ବ୍ରିଜଟାଉନ୍: ଶେଲଡନ୍ କଟ୍ଟରେଲଙ୍କ ଛକା ବଳରେ ୱେଷ୍ଟଇଣ୍ଡିଜ୍ ଗୁରୁବାର ରାତିରେ କେନିଙ୍ଗଟନ୍ ଓଭାଲରେ ଖେଳାଯାଇଥିବା ଦ୍ୱିତୀୟ ଦିନିକିଆରେ ଆୟର୍ଲ୍ୟାଣ୍ଡକୁ ୧ ୱିକେଟରେ ହରାଇ ରୋମାଞ୍ଚକର ବିଜୟ ହାସଲ କରିଛି। ଏହି ବିଜୟ ସହ ୱେଷ୍ଟଇଣ୍ଡିଜ୍ ତିନିମ୍ୟାଚ୍ ବିଶିଷ୍ଟ ଦିନିକିଆ ସିରିଜକୁ ୨-୦ରେ ଜିତି ନେଇଛି। ମଙ୍ଗଳବାର ପ୍ରଥମ ଦିନିକିଆକୁ ଇଣ୍ଡିଜ୍ ୫ ୱିକେଟରେ ଜିତିଥିଲା। କଟ୍ଟରେଲ୍ (୭*) ୪୯ତମ ଓଭରର ପଞ୍ଚମ ବଲରେ ମାର୍କ ଆଡେରଙ୍କୁ କଭରରେ ଛକା ମାରି ବିଜୟୀ ରନ୍ କରିଥିଲେ, ଯାହା ବଳରେ ଇଣ୍ଡିଜ୍ ୪୯.୫ ଓଭରରେ ୯ ୱିକେଟ୍ ହରାଇ ୨୪୨ ରନ୍ କରି ବିଜୟୀ ହୋଇଥିଲା।
କଟ୍ଟରେଲଙ୍କ ବ୍ୟତୀତ ହେଡେନ୍ ୱାଲ୍ସ ନିଜର ସପ୍ତମ ମ୍ୟାଚରେ କ୍ୟାରିୟରର ସର୍ବଶ୍ରେଷ୍ଠ ଅପରାଜିତ ୪୬ ରନର ଇନିଂସ୍ ଖେଳିଥିଲେ। ଅନ୍ୟମାନଙ୍କ ମଧ୍ୟରେ ନିକୋଲାସ ପୁରନ୍ ସର୍ବାଧିକ ୫୨ (୪୪ ବଲ୍, ୬ ଚୌକା), କ୍ୟାପଟେନ୍ କାଇରନ୍ ପୋଲାର୍ଡ ୪୦ (୩୨ ବଲ୍, ୧ ଚୌକା, ୪ ଛକା), ଶାଇ ହୋପ୍ ୨୫, ଖାରୀ ପିଏରୀ ୧୮ ଓ ଅଲଜାରି ଜୋସେଫ୍ ୧୬ ରନ୍ କରି ଆଉଟ୍ ହୋଇଥିଲେ। ଆୟର୍ଲ୍ୟାଣ୍ଡ୍ ପକ୍ଷରୁ ସିମି ସିଂହ ୩ଟି, ଆଣ୍ଡି ମ୍ୟାକବ୍ରାଇନ୍ ଓ ମ୍ୟାକକାର୍ଥି ୨ଟି ଲେଖାଏ ୱିକେଟ୍ ହାସଲ କରିଥିଲେ।
ପୂର୍ବରୁ ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭ୍ରମଣକାରୀ ଆୟର୍ଲ୍ୟାଣ୍ଡ୍ ୫୦ ଓଭରରେ ୯ ୱିକେଟ୍ ହରାଇ ୨୩୭ ରନ୍ କରିଥିଲା। ଦଳ ପକ୍ଷରୁ ଓପ୍ନର ପଲ୍ ଷ୍ଟର୍ଲିଙ୍ଗ୍ ସର୍ବାଧିକ ୬୩ ରନ୍ କରିଥିବା ବେଳେ ସିମି ସିଂହ ୩୪, କେଭିନ୍ ଓ'ବ୍ରାଏନ୍ ୩୧, ୱିଲିୟମ୍ ପୋର୍ଟରଫିଲ୍ଡ ୨୯, ଗ୍ୟାରେଥ୍ ଡେଲାନୀ ୧୪ ଓ ବ୍ୟାରୀ ମ୍ୟାକକାର୍ଥି ଅପରାଜିତ ୧୭ ରନ୍ କରିଥିଲେ। ଇଣ୍ଡିଜ୍ ପକ୍ଷରୁ ଅଲଜାରୀ ଜୋସେଫ୍ ପୁଣିଥରେ ଚମତ୍କାର ପ୍ରଦର୍ଶନ କରିଥିଲେ ଏବଂ ୩୨ ରନ୍ ଦେଇ ୪ଟି ୱିକେଟ୍ ପାଇଥିଲେ। ସେହିପରି କଟ୍ଟରେଲ୍ ୩ଟି ୱିକେଟ୍ ନେଇଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
