ନରସିଂହଙ୍କୁ କ୍ଲିନ୍‌ଚିଟ୍‌

ନୂଆଦିଲ୍ଲୀ: ଡୋପିଂ ମାମଲାରେ କୁସ୍ତିଯୋଦ୍ଧା ନରସିଂହ ଯାଦବଙ୍କୁ ଆଜି କ୍ଲିନ୍‌ଚିଟ୍‌ ଦେଇଛି ଜାତୀୟ ଆଣ୍ଟି ଡୋପିଂ ଏଜେନ୍ସୀ (ନାଡା)। ଜୁଲାଇ ୨୪ରେ ଡୋପ୍‌ ଟେଷ୍ଟର ୨ଟି ଯାକ ରିପୋର୍ଟରେ ବିଫଳ ହୋଇଥିଲେ ନରସିଂହ। ଫଳରେ ୫ ତାରିଖରୁ ବ୍ରାଜିଲର ରିଓ ଡି ଜେନେରିଓରେ ହେବାକୁ ଥିବା ଅଲିମ୍ପିକ୍‌ରେ ଭାରତ ପକ୍ଷରୁ ଭାଗ ନେବା ନେଇ ଆଶଙ୍କା ଦେଖା ଦେଇଥିଲା। କିନ୍ତୁ ଆଜି ନାଡାର ଏହି ରାୟ ପରେ ପୁଣି ଥରେ ନରସିଂହଙ୍କ ରିଓ ଅଲିମ୍ପିକ୍‌କୁ ଯିବା ଆଶା ଉଜ୍ଜ୍ୱଳ ହୋଇଛି। ତେବେ ନରସିଂହଙ୍କ ଶରୀରରେ କିଭଳି ନିଷିଦ୍ଧ ଔଷଧ ଆସିଲା ତାହା ସ୍ପଷ୍ଟ ହୋଇନାହିଁ। ଏ ମାମଲାରେ ନରସିଂହ ଷଡଯନ୍ତ୍ରର ଶିକାର ହୋଇଥିବା ସ୍ୱୀକାର କରିଛନ୍ତି ନାଡାର କିଛି ବରିଷ୍ଠ ଅଧିକାରୀ। ତାଙ୍କ ଖାଦ୍ୟରେ କେହି ଜାଣିଶୁଣି ନିଷିଦ୍ଧ ଔଷଧ ମିଶାଇ ଦେଇଥିବା ଅଭିଯୋଗ ହୋଇଥିଲା। ହେଲେ ଏହି ମାମଲାରେ କାହାରିଙ୍କୁ ଗିରଫ କରାଯାଇନାହିଁ।