ମୁମ୍ୱାଇ କ୍ରିକେଟର ହିକେନ୍ ଶାହ ସସପେଣ୍ଡ

ମୁମ୍ବାଇ: ବିସିସିଆଇର ଦୁର୍ନୀତି ବିରୋଧୀ ନିୟମକୁ ଉଲ୍ଲଂଘନ କରିବା ଅଭିଯୋଗରେ ମୁମ୍ୱାଇର କ୍ରିକେଟର ହିକେନ୍ ଶାହ ସସପେଣ୍ଡ ହୋଇଛନ୍ତି। ବିସିସିଆଇ ପକ୍ଷରୁ ଜାରି ବିବୃତିରେ କୁହାଯାଇଛି ଯେ ମୁମ୍ୱାଇ ବ୍ୟାଟସମ୍ୟାନ୍ ହିକେନ୍ ତାଙ୍କ ସହ ପ୍ରଥମ ଶ୍ରେଣୀ କ୍ରିକେଟ ଖେଳୁଥିବା ଜଣେ ସାଥୀ କ୍ରିକେଟରଙ୍କୁ ଦୁର୍ନୀତି କରିବାକୁ କହିଥିଲେ। ଉକ୍ତ କ୍ରିକେଟର ଏକ ଆଇପିଏଲ୍ ଟିମ ପାଇଁ ମଧ୍ୟ ଖେଳିଛନ୍ତି। ଏବର୍ଷର ଆଇପିଏଲ ସିଜନ ପୂର୍ବରୁ ଶାହ ଏହି ଉଦ୍ୟମ କରିଥିଲେ। ଏସମ୍ପର୍କରେ ଜାଣିବା ପରେ ସମ୍ପୃକ୍ତ ଖେଳାଳିଙ୍କ ଆଇପିଏଲ୍ ଟିମ୍ ତୁରନ୍ତ ବିସିସିଆଇର ଆଣ୍ଟି କରପସନ୍ ୟୁନିଟକୁ ଜଣାଇଥିଲେ। ପରେ ଆଣ୍ଟି କରପସନ୍ ୟୁନିଟ ଏହାର ତଦନ୍ତ କରି ହିକେନ୍ ଶାହଙ୍କୁ ଦୋଷୀ ସାବ୍ୟସ୍ତ କରିଥିଲେ। ହିକେନଙ୍କ ବିରୋଧରେ କ’ଣ କାର୍ଯ୍ୟାନୁଷ୍ଠାନ ନିଆଯିବ ସେ ନିଷ୍ପତ୍ତି ନେବ ବିସିସିଆଇ ଶୃଙ୍ଖଳା କମିଟି। ଶାହ ହେଉଛନ୍ତି ମୁମ୍ୱାଇର ଦ୍ୱିତୀୟ ଖେଳାଳି ଯାହାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି। ଆଇପିଏଲ୍ ସ୍ପଟ୍ ଫିକ୍ସିଂରେ ସମ୍ପୃକ୍ତି ଅଭିଯୋଗରେ ସ୍ପିନର ଅଙ୍କିତ ଚଭନଙ୍କୁ ବ୍ୟାନ କରାଯାଇଛି।