ରାଞ୍ଚି: ଦକ୍ଷିଣ ଆଫ୍ରିକା ବିପକ୍ଷ ରାଞ୍ଚିରେ ଖେଳାଯାଉଥିବା ସିରିଜର ତୃତୀୟ ତଥା ଅନ୍ତିମ ଟେଷ୍ଟ ମ୍ୟାଚରେ ଭାରତ ବିଜୟ ନିକଟତର ପହଞ୍ଚିଛି। ଭାରତର ୪୯୭/୯ ରନ୍ ଜବାବରେ ଦକ୍ଷିଣ ଆଫ୍ରିକା ପ୍ରଥମ ଇନିଂସରେ ୧୬୨ ରନରେ ଅଲଆଉଟ୍ ହୋଇଛି। ଫଳରେ ଭାରତୀୟ ଟିମକୁ ପ୍ରଥମ ଇନିଂସରେ ୩୩୫ ରନର ବଡ଼ ଅଗ୍ରଣୀ ମିଳିଛି।
ଏହା ପରେ କ୍ୟାପଟେନ୍ କୋହଲି ଭ୍ରମଣକାରୀ ଦଳକୁ ଫଲୋଅନ୍ ଦେବାକୁ ନିଷ୍ପତ୍ତି ନେଇଛନ୍ତି। ତେବେ ଅଷ୍ଟମଥର ପାଇଁ କୋହଲି ପ୍ରତିପକ୍ଷ ଦଳକୁ ଫଲୋଅନ୍ ଦେଇଛନ୍ତି। ଏଥିସହ କୋହଲି ବିପକ୍ଷ ଦଳକୁ ସବୁଠାରୁ ଅଧିକଥର ଫଲୋଅନ୍ ଦେବାରେ ଭାରତୀୟ କ୍ୟାପଟେନ୍ ହୋଇଛନ୍ତି। ଏହି ମାମଲାରେ ସେ ପୂର୍ବତନ କ୍ୟାପଟେନ୍ ମହମ୍ମଦ ଆଝାରୁଦ୍ଦିନଙ୍କୁ ପଛରେ ପକାଇଛନ୍ତି, ଯିଏ ବିପକ୍ଷ ଦଳକୁ ୭ଥର ଫଲୋଅନ୍ ଦେଇଥିଲେ।
କ୍ୟାପଟେନ୍ ଭାବେ କୋହଲିଙ୍କର ଏହା ୫୧ତମ ଟେଷ୍ଟ ମ୍ୟାଚ୍। ଆଝାର ୪୭ ମ୍ୟାଚରେ ଭାରତର ନେତୃତ୍ୱ ନେଇଛନ୍ତି। ମହେନ୍ଦ୍ର ସିଂହ ଧୋନି ୬୦ ଟେଷ୍ଟରେ ପାଞ୍ଚଥର ଓ ସୌରଭ ଗାଙ୍ଗୁଲି ୪୯ ମ୍ୟାଚରେ ୪ଥର ପ୍ରତିପକ୍ଷ ଦଳକୁ ଫଲୋଅନ୍ ଦେଇଛନ୍ତି।