ମହିଳା ଆଇପିଏଲ: ସ୍ମୃତି ମନ୍ଧାନାଙ୍କ ଟିମ୍‌ରେ ୨ ଓଡ଼ିଆ

ପୁଣେ: ଆସନ୍ତା ୨୩ରୁ ଆରମ୍ଭ ହେବାକୁ ଥିବା ମହିଳା ଟି-୨୦ ଚ୍ୟାଲେଞ୍ଜ ବା ମହିଳା ଆଇପିଏଲ ପାଇଁ ଆଜି ଖେଳାଳିଙ୍କ ନାଁ ଘୋଷଣା କରିଛି ବିସିସିଆଇ। ପୂର୍ବବର୍ଷ ଗୁଡ଼ିକ ଭଳି ଏଥିର ମଧ୍ୟ ୩ଟି ଦଳ ମହିଳା ଟି-୨୦ ଚ୍ୟାଲେଞ୍ଜରେ ଲଢ଼େଇ କରିବେ। ଏହି ୩ ଦଳ ପାଇଁ ଆଜି ବିସିସିଆଇ ଖେଳାଳିମାନଙ୍କ ନାଁ ଘୋଷଣା କରିଛନ୍ତି। ଏହି ଖେଳାଳିଙ୍କ ମଧ୍ୟରେ ଓଡ଼ିଶାର ପ୍ରିୟଙ୍କା ପ୍ରୟଦର୍ଶିନୀ ଓ ସୁଜତା ମଲ୍ଲିକ ରହିଛନ୍ତି। ଉଭୟ ସ୍ମୃତି ମନ୍ଧାନାଙ୍କ ଟ୍ରେଲବ୍ଲେଜର୍ସ ଦଳରେ ରହିଛନ୍ତି। ୨୦୨୦ ମହିଳା ଟି-୨୦ ଚ୍ୟାଲେଞ୍ଜରେ ଟ୍ରେଲବ୍ଲେଜର୍ସ ହିଁ ଚାମ୍ପିୟନ ହୋଇଥିଲା।

କରୋନା ପାଇଁ ୨୦୨୧ରେ ଏହି ଟୁର୍ଣ୍ଣାମେଣ୍ଟ ଖେଳା ଯାଇ ନଥିଲା। କିନ୍ତୁ ଚଳିତ ବର୍ଷ ମେ’ ୨୩ରୁ ୨୮ ଯାଏ ପୁଣେର ଏମସିଏ ଷ୍ଟାଡିୟମରେ ମହିଳା ଟି-୨୦ ଚ୍ୟାଲେଞ୍ଜ ଖେଳାଯିବ। ଏହି ଟୁର୍ଣ୍ଣାମେଣ୍ଟରେ ଟ୍ରେଲବ୍ଲେଜର୍ସ ବ୍ୟତୀତ ସୁପରନୋଭାସ ଓ ଭେଲୋସିଟି ଦଳ ମଧ୍ୟ ଭାଗ ନେବେ। ସୁପରନୋଭାସର ଅଧିନାୟକ ଭାବେ ହରମନପ୍ରୀତ କୌର ନିଯୁକ୍ତ ହୋଇଥିବା ବେଳେ ଭେଲୋସିଟିର କମାଣ ସମ୍ଭାଳିବେ ଅଲରାଉଣ୍ଡର ଦୀପ୍ତି ଶର୍ମା।

ଭାରତୀୟ ଖେଳାଳିଙ୍କ ବ୍ୟତୀତ ଦକ୍ଷିଣ ଆଫ୍ରିକା, ଇଂଲଣ୍ଡ, ୱେଷ୍ଟଇଣ୍ଡିଜ ଓ ଅଷ୍ଟ୍ରେଲିଆର ୧୨ ଜଣ ଖେଳାଳି ମଧ୍ୟ ମହିଳା ଟି-୨୦ ଚ୍ୟାଲେଞ୍ଜ ଖେଳିବେ। ସର୍ବ ଭାରତୀୟ ମହିଳା ଚୟନ କମିଟି ପ୍ରତିଟି ଦଳରେ ୧୬ ଜଣ ଖେଳାଳିଙ୍କୁ ସ୍ଥାନ ଦେଇଛି। ମେ’ ୨୩ର ଉଦଘାଟନୀ ମ୍ୟାଚ୍‌ରେ ଟ୍ରେଲବ୍ଲେଜର୍ସ ଓ ସୁପରନୋଭାସ ମୁହାଁମୁହିଁ ହେବେ। ୨୪ ତାରିଖରେ ସୁପରନୋଭାସ ପ୍ରତିପକ୍ଷ ଭେଲୋସିଟି ସହ ମ୍ୟାଚ୍‌ ଖେଳିବ। ୨୬ ତାରିଖରେ ଭେଲୋସିଟି ସ୍ମୃତି ମନ୍ଧାନାଙ୍କ ଟ୍ରେଲବ୍ଲେଜର୍ସକୁ ଭେଟିବ। ଶେଷରେ ମେ’ ୨୮ରେ ଫାଇନାଲ ମ୍ୟାଚ୍‌ ଖେଳାଯିବ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।