ ପ୍ରାଧାନ୍ୟ ଦେବ। ଏହାସହ ଭାରତୀୟ ବୋଲିଂକୁ ମୁକାବିଲା କରିବାକୁ ଏମ୍ ମୋର୍ତାଜା, ଆବୁ ହାଇଦର, ଅଲ-ଅମୀନ୍ ହାସନ୍,ଏ ସୋନୀ ଓ ଇମ୍ରୁଲ କେୟାଜ୍ ମହମ୍ମୁଦଉଲ୍ଲା ପ୍ରସ୍ତୁତ ରହିଛନ୍ତି।
ଅଭ୍ୟାସ ବେଳେ ଧୋନି ଆହତ ହୋଇଥିବାରୁ ଭାରତ ପାଇଁ ଚିନ୍ତା ବଢ଼ି ଯାଇଛି। ତାଙ୍କ ବଦଳରେ ପାର୍ଥିବ ପଟେଲ୍ ସ୍ଥାନ ପାଇଛନ୍ତି।
ପୂର୍ବରୁ ଏସିଆ କପ୍ ୫୦ ଓଭର ବିଶିଷ୍ଟ ହେଉଥିବା ବେଳେ ଚଳିତ ବର୍ଷ ଟି-୨୦ ଫର୍ମାଟରେ ଖେଳାଯିବ। ଏଥିରେ ଭାରତ ସମେତ ଗତବର୍ଷର ଚାମ୍ପିଅନ୍ ଶ୍ରୀଲଙ୍କା, ଗତବର୍ଷର ରନର୍ସଅପ୍ ବାଂଲାଦେଶ, ପାକିସ୍ତାନ ଓ ୟୁଏଇ ଅଂଶଗ୍ରହଣ କରିବେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
