ସାଉଥ୍ ଏସିଆନ୍ ଗେମ୍ସ: ୧୫୦୦ ମିଟରରେ ଭାରତକୁ ୪ ପଦକ

କାଠମାଣ୍ଡୁ: ଚଳିତ ୧୩ଶ ସାଉଥ୍ ଏସିଆନ୍ ଗେମ୍ସରେ ଭାରତୀୟ ଆଥଲେଟ୍ସଙ୍କ ଦମଦାର ପ୍ରଦର୍ଶନ ଜାରି ରହିଛି। ମଙ୍ଗଳବାର ଭାରତୀୟ ଆଥଲେଟ୍ସ ୧୫୦୦ ମିଟର୍ ଦୌଡ଼ରେ ଚାରୋଟି ପଦକ ଜିତିଛନ୍ତି। ଭାରତୀୟ ଆଥଲେଟ୍ସ ପୁରୁଷ ୧୫୦୦ ମିଟରରେ ଗୋଟିଏ ସ୍ୱର୍ଣ୍ଣ ଓ ଗୋଟିଏ ରୌପ୍ୟ ପଦକ ଜିତିଥିବା ବେଳେ ମହିଳା ୧୫୦୦ ମିଟରରେ ଗୋଟିଏ ରୌପ୍ୟ ଏବଂ ଗୋଟିଏ ବ୍ରୋଞ୍ଜ ପଦକ ଜିତିଛନ୍ତି।

ଭାରତର ଅଜୟ କୁମାର ସାରୋ ପୁରୁଷ ୧୫୦୦ ମିଟର୍ ଦୂରତାକୁ ୩:୫୪.୧୮ ସେକେଣ୍ଡରେ ଅତିକ୍ରମ କରି ସ୍ୱର୍ଣ୍ଣ ପଦକ କବଜା କରିଥିବା ବେଳେ ଅଜିତ୍ କୁମାର ୩:୫୭.୧୮ ସେକେଣ୍ଡରେ ରୌପ୍ୟ ପଦକ ଜିତିଛନ୍ତି। ଏହି ଇଭେଣ୍ଟରେ ନେପାଳର ଟାଙ୍କା କାର୍କି ବ୍ରୋଞ୍ଜ ପଦକ ଜିତିଛନ୍ତି।

ମହିଳା ୧୫୦୦ ମିଟରରେ ଭାରତର ଚନ୍ଦା ୪:୩୪.୫୧ ସେକେଣ୍ଡରେ ନିର୍ଦ୍ଧାରିତ ଦୂରତାକୁ ଅତିକ୍ରମ କରି ରୌପ୍ୟ ଏବଂ ଚିତ୍ରା ପାଲାକୀଜ୍ ୪:୩୫.୪୬ ସେକେଣ୍ଡରେ ବ୍ରୋଞ୍ଜ ପଦକ ହାସଲ କରିଛନ୍ତି। ଏହି ଇଭେଣ୍ଟରେ ଶ୍ରୀଲଙ୍କାର ଉଦା କୁବୁରାଲାଗେ (୪:୩୪.୩୪ ସେକେଣ୍ଡ) ସ୍ୱର୍ଣ୍ଣ ପଦକ ଜିତିଛନ୍ତି। ଏହି ଚାମ୍ପିୟନଶିପରେ ଭାରତ ଏପର୍ଯ୍ୟନ୍ତ ମୋଟ ୨୧ (୬ ସ୍ୱର୍ଣ୍ଣ, ୧୧ ରୌପ୍ୟ, ୪ ବ୍ରୋଞ୍ଜ) ପଦକ ଜିତିସାରିଛି। ପଦକ ଜିତିବା ମାମଲାରେ ଭାରତ ନେପାଳ (୨୮ ପଦକ) ପରକୁ ଦ୍ୱିତୀୟରେ ରହିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।