ଦୁବାଇ: ସଦ୍ୟ ପ୍ରକାଶିତ ଆଇସିସି ଟେଷ୍ଟ ମାନ୍ୟତାର ଶୀର୍ଷରେ ଥିବା ଅଷ୍ଟ୍ରେଲିଆ (୧୦୮ ରେଟିଂ)କୁ ତୃତୀୟ ସ୍ଥାନକୁ ଖସାଇ ପ୍ରଥମ ସ୍ଥାନ ଅଧିକାର କରିଛି ଟିମ୍ ଇଣ୍ଡିଆ (୧୧୨ ରେଟିଂ)। ଦ୍ୱିତୀୟ ସ୍ଥାନ ଅଧିକାର କରିଛି ପାକିସ୍ତାନ (୧୧୧ ରେଟିଂ)।
ୱେଷ୍ଟ ଇଣ୍ଡିଜ୍ ବିପକ୍ଷ ଚତୁର୍ଥ ଟେଷ୍ଟ ମ୍ୟାଚ୍ରେ ଭାରତ ବୃହତ ବିଜୟ ହାସଲ କଲେ ପ୍ରଥମ ସ୍ଥାନରେ ବେଶୀ ଦିନ ରହି ପାରିବ। ଭାରତ ୩-୦ରେ ଏହି ସିରିଜ୍ ଜିତିଲେ ଦୀର୍ଘ ଦିନ ଧରି ଆଇସିସି ମାନ୍ୟତାର ଶୀର୍ଷ ସ୍ଥାନରେ ରହିବା ଆଶା କରାଯାଉଛି। ଯଦି ଭାରତ ଏହି ମ୍ୟାଚ୍ ଡ୍ର ରଖେ ତେବେ ୧୧୦ ରେଟିଂ ସହ ଦ୍ୱିତୀୟ ସ୍ଥାନକୁ ଖସିବାକୁ ଥିବା ବେଳେ ପରାଜିତ ହେଲେ ୧୦୮ ରେଟିଂ ପଏଣ୍ଟ ସହ ତୃତୀୟ ସ୍ଥାନକୁ ଖସିଆସିବାର ଆଶଙ୍କା ରହିଛି।
୧୦୮ ରେଟିଂ ସହ ଇଂଲଣ୍ଡ ଚତୁର୍ଥ ସ୍ଥାନରେ, ୯୯ ରେଟିଂ ସହ ନ୍ୟୁଜିଲାଣ୍ଡ ୫ମ ସ୍ଥାନରେ, ୯୫ ରେଟିଂ ସହ ଶ୍ରୀଲଙ୍କା ୬ଷ୍ଠ ସ୍ଥାନରେ, ୯୨ ରେଟିଂ ସହ ଦକ୍ଷିଣ ଆଫ୍ରିକା ସପ୍ତମ ସ୍ଥାନରେ, ୬୫ ରେଟିଂ ସହ ଅଷ୍ଟମ ସ୍ଥାନରେ ୱେଷ୍ଟଇଣ୍ଡିଜ୍, ୫୭ ରେଟିଂ ସହ ବାଂଲାଦେଶ ନବମ ସ୍ଥାନରେ ଓ ୮ ପଏଣ୍ଟ ସହ ଦଶମ ସ୍ଥାନରେ ରହିଛି ଜିମ୍ବାୱେ।