ଅଷ୍ଟ୍ରେଲିଆକୁ ଝଟ୍‌କା ପରେ ବର୍ଷା ଦେଇଛି ବାଧା

ଆଜିଠୁ ଆରମ୍ଭ ହୋଇଛି ତୃତୀୟ ଟେଷ୍ଟ୍। ଟିମ୍ ଇଣ୍ଡିଆରେ ହୋଇଛି ଦୁଇଟି ପରିବର୍ତ୍ତନ।

ସିଡ୍‌ନୀ: ଭାରତ ଓ ଅଷ୍ଟ୍ରେଲିଆ ମଧ୍ୟରେ ଖେଳା ଯାଉଥିବା ଟେଷ୍ଟ୍ ସିରିଜ୍‌ର ତୃତୀୟ ମ୍ୟାଚ୍ ଆଜିଠାରୁ ସିଡ୍‌ନୀରେ ଆରମ୍ଭ ହୋଇଛି। ତେବେ ଆଜିର ମ୍ୟାଚ୍‌ରେ ବର୍ଷା ବାଧକ ସାଜିଛି। ତେଣୁ ମାତ୍ର ୭.୧ ଓଭର ପରେ ଖେଳ ବନ୍ଦ ରହିଛି।

ଟସ୍‌ ଜିତି ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ୱିଲ୍ ପକ୍‌ଭସ୍କି ଓ ଡାଭିଡ ୱାର୍ଣ୍ଣର ଓପନିଂ କରିବାକୁ ଆସିଥିଲେ। ହେଲେ ୱାର୍ଣ୍ଣର ଶୀଘ୍ର ଆଉଟ ହୋଇଯାଇଥିଲେ। ମାତ୍ର ୮ଟି ବଲ୍‌ର ସମ୍ମୁଖୀନ ହୋଇଥିବା ୱାର୍ଣ୍ଣର ୩.୩ ଓଭରରେ ଆଉଟ୍ ହୋଇଯାଇଥିଲେ। ମହମ୍ମଦ ସିରାଜଙ୍କ ବଲ୍‌ରେ ସେ ଚେତେଶ୍ୱର ପୂଜାରାଙ୍କ ଦ୍ୱାରା କ୍ୟାଚ୍ ଆଉଟ୍ ହୋଇଥିଲେ। ସେ ୫ କରି ଥିଲେ।

ୱାର୍ଣ୍ଣର ଆଉଟ୍ ହେବା ପରେ ମାରନସ୍ ଲବୁସାନ୍‌ କ୍ରିଜ୍‌କୁ ଆସିଥିଲେ। ତେବେ ବର୍ଷା ଯୋଗୁ ୭.୧ ଓଭର ଠାରୁ ଆଉ ଖେଳ ଆରମ୍ଭ ହୋଇପାରି ନାହିଁ। ୱିଲ୍‌ ୨୯ଟି ବଲ୍‌ରୁ ୧୪ ରନ୍ କରିଥିବା ବେଳେ ଲବୁସାନ ୬ଟି ବଲ୍‌ରୁ ୨ ରନ୍ କରି ଅପରାଜିତ ଅଛନ୍ତି।

ଭାରତ ପକ୍ଷରୁ ଯଶପ୍ରୀତ୍ ବୁମ୍ରା ୪ ଓଭର ବୋଲିଂ କରି ୭ ରନ୍ ଦେଇଛନ୍ତି। ମହମ୍ମଦ ସିରାଜ ୩.୧ ଓଭର ବୋଲିଂ କରିଛନ୍ତି ଏବଂ ୧୪ ରନ୍ ବ୍ୟୟରେ ଗୋଟିଏ ୱିକେଟ୍ ହାସଲ କରିଛନ୍ତି।

ସିଡ୍‌ନୀ ଟେଷ୍ଟ୍ ପାଇଁ ଭାରତୀୟ ଟିମ୍‌ରେ ଦୁଇଟି ପରିବର୍ତ୍ତନ ହୋଇଛି। ରୋହି ଶର୍ମା ଟିମ୍‌ରେ ସାମିଲ ହୋଇଛନ୍ତି। ମୟଙ୍କ ଅଗ୍ରୱାଲଙ୍କୁ ବାଦ୍ ଦିଆଯାଇ ତାଙ୍କୁ ସାମିଲ କରାଯାଇଛି। ସେହିପରି ନବଦୀପ ସୈନୀ ଟେଷ୍ଟ୍ ପଦାର୍ପଣ କରିଛନ୍ତି। ଆହତ ଉମେଶ ଯାଦବଙ୍କ ସ୍ଥାନରେ ତାଙ୍କୁ ସାମିଲ କରାଯାଇଛି।

ସୂଚନାଯୋଗ୍ୟ, ୪ଟି ମ୍ୟାଚ୍ ବିଶିଷ୍ଟ ଏହି ସିରିଜ୍‌ର ପ୍ରଥମ ମ୍ୟାଚ୍ ଅଷ୍ଟ୍ରେଲିଆ ଜିତିଥିଲା। କିନ୍ତୁ ଦ୍ୱିତୀୟ ମ୍ୟାଚ୍‌ରେ ଭାରତ ବିଜୟୀ ହୋଇଥିଲା। ସିରିଜ୍‌ର ଶେଷ ମ୍ୟାଚ୍‌ ଜାନୁଆରୀ ୧୫ ତାରିଖରୁ ଆରମ୍ଭ ହେବ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।