ଟି-୨୦ ବିଶ୍ୱକପ: ନେଦରଲ୍ୟାଣ୍ଡ୍ସକୁ ୫୬ ରନରେ ହରାଇଲା ଭାରତ

ସିଡ୍‌ନୀ: ପାକିସ୍ତାନକୁ ରୋମାଞ୍ଚକର ଢଙ୍ଗରେ ମାତ୍‌ ଦେଇଥିବା ଟିମ ଇଣ୍ଡିଆ ଆଜି ଚଳିତ ବିଶ୍ୱକପରେ କ୍ରମାଗତ ଦ୍ୱିତୀୟ ବିଜୟ ହାସଲ କରିଛି। ଆଜି ରୋହିତ ଶର୍ମାଙ୍କ ଭାରତୀୟ ଟିମ୍‌ ଅପେକ୍ଷାକୃତ ଦୁର୍ବଳ ନେଦରଲ୍ୟାଣ୍ଡ୍ସକୁ ଏକତରଫା ଭାବେ ୫୬ ରନରେ ହରାଇ ଦେଇଛି।

ସିଡ୍‌ନୀରେ ଟସ୍‌ ଜିତି ପ୍ରଥମେ ବ୍ୟାଟିଂ କରୁଥିବା ଟିମ ଇଣ୍ଡିଆ ବିରାଟଙ୍କ କୋହଲିଙ୍କ ଅପରାଜିତ ୬୨ ଓ ସୂର୍ଯ୍ୟ କୁମାରଙ୍କ ଅପରାଜିତ ୫୧ ରନ ସାଙ୍ଗକୁ ରୋହିତ ଶର୍ମାଙ୍କ ୫୩ ରନ ବଳରେ ୨ ୱିକେଟ ହରାଇ ୧୭୯ ରନ କରିଥିଲା। ଏହାର ଜବାବରେ ନେଦରଲ୍ୟାଣ୍ଡ୍ସ କମ୍ରାଗତ ୱିକେଟ ହରାଇ ଚାଲିଥିଲା। ଶେଷରେ ଡଚ୍‌ ଟିମ୍‌ ନିର୍ଦ୍ଧାରିତ ୨୦ ଓଭରରେ ୯ ୱିକେଟ ହରାଇ କେବଳ ୧୨୩ ରନ କରିବାକୁ ସକ୍ଷମ ହୋଇଛି। ଏହି ମ୍ୟାଚ୍‌କୁ ୫୭ ରନରେ ଜିତି ଭାରତ ପଏଣ୍ଟ ଟେବୁଲର ପ୍ରଥମ ସ୍ଥାନକୁ ଉଠିଛି। ଦ୍ୱିତୀୟ ସ୍ଥାନରେ ଦକ୍ଷିଣ ଆଫ୍ରିକା ରହିଛି। ମାତ୍ର ୨୫ ବଲରେ ୫୧ ରନ କରିଥିବା ସୂର୍ଯ୍ୟ କୁମାରଙ୍କୁ ମ୍ୟାନ ଅଫ ଦି ମ୍ୟାଚ୍‌ ପୁରସ୍କାର ମିଳିଛି। ସେ ତାଙ୍କ ୫୧ ରନର ଇନିଂସରେ ୭ଟି ଚୌକା ଓ ଗୋଟିଏ ଛକା ମାରିଥିଲେ।

୧୮୦ ରନର ଟାର୍ଗେଟ ପାଇଥିବା ନେଦରଲ୍ୟାଣ୍ଡ୍ସ ୧୧ ରନରେ ଓପନର ବିକ୍ରମଜିତ ସିଂହ(୧)ଙ୍କୁ ହରାଇଥିଲା। ଅନ୍ୟତମ ଓପନର ମାକ୍ସ ଓ’ ଡୋୱଡ କେବଳ ୧୬ ରନ କରିବାକୁ ସକ୍ଷମ ହୋଇଥିଲେ। ସିଂହଙ୍କ ୱିକେଟ ଭୁବନେଶ୍ୱର କୁମାର ଓ ମାକ୍ସଙ୍କୁ ଅକ୍ଷର ପଟେଲ କ୍ଲିନବୋଲ୍ଡ କରିଥିଲେ।

ଏହାପରେ ବାସ ଡେ ଲିଡେ(୧୬) ଓ କୋଲିନ ଆକେରମାନ୍ନ(୧୭) ସ୍ଥିତି ସମ୍ଭାଳିବାକୁ ଚେଷ୍ଟା କରିଥିଲେ। ହେଲେ ସେମାନେ ତୃତୀୟ ୱିକେଟ ପାଇଁ କେବଳ ୨୭ ରନ ଯୋଡ଼ିବାକୁ ସକ୍ଷମ ହୋଇଥିଲେ। ଦଳୀୟ ସ୍କୋର ୪୭ ଥିବା ବେଳେ ଅକ୍ଷର ପଟେଲ ୧୬ ରନ କରିଥିବା ଲିଡେଙ୍କୁ ଆଉଟ କରିଥିଲେ।

ଆକେରମାନ୍ନ(୧୭) ରବି ଅଶ୍ୱିନଙ୍କ ବଲରେ ପ୍ୟାଭିଲିୟନ ଫେରିଥିଲେ। ଟମ କୁପର ୯ ରନ ଆଉଟ ହେବା ପରେ ବିପର୍ଯ୍ୟୟ ସୃଷ୍ଟି ହୋଇଥିଲା। ଏଥିସହ ୬୩ ରନରେ ୫ ୱିକେଟ ହରାଇ ଡଚ୍‌ ଟିମ ସଙ୍କଟରେ ପଡ଼ିଥିଲା।

ଅନ୍ୟମାନଙ୍କ ମଧ୍ୟରେ ଅଧିନାୟକ ସ୍କଟ ଏଡୱାର୍ଡସ(୫), ଲୋଗାନ ଭାନ ବେକ(୩) ବେଶୀ କିଛି କରି ପାରି ଥିଲେ। ଟିମ ପ୍ରିଙ୍ଗଲ ୨୦ ରନ କରିଥିଲେ ମଧ୍ୟ ଏହା ସମୁଦ୍ରକୁ ଶଙ୍ଖେ ସଦୃଶ ହୋଇଥିଲା। ତାଙ୍କୁ ମହମ୍ମଦ ଶାମି ଆଉଟି ନେଦରଲ୍ୟାଣ୍ଡ୍ସର ଯାହା ବି କିଛି ଆଶା ଥିଲା, ସେଥିରେ ପାଣି ପକାଇ ଦେଇଥିଲେ।

ଦଳୀୟ ସ୍କୋର ୧୦୧ ଥିବା ବେଳେ ଅର୍ଶଦୀପ ସିଂହ ଦୁଇଟି ବଲରେ ଦୁଇଟି ୱିକେଟ ନେଇ ଡଚ୍‌ ଦଳକୁ ୯ମ ଝଟକା ଦେଇଥିଲେ। ୧୯ତମ ଓଭରରେ ଶାମି ବୋଲିଂ କରିଥିବା ବେଳେ ୮ ରନ ଦେଇଥିଲେ। ଶେଷ ଓଭରରେ ନେଦରଲ୍ୟାଣ୍ଡ୍ସକୁ ଜିତିବା ପାଇଁ ୭୧ ରନ ଦରକାର ଥିବା ବେଳେ ଅର୍ଶଦୀପ ସିଂହ ବୋଲିଂ କରିବାକୁ ଆସିଥିଲେ। ତାଙ୍କ ପାଖରେ ହ୍ୟାଟ୍ରିକ ନେବାକୁ ସୁଯୋଗ ଥିଲେ ମଧ୍ୟ ପଲ ଭାନ ମୀକେରେନ ଏହା କରାଇ ଦେଇ ନଥିଲେ। ହ୍ୟାଟ୍ରିକ ବଲଟି ଡଟ୍‌ ହୋଇଥିଲା। ଏହି ଓଭରରେ ଡଚ୍‌ ଟିମ ୧୪ ରନ ଆଦାୟ କରି ୧୨୩ରେ ପହଞ୍ଚିବାକୁ ସକ୍ଷମ ହୋଇଥିଲା। ଶାହରିଜ ଅହମଦ ୧୬ ଓ ମୀରକେରେନ ଶେଷ ଯାଏ ୧୪ ରନ କରି ଅପରାଜିତ ରହିଥିଲେ।

ଭାରତ ପକ୍ଷରୁ ଭୁବନେଶ୍ୱର କୁମାର, ଅର୍ଶଦୀପ ସିଂହ, ଅକ୍ଷର ପଟେଲ ଓ ରବି ଅଶ୍ୱିନ ୨ଟି ଲେଖାଏ ୱିକେଟ ନେଇଥିବା ବେଳେ ଶାମିଙ୍କୁ ଗୋଟିଏ ସଫଳତା ମିଳିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।