ଭୁବନେଶ୍ୱର (ଓଡ଼ିଶା ରିପୋର୍ଟର): ବିଶ୍ୱକପ୍ ହକି ସରି ଯାଇଛି। ଭୁବନେଶ୍ୱରରେ ଏହା ସଫଳତାର ସହିତ ଆୟୋଜିତ ହୋଇଯାଇଛି। ଏହି ବିଶ୍ୱକପ୍ ପାଇଁ ୮୨ କୋଟି ଟଙ୍କାର ବଜେଟ୍ ରହିଥିଲା। ଆଜି ଏହି ସୂଚନା ଦେଇଛନ୍ତି କ୍ରୀଡ଼ା ସଚିବ ବିଶାଲ ଦେବ।
ଭୁବନେଶ୍ୱରରେ ୨୦ତମ ଅଲ୍ ଓଡ଼ିଶା ନାଲ୍କୋ ଓପନ୍ ଟେନିସ୍ ଟୁର୍ଣ୍ଣାମେଣ୍ଟର ଉଦ୍ଘାଟନୀ ଉତ୍ସବରେ ଯୋଗ ଦେବା ଅବସରରେ କ୍ରୀଡ଼ା ସଚିବ ଏହି ସୂଚନା ଦେଇଥିଲେ।
ସେ କହିଥିଲେ, ଆସନ୍ତା ବର୍ଷ ଭୁବନେଶ୍ୱରରେ ବିଶ୍ୱ ହକି ସିରିଜ୍ ଆୟୋଜନ କରିବାର ଯୋଜନା ରହିଛି। ଏହା ସହିତ ଆଉ କିଛି ଅନ୍ତର୍ଜାତୀୟ ମ୍ୟାଚ୍ ପାଇଁ ମଧ୍ୟ ଯୋଜନା ରହିଛି।
ଭୁବନେଶ୍ୱରରେ ଅନୁଷ୍ଠିତ ବିଶ୍ୱକପ୍ ହକିରେ ବେଲ୍ଜିୟମ୍ ଚାମ୍ପିଅନ୍ ହୋଇଥିଲା। ନେଦରଲ୍ୟାଣ୍ଡସ୍କୁ ପେନାଲ୍ଟି ଶୁଟ୍ଆଉଟ୍ରେ ପରାସ୍ତ କରି ଦଳ ପ୍ରଥମ ଥର ପାଇଁ ଏହି କପ୍ ହାତେଇଥିଲା।
ଅନ୍ୟପକ୍ଷରେ ଭାରତୀୟ ଦଳ କ୍ୱାର୍ଟର ଫାଇନାଲ୍ରୁ ବିଦା ହୋଇଯାଇଥିଲା। କ୍ୱାର୍ଟର ଫାଇନାଲ୍ରେ ଦଳ ଶକ୍ତିଶାଳୀ ନେଦରଲ୍ୟାଣ୍ଡସ୍ ଠାରୁ ହାରି ଯାଇଥିଲା।