ରାଜ୍ୟଗୋଷ୍ଠୀ ଟିଟି: ପୁରୁଷ ଡବଲ୍ସରେ ବିକାଶ-ଆନ୍ଥୋନୀଙ୍କୁ ସ୍ୱର୍ଣ୍ଣ

କଟକ, (ଓଡ଼ିଶା ରିପୋର୍ଟର୍): ଜବାହରଲାଲ ନେହରୁ ଇନଡୋର୍ ଷ୍ଟାଡିୟମରେ ଚାଲିଥିବା ୨୧ତମ ରାଜ୍ୟଗୋଷ୍ଠୀ ଟେବୁଲ୍ ଟେନିସ୍ ଚାମ୍ପିଅନଶିପର ପୁରୁଷ ଡବଲ୍ସରେ ଭାରତର ଆନ୍ଥୋନୀ ଅମଲରାଜ ଓ ବିକାଶ ଠକ୍କର ସ୍ୱର୍ଣ୍ଣ ପଦକ ହାସଲ କରିଛନ୍ତି।

ଏହି ଯୋଡ଼ି ଫାଇନାଲରେ ନିଜ ଦେଶର ଅଗ୍ରଣୀ ଖେଳାଳି ଅଚନ୍ତା ଶରଥ କମଲ୍ ଓ ଜ୍ଞାନଶେଖରନ୍ ସାଥିଆନଙ୍କୁ ସିଧାସଳଖ ୩-୧ (୮-୧୧, ୧୧-୬, ୧୩-୧୧, ୧୨-୧୦)ରେ ପରାସ୍ତ କରି ଏହି ବଡ଼ ସଫଳତା ଅର୍ଜନ କରିଛନ୍ତି।

ଏହା ପୂର୍ବରୁ ଖେଳାଯାଇଥିବା ସେମିଫାଇନାଲରେ ଆନ୍ଥୋନୀ ଓ ବିକାଶଙ୍କ ଯୋଡ଼ି ୩-୧ (୧୧-୯, ୮-୧୧, ୧୧-୬, ୧୧-୫)ରେ ଇଂଲଣ୍ଡ ଯୋଡ଼ି ସାମୁଏଲ୍ ୱାଲକର୍ ଓ ଟମାସ ଜାର୍ଭିସଙ୍କୁ ଏବଂ ଶରଥ କମଲ୍ ଏବଂ ସାଥିଆନଙ୍କ ଯୋଡ଼ି ୩-୦ (୧୨-୧୦, ୧୧-୪, ୧୪-୧୨)ରେ ସିଙ୍ଗାପୁରର ପାଙ୍ଗ ୟୁ ଏନ୍ କୋଏନ୍ ଓ ଚୁଆ ଶାଓ ହାନ୍ ଜୋଶଙ୍କୁ ହରାଇ ଫାଇନାଲରେ ସ୍ଥାନ ହାସଲ କରିଥିଲେ ।