ପୁରୀ(ଓଡ଼ିଶା ରିପୋର୍ଟର): ପୁରୀ ସମୁଦ୍ରରେ ଭାସିଗଲେ ୨ କ୍ରିକେଟ୍ ଖେଳାଳି। ଗାଧୋଇବା ବେଳେ ଭାସି ଯାଇ ନିଖୋଜ ହୋଇଯାଇଛନ୍ତି ସମ୍ବଲପୁର ବିଶ୍ୱବିଦ୍ୟାଳୟ କ୍ରିକେଟ ଟିମ୍ର ଦୁଇ ଖେଳାଳି। ଆଜି ଅପରାହ୍ନରେ ପୁରୀ ବେଳାଭୂମିର ଚୈତନ୍ୟ ଛକରେ ଘଟିଛି ଏହି ଘଟଣା।
ଭୁବନେଶ୍ୱରରେ ଏକ ଘରୋଇ ବିଶ୍ୱବିଦ୍ୟାଳୟ ଦ୍ୱାରା ଆୟୋଜିତ କ୍ରିକେଟ ଟୁର୍ଣ୍ଣାମେଣ୍ଟ ଖେଳିବା ପାଇଁ ସମ୍ବଲପୁର ବିଶ୍ୱବିଦ୍ୟାଳୟ କ୍ରିକେଟ ଟିମ୍ ଆସିଥିଲା। ତେବେ ଆଜି ବିଶ୍ରାମ ଦିବସ ଥିବାରୁ ଟିମ୍ର ୮ ଜଣ ଖେଳାଳି ପୁରୀ ବୁଲିବାକୁ ଯାଇଥିଲେ। ସେମାନଙ୍କ ମଧ୍ୟରୁ ୩ ଜଣ ବେଳାଭୂମିରେ ଗାଧୋଉଥିବା ବେଳେ ହଠାତ ବଡ଼ ଜୁଆର ଆସିବାରୁ ଭାସି ଯାଇଥିଲେ। ନିକଟରେ ଉପସ୍ଥିତ ଥିବା ଲାଇଫ ଗାର୍ଡ ଜଣଙ୍କୁ ଉଦ୍ଧାର କରିବାରେ ସକ୍ଷମ ହୋଇଥିଲେ। ତେବେ ଅନ୍ୟ ଦୁଇ କ୍ରିକେଟ ଖେଳାଳି ନିଖୋଜ ହୋଇଯାଇଛନ୍ତି। ସେମାନେ ହେଲେ ଆକାଶ ଖାକା ଓ ଯଦୁମଣି ବଚ୍ଚା। ନିଖୋଜ ଦୁଇ ଜଣଙ୍କୁ ଖୋଜିବା ଲାଗି ଉଦ୍ୟମ ଜାରି ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।