ଭାରତରେ ଖେଳିବାକୁ କୌଣସି ଦେଶ ଅସୁରକ୍ଷିତ ମନେ କରିବା ଉଚିତ ନୁହେଁ: ଅନୁରାଗ ଠାକୁର

ନୂଆଦିଲ୍ଲୀ: ଭାରତରେ ଖେଳିବାକୁ କୌଣସି ଦେଶ ଅସୁରକ୍ଷିତ ମନେ କରିବା ଉଚିତ ନୁହେଁ। ବିସିସିଆଇ ସମ୍ପାଦକ ଅନୁରାଗ ଠାକୁର ବୁଧବାର ଏହା କହିଛନ୍ତି। ସୁରକ୍ଷା ଦୃଷ୍ଟିକୋଣରୁ ଆଗାମୀ ଟି-ଟ୍ୱେଣ୍ଟି ବିଶ୍ୱକପ୍‌ରେ ଏହାର ମ୍ୟାଚ୍‌ଗୁଡିକୁ ପାକିସ୍ତାନ ଅନ୍ୟତ୍ର କରାଇବା ପାଇଁ ଦାବି କରୁଥିବା ସମ୍ପର୍କିତ ରିପୋର୍ଟ ଆସିବା ପରିପ୍ରେକ୍ଷୀରେ ଏ କଥା କହିଛନ୍ତି ଅନୁରାଗ।

ସେ କହିଛନ୍ତି ଯେ, ବିସିସିଆଇ ସବୁଠୁ ବଢିଆ ସ୍ଥାନରେ ଟି-ଟ୍ୱେଣ୍ଟି ବିଶ୍ୱକପ୍ ଆୟୋଜନ କରିବ। ଏଥିରେ ସାମିଲ ହେବାକୁ ଥିବା ସମସ୍ତ ଦଳକୁ ସୁଦୃଢ ସୁରକ୍ଷା ବ୍ୟବସ୍ଥା ଯୋଗାଇ ଦିଆଯିବ। ପୂର୍ବରୁ ବି ଭାରତ ବିଶ୍ୱକପ୍‌ ଆୟୋଜନ କରିଛି। ତେଣୁ କୌଣସି ଦେଶ ଭାରତରେ ଖେଳିବାକୁ ଅସୁରକ୍ଷିତ ମନେ କରିବା ଉଚିତ ନୁହେଁ।

ଏହା ପୂର୍ବରୁ ପାକିସ୍ତାନ କ୍ରିକେଟ ମୁଖ୍ୟ ଶାହାରହାର ଖାନ୍ କହିଥିଲେ ଯେ, ଇସଲାମବାଦ ଯଦି ଭାରତ ଗସ୍ତରେ ଯିବାକୁ ଅନୁମତି ନ ଦିଏ ତା’ହେଲେ ତାଙ୍କର ମ୍ୟାଚ୍‌ଗୁଡିକୁ ଏକ ନିରପେକ୍ଷ ସ୍ଥାନରେ ଆୟୋଜନ କରାଯାଉ।

ସୂଚନାଯୋଗ୍ୟ, ଆସନ୍ତା ମାର୍ଚ୍ଚ ୮ରୁ ଏପ୍ରିଲ ୩ ତାରିଖ ମଧ୍ୟରେ ଟି-ଟ୍ୱେଣ୍ଟି ବିଶ୍ୱକପ୍ ଖେଳାଯିବ।