ମୁମ୍ବାଇ: ଭାରତ ଓ ୱେଷ୍ଟଇଣ୍ଡିଜ୍ ମଧ୍ୟ ତିନିମ୍ୟାଚ୍ ବିଶିଷ୍ଟ ଟି-୨୦ ସିରିଜର ତୃତୀୟ ତଥା ଅନ୍ତିମ ମ୍ୟାଚ୍ ଏଠାରେ ଖେଳାଯାଉଛି। ଉକ୍ତ ମ୍ୟାଚରେ ୱେଷ୍ଟଇଣ୍ଡିଜ୍ କ୍ୟାପଟେନ୍ କାଇରନ୍ ପୋଲାର୍ଡ କ୍ରମାଗତ ଦ୍ୱିତୀୟଥର ଲାଗି ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଛନ୍ତି। ଫଳରେ ଭାରତ ବ୍ୟାଟିଂ କରିବ। ଆଜି ମ୍ୟାଚ୍ ପାଇଁ ୱେଷ୍ଟଇଣ୍ଡିଜ୍ ଦଳରେ କୌଣସି ପରିବର୍ତ୍ତନ କରାଯାଇ ନାହିଁ।
ତେବେ ଭାରତ କ୍ୟାପଟେନ୍ ବିରାଟ୍ କୋହଲି ଚୂଡ଼ାନ୍ତ ଏକାଦଶରେ ଦୁଇଟି ପରିବର୍ତ୍ତନ କରିଛନ୍ତି। ଅଲରାଉଣ୍ଡର ରବୀନ୍ଦ୍ର ଜାଡେଜା ଓ ସ୍ପିନର କୁଲଦୀପ ଯାଦବ ବାଦ୍ ପଡ଼ିଥିବା ବେଳେ ସେମାନଙ୍କ ସ୍ଥାନରେ ମହମ୍ମଦ ଶାମି ଓ କୁଲଦୀପ ଯାଦବଙ୍କୁ ସୁଯୋଗ ମିଳିଛି। ତେବେ ଯୁବ ବ୍ୟାଟ୍ସମ୍ୟାନ୍ ସଞ୍ଜୁ ସାମସନଙ୍କୁ ପୁଣିଥରେ ନିରାଶ ହେବାକୁ ପଡ଼ିଛି। କୋହଲି ଋଷଭ ପନ୍ତଙ୍କ ଉପରେ ପୁନର୍ବାର ଭରସା ଦେଖାଇଛନ୍ତି।
ସୂଚନାଯୋଗ୍ୟ, ଟି-୨୦ ସିରିଜର ପ୍ରଥମ ମ୍ୟାଚରେ ଭାରତ ୬ ୱିକେଟରେ ବିଜୟୀ ହୋଇଥିବା ବେଳେ ଦ୍ୱିତୀୟ ମ୍ୟାଚରେ ୱେଷ୍ଟଇଣ୍ଡିଜ୍ ୮ ୱିକେଟରେ ବିଜୟୀ ହୋଇ ସିରିଜକୁ ୧-୧ରେ ବରାବର କରିଛି। ଆଜି ମ୍ୟାଚରେ ଉଭୟ ଦଳ ପାଇଁ ସିରିଜ୍ ଜିତିବାର ସୁଯୋଗ ରହିଛି।
ଭାରତ: ରୋହିତ୍ ଶର୍ମା, ଲୋକେଶ ରାହୁଲ୍, ବିରାଟ୍ କୋହଲି, ଶ୍ରେୟସ୍ ଆୟର୍, ଋଷଭ ପନ୍ତ (ୱିକେଟକିପର), ଶିବମ ଦୁବେ, ୱାଶିଂଟନ୍ ସୁନ୍ଦର, ଦୀପକ ଚହର୍, ଭୁବନେଶ୍ୱର କୁମାର, ମହମ୍ମଦ ଶାମି, କୁଲଦୀପ ଯାଦବ।
ୱେଷ୍ଟଇଣ୍ଡିଜ୍: ଲେଣ୍ଡଲ ସିମନ୍ସ, ଏଭିନ୍ ଲୁଇସ୍, ବ୍ରାଣ୍ଡନ୍ କିଙ୍ଗ୍, ଶିମରନ୍ ହେଟମେୟର୍, ନିକୋଲାସ୍ ପୁରନ୍ (ୱିକେଟକିପର), କାଇରନ୍ ପୋଲାର୍ଡ (କ୍ୟାପଟେନ୍), ଜେସନ୍ ହୋଲ୍ଡର୍, ଖାରୀ ପିଏର୍, କେସରିକ୍ ୱିଲିୟମ୍ସ, ଶେଲଡନ୍ କଟ୍ଟରେଲ୍, ହେଡେନ୍ ୱାଲ୍ସ ଜୁନିୟର୍।