ନୂଆଦିଲ୍ଲୀ: ଅଷ୍ଟ୍ରେଲିଆରେ ଏବେ ଗାଭାସ୍କର-ବର୍ଡର ଟ୍ରଫି ପାଇଁ ଚାରିଟି ମ୍ୟାଚ୍ ବିଶିଷ୍ଟ ଟେଷ୍ଟ୍ ସିରିଜ୍ ଖେଳା ଯାଉଛି। ଅଷ୍ଟ୍ରେଲିଆ ଓ ଭାରତ ମଧ୍ୟରେ ଖେଳାଯାଉଥିବା ଏହି ସିରିଜ୍ର ତିନିଟି ମ୍ୟାଚ୍ ସରିଥିବା ବେଳେ ଆସନ୍ତାକାଲି (ଗୁରୁବାର)ଠାରୁ ସିଡ୍ନୀରେ ଆରମ୍ଭ ହେବ ଚତୁର୍ଥ ତଥା ଅନ୍ତିମ ମ୍ୟାଚ୍। ସିରିଜ୍ରେ ଭାରତ ୨-୧ରେ ଆଗୁଆ ରହିଛି ଓ ଶେଷ ମ୍ୟାଚ୍କୁ ଜିତିବା ପାଇଁ ଦଳ ଲକ୍ଷ୍ୟ ରଖିଛି।
ଅଷ୍ଟ୍ରେଲିଆ ଓ ଭାରତର ଦୁଇ ମହାନ ଖେଳାଳି ଆଲାନ୍ ବର୍ଡର ଓ ସୁନୀଲ ଗାଭାସ୍କରଙ୍କ ନାଁରେ ୧୯୯୬/୯୭ରୁ ଆରମ୍ଭ ହୋଇଥିଲା ଗାଭାସ୍କର-ବର୍ଡର ଟ୍ରଫି। ତେବେ ଚଳିତ ଥର ଏହି ଟ୍ରଫି ପାଇଁ ସୁନୀଲ ଗାଭାସ୍କରଙ୍କୁ ଅଷ୍ଟ୍ରେଲିଆକୁ ଆମନ୍ତ୍ରଣ କରାଯାଇନାହିଁ। ଏଣୁ ସେ ଗାଭାସ୍କର-ବର୍ଡର ଟ୍ରଫି ପ୍ରଦାନ ଉତ୍ସବରେ ସାମିଲ ହୋଇ ନ ପାରନ୍ତି।
ଗାଭାସ୍କର ‘ଇଣ୍ଡିଆ ଟୁଡେ’କୁ କହିଛନ୍ତି,“କ୍ରିକେଟ୍ ଅଷ୍ଟ୍ରେଲିଆର ମୁଖ୍ୟ କାର୍ଯ୍ୟକାରୀ ଜେମ୍ସ ସଦରଲ୍ୟାଣ୍ଡ ଗତ ମେ’ ମାସରେ ମୋ ପାଖକୁ ଏକ ଚିଠି ଲେଖି ଗାଭାସ୍କର-ବର୍ଡର ଟ୍ରଫି ପ୍ରଦାନ କରିବା ନେଇ ଉପସ୍ଥିତ ରହିପାରିବି କି ନାହିଁ ପଚାରିଥିଲେ। ମୁଁ ଯିବା ପାଇଁ ଚାହୁଁଥିଲି। କିନ୍ତୁ ସେ ଇସ୍ତଫା ଦେବା ପରେ ମୋ ସହିତ କ୍ରିକେଟ୍ ଅଷ୍ଟ୍ରେଲିଆ ପକ୍ଷରୁ କେହି ଯୋଗାଯୋଗ କରି ନାହାନ୍ତି।”
ଗାଭାସ୍କର-ବର୍ଡର ଟ୍ରଫିରେ ଏଯାବତ ଭାରତ ଓ ଅଷ୍ଟ୍ରେଲିଆ ମଧ୍ୟରେ ୧୪ଟି ସିରିଜ୍ (ଏଥରକୁ ମିଶାଇ) ଖେଳା ଯାଇଛି। ଏଥିରୁ ୭ ଥର ଭାରତ ବାଜି ମାରିଥିବା ବେଳେ ଅଷ୍ଟ୍ରେଲିଆ ୫ ଥର ଜିତିଛି। ଗୋଟିଏ ଥର ସିରିଜ୍ ଡ୍ର’ ହୋଇଛି। ଚଳିତ ସିରିଜ୍ରେ ଭାରତ ୨-୧ରେ ଆଗୁଆ ରହିଛି। ତେବେ ଅଷ୍ଟ୍ରେଲିଆରେ ଟିମ୍ ଇଣ୍ଡିଆ କେବେ ବି ଏହି ସିରିଜ୍ ଜିତି ନାହିଁ। କିନ୍ତୁ ୨୦୦୪ରେ ଅଷ୍ଟ୍ରେଲିଆ ଭାରତ ମାଟିରେ ଏହି ସିରିଜ୍ ଜିତିଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
