ନୂଆଦିଲ୍ଲୀ: ଟୋକିଓରେ ଚାଲିଥିବା ଅଲିମ୍ପିକ୍ ଟେଷ୍ଟ ଇଭେଣ୍ଟରେ ଭାରତୀୟ ଷ୍ଟାର୍ ବକ୍ସର ଶିବ ଥାପ୍ପା (୬୩ କେଜି) ସେମିଫାଇନାଲରେ ପହଞ୍ଚି ପଦକ ପକ୍କା କରିଛନ୍ତି। ଶିବଙ୍କ ବ୍ୟତୀତ ଭାରତର ୬ଜଣ ବକ୍ସର ମଧ୍ୟ ଅନ୍ତିମ-୪ରେ ସ୍ଥାନ ପକ୍କା କରିଛନ୍ତି।
ଥାପା କ୍ୱାର୍ଟରଫାଇନାଲରେ ଜାପାନର ୟୁକି ହିରାକାୱାଙ୍କୁ ସିଧାସଳଖ ୫-୦ ପଏଣ୍ଟରେ ହରାଇ ପଦକ ରାଉଣ୍ଡରେ ପ୍ରବେଶ କରିଛନ୍ତି। ଆସାମର ଏହି ବକ୍ସର ଚଳିତମାସରେ ନିଜର ତୃତୀୟ ଜାତୀୟ ଟାଇଟଲ୍ ଜିତିଥିଲେ। ସେମିରେ ଶିବଙ୍କ ସାମ୍ନା ଜାପାନର ଡାଇସୁକ୍ ନାରିମାତସୁଙ୍କୁ ଭେଟିବ, ଯିଏ ନିଜର ପ୍ରଥମ ରାଉଣ୍ଡରେ ବାଏ ପାଇଥିଲେ।
ତେବେ ଅନ୍ୟ ଭାରତୀୟଙ୍କ ମଧ୍ୟରେ ପୂର୍ବତନ ଜୁନିୟର ୱାର୍ଲ୍ଡ ଚାମ୍ପିୟନ୍ ନିଖତ୍ ଜରୀନ୍ (୫୧ କେଜି) ମଧ୍ୟ ଭାରତ ପାଇଁ ପଦକ ନିଶ୍ଚିତ କରିଛନ୍ତି। ଜରୀନଙ୍କ ବ୍ୟତୀତ ଏସିଆନ୍ ଗେମ୍ସ ରୌପ୍ୟ ପଦକ ବିଜେତା ସୁମିତ୍ ସାଙ୍ଗୱାନ୍ (୯୧ କେଜି), ଆଶିଷ (୬୯ କେଜି), ଭାନିମପୁଇୟା (୭୫ କେଜି), ସିମରନଜିତ୍ କୌର୍ (୬୦ କେଜି) ଓ ପୂଜା ରାନୀ (୭୫ କେଜି) ସେମିଫାଇନାଲରେ ସ୍ଥାନ ହାସଲ କରିଛନ୍ତି।