ମାଉଣ୍ଟ ମାଙ୍ଗାନୁଇ: ନ୍ୟୁଜିଲ୍ୟାଣ୍ଡ ବିପକ୍ଷ ୫ ଟିକିଆ ଦିନିକିଆ ସିରିଜ୍କୁ ଭ୍ରମଣକାରୀ ଟିମ୍ ଇଣ୍ଡିଆ ୩-୦ରେ ଆଗୁଆ କବଜା କରିନେଇଛି। ସିରିଜ୍ ଜିତିବା ପୂର୍ବରୁ ନ୍ୟୁଜିଲ୍ୟାଣ୍ଡ ବିପକ୍ଷ ୪ର୍ଥ ଓ ୫ମ ଦିନିକିଆରେ ବିରାଟ୍ କୋହଲି ଖେଳିବେ ନାହିଁ ବୋଲି ବିସିସିଆଇ କହିଥିଲା।
ତେଣୁ ତୃତୀୟ ଦିନିକିଆ ପରେ ବିରାଟ୍ ଛୁଟି କଟାଇବାକୁ ନ୍ୟୁଜିଲ୍ୟାଣ୍ଡ ଛାଡ଼ିଛନ୍ତି। ତାଙ୍କ ସହ ତାଙ୍କର ଅଭିନେତ୍ରୀ ପତ୍ନୀ ଅନୁଷ୍କା ଶର୍ମା ମଧ୍ୟ ନ୍ୟୁଜିଲ୍ୟାଣ୍ଡ ଛାଡ଼ିଛନ୍ତି।
ତେବେ ବିରୁଷ୍କା ଛୁଟି କାଟିବାକୁ କୁଆଡ଼େ ଯାଇଛନ୍ତି? ସେକଥା କେହି କହିପାରୁ ନାହାନ୍ତି। ସମ୍ଭବତଃ ସେମାନେ ଭାରତ ଫେରିବେ। ଭାରତରେ ହିଁ ଉଭୟ ପରସ୍ପର ସହ ସମୟ କାଟିବେ। କିନ୍ତୁ ନ୍ୟୁଜିଲ୍ୟାଣ୍ଡ ଛାଡ଼ିବା ପୂର୍ବରୁ ବିରୁଷ୍କା ଏୟାରପୋର୍ଟରୁ ଏକ ଫଟୋ ସୋଶାଲ୍ ମିଡିଆରେ ଛାଡ଼ିଛନ୍ତି।
ବିରାଟ୍ ଏହି ଫଟୋକୁ ଟ୍ୱିଟରରେ ଛାଡ଼ିବା ସହ “ ଆୱେ ୱି ଗୋ’ ବୋଲି ଲେଖିଛନ୍ତି। ଏହି ଫଟୋଟି ସୋଶାଲ୍ ମିଡିଆରେ ଭାଇରାଲ୍ ହେବାରେ ଲାଗିଛି। ଉଭୟ ଏହି ଫଟୋରେ ବେଶ ଖୁସି ରହିଥିବା ଦେଖିବାକୁ ମିଳିଛି।
ଅନ୍ୟପକ୍ଷରେ ବିରାଟ୍ଙ୍କ ଅନୁପସ୍ଥିତିରେ ରୋହିତ ଶର୍ମା ଟିମ୍ ଇଣ୍ଡିଆର ଅବଶିଷ୍ଟ ଦୁଇଟି ଦିନିକିଆ ଓ ଟି-୨୦ ସିରିଜ୍ର ନେତୃତ୍ୱ ନେବେ।