ଦିବା-ରାତ୍ର ଟେଷ୍ଟ ନେଇ ଇସିବି ଓ ସିଏ ସହ ଆଲୋଚନା କରିବ ବିସିସିଆଇ

ନୂଆଦିଲ୍ଲୀ: ଦିବା-ରାତ୍ର ଟେଷ୍ଟ ନେଇ ଭାରତର ଅନୁରୋଧକୁ ନ୍ୟୁଜିଲାଣ୍ଡ ମନା କରିବା ପରେ ବିସିସିଆଇ ଇଂଲଣ୍ଡ ଏବଂ ୱେଲ୍ସ କ୍ରିକେଟ ବୋର୍ଡ (ଇସିବି) ଓ କ୍ରିକେଟ ଅଷ୍ଟ୍ରେଲିଆ (ସିଏ) ସହ ଆଲୋଚନା କରିବାକୁ ସ୍ଥିର କରିଛି। ଆସନ୍ତା ବର୍ଷ ଭାରତୀୟ ଟିମ୍‌ର ଏହି ଦୁଇ ଦେଶ ଗସ୍ତ ବେଳେ ଆଲୋଚନା କରାଯିବ।

ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି,“ଗୋଲାପୀ ବଲ୍‌ରେ ଭାରତରେ ଦିବାରାତ୍ର ମ୍ୟାଚ୍‌ ଖେଳିବା ନେଇ ନ୍ୟୁଜିଲାଣ୍ଡ ଆଗ୍ରହ ପ୍ରକାଶ କରିନାହିଁ। ତେଣୁ ବିସିସିଆଇ ଇସିବି ଓ ସିଏ ସହ ଏନେଇ ଆଲୋଚନା କରିବ। ନ୍ୟୁଜିଲାଣ୍ଡ ଅଷ୍ଟ୍ରେଲିଆ ବିପକ୍ଷରେ ପ୍ରଥମ ଦିବା-ରାତ୍ର ଟେଷ୍ଟ ମ୍ୟାଚ୍‌ ଖେଳିଥିଲା। କିନ୍ତୁ ଏହି ମ୍ୟାଚ୍‌ରେ ନ୍ୟୁଜିଲାଣ୍ଡ ଦଳର ବ୍ୟାଟିଂ ଓ ବୋଲିଂରେ ଲୟ ପାଇ ନ ଥିଲା। ଏହି ଦୃଷ୍ଟିକୋଣରୁ ଦଳ ମନା କରି ଥାଇପାରେ।”

ଏହି ଦିବାରାତ୍ର ଟେଷ୍ଟ ମ୍ୟାଚ୍‌ କୋଲକାତାର ଇଡେନ୍‌ ଗାର୍ଡନ୍‌ କିମ୍ବା ମୁମ୍ବାଇର ୱେଙ୍ଖଡେ ଷ୍ଟାଡିୟମରେ ଖେଳାଯିବାର ସମ୍ଭାବନା ରହିଛି।