ଆଜି ଥିଲା ତୃତୀୟ ଟେଷ୍ଟର ତୃତୀୟ ଦିନ। ଗତକାଲିଠାରୁ ୨୮ ରନ୍ କରିଥିବା ନ୍ୟୁଜିଲାଣ୍ଡ ଦଳ ଆଜି ପାଳିକୁ ଆଗେଇ ନେବା ପାଇଁ ପଡ଼ିଆକୁ ଓହ୍ଲାଇଥିଲେ ମାର୍ଟିନ ଗପ୍ଟିଲ୍ ଓ ଟମ୍ ଲାଥାମ୍। ଉଭୟ ଇନିଂସ୍କୁ ସୁରୁଖୁରୁରେ ଆଗେଇ ନେଉଥିଲେ। କିନ୍ତୁ ୩୪.୨ ଓଭରରେ ଲାଥାମ୍ଙ୍କ ୱିକେଟ୍ ପଡ଼ିଥିଲା। ସେ ୫୩ ରନ୍ କରି ଅଶ୍ୱିନଙ୍କ ଦ୍ୱାରା ଆଉଟ୍ ହୋଇଥିଲେ। ଦଳୀୟ ସ୍କୋର ୧୨୯ ହୋଇଥିବା ବେଳେ ପଡ଼ି ଥିଲା ଦ୍ୱିତୀୟ ୱିକେଟ୍। ୮ ରନ୍ କରି ଆଉଟ୍ ହୋଇଥିଲେ କେନ୍ ୱିଲିୟମସନ୍। ସେ ଅଶ୍ୱିନଙ୍କ ଏକ ବଲ୍ରେ ବୋଲ୍ଡ ହୋଇଥିଲେ। ତାଙ୍କ ପରେ ଆସିଥିବା ରସ୍ ଟେଲର ଶୂନ୍ରେ ଆଉଟ୍ ହୋଇଥିଲେ। କ୍ରିଜ୍ରେ ଜମି ସାରିଥିବା ମାର୍ଟିନ୍ ଗପ୍ଟିଲ୍ ୭୨ ରନ୍ କରି ରନ୍ ଆଉଟ୍ ହୋଇଥିଲେ। ଅଶ୍ୱିନ ତାଙ୍କୁ ରନ୍ ଆଉଟ୍ କରି ଥିଲେ। ସେତେବେଳେ ଦଳୀୟ ସ୍କୋର ୧୪୩ ରନ୍ ହୋଇଥିଲା। ଲ୍ୟୁକ୍ ରୋଞ୍ଚି ଶୂନ ରନ୍ କରି ଆଉଟ୍ ହୋଇଥିଲେ। ଜିମ୍ମି ନୀଶାମ ୭୧ ରନ୍ କରି ଅଶ୍ୱିନଙ୍କ ଦ୍ୱାରା ଏଲ୍ବିଡବ୍ଲ୍ୟୁ ହୋଇଥିଲେ। ୱାଲଟିଂ ୨୩ ଓ ମିଚେଲ୍ ସାଣ୍ଟନର ୨୨ ରନ୍ କରି ଥିଲେ। ଜୀତନ ପଟେଲ ୧୮ ରନ୍ କରି ଆଉଟ୍ ହୋଇଥିବା ବେଳେ ଓ ମାଟ୍ଟ ହନରୀ ୧୫ ରନ୍ କରି ଅପରାଜିତ ଥିଲେ।
ଏହି ଟେଷ୍ଟର ପ୍ରଥମ ଇନିଂସରେ ଭାରତ ୫ ୱିକେଟ୍ ହରାଇ ୫୫୭ ରନ୍ କରିଛି। ଏତିକିରେ ଦଳ ପାଳି ଘୋଷଣା କରିଥିଲା। ବିରାଟ କୋହଲି ଦ୍ୱିଶତ କରିଥିବା ବେଳେ ରାହାଣେ ୧୮୮ ରନ୍ କରି ଅଳ୍ପକେ ଦ୍ୱିଶତକୁ ବଞ୍ଚିତ ହୋଇଥିଲେ। କୋହଲି ୩୬୬ଟି ବଲ୍ରୁ ୨୦ଟି ଚୌକା ସହାୟତାରେ ୨୧୧ ରନ୍ କରିଥିଲେ। ରାହାଣେ ୧୮ଟି ଚୌକା ଓ ୪ଟି ଛକା ସହାୟତାରେ ୧୮୮ ରନ୍ କରିଥିଲେ। ରୋହିତ ଶର୍ମା ୬୩ ବଲ୍ରୁ ୩ଟି ଚୌକା ଓ ୨ଟି ଛକା ସହାୟତାରେ ୫୧ ରନ୍ କରି ଅପରାଜିତ ରହିଥିଲେ।