କଟକ: ବାରବାଟୀ ଷ୍ଟାଡିୟମରେ ବୋତଲ ଫିଙ୍ଗା ଘଟଣା ନେଇ ଆଜି ଓସିଏ କର୍ତ୍ତୃପକ୍ଷ ଓ କମିଶନରେଟ୍ ପୋଲିସ୍ ମଧ୍ୟରେ ବୈଠକ ବସି ଆଲୋଚନା ହୋଇଛି। ବୋତଲ ଫିଙ୍ଗା ଘଟଣା ପରେ ଗୃହ ସଚିବ ତଦନ୍ତ କରି ସରକାରଙ୍କୁ ରିପୋର୍ଟ ପ୍ରଦାନ କରିଥିଲେ। ଏହି ରିପୋର୍ଟ ଆଧାରରେ ଓସିଏ କର୍ତ୍ତୃପକ୍ଷଙ୍କୁ କେତେକ ସତର୍କତାମୂଳକ ପଦକ୍ଷେପ ନେବାକୁ କୁହାଯାଇଛି। ବାରବାଟୀ ଷ୍ଟାଡିୟମ୍ ଭିତରକୁ ପାଣି ବୋତଲ ନେବାକୁ ମନା କରାଯାଇଛି।
ଏହାସହ ସମସ୍ତ ଗ୍ୟାଲେରୀ ଓ ବସିବା ସ୍ଥାନ ନିକଟରେ ଦର୍ଶକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇବା ପାଇଁ ବନ୍ଦୋବସ୍ତ କରାଯିବ। ପଡ଼ିଆ ପାଖରେ ତାରଜାଲିକୁ ଅଧିକ ଉଚ୍ଚ କରାଯିବ। ଏହାଦ୍ୱାରା ଦର୍ଶକ କୌଣସି ଜିନିଷ ଫୋପାଡ଼ିଲେ ତାହା ପଡ଼ିଆ ମଧ୍ୟକୁ ଯାଇ ପାରିବ ନାହିଁ। ସେହିପରି କ୍ରିକେଟ ମ୍ୟାଚ୍ ବେଳେ ସମସ୍ତ ସିଟକୁ ନମ୍ୱରିଂ କରାଯିବ ଓ ଟିକେଟରେ ସିଟ୍ ନମ୍ୱର ଉଲ୍ଲେଖ ରହିବ। ପୋଲିସ କମିଶନରଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଓସିଏ କର୍ମକର୍ତ୍ତାଙ୍କ ସହ କଟକ ଡିସିପି ପ୍ରମୁଖ ଉପସ୍ଥିତ ଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
