ନବୀନଙ୍କ ଘରେ ଖାଇଲେ ଅମିତ: ମେନୁରେ ଭାତ, ଡାଲି, ଶାଗ, ସନ୍ତୁଳା, ଭଜା ଓ ପାଏସ୍

ଗଞ୍ଜାମ: ଅମିତ୍‌ ଶାହା ଆସିବେ। ସାଙ୍ଗରେ ବସି ଖାଇଲେ। ଏଥିପାଇଁ କେତେ କ’ଣ ପ୍ରସ୍ତୁତି। କୌଣସି ଖାନ୍‌ଦାନି ନୁହେଁ ଚାଳଛପର ଘରେ ବସିବେ। ଆଉ ପରିବାରରେ ଖୁସି କହିଲେ ନ ସରେ। ଦଳିତଙ୍କ ଘରେ ଅମିତ ଶାହାଙ୍କ ପାଦ ପଡ଼ୁଥିବାରୁ ସମଗ୍ର ଅଞ୍ଚଳ ଚଳଚଞ୍ଚଳ ହୋଇପଡ଼ିଛି। ୪ ଦିନିଆ  ଓଡ଼ିଶା ଗସ୍ତରେ ଆସିଥିବା ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ଆଜି ବିଜେଡିର ଗଡ଼ ଗଞ୍ଜାମର କୁକୁଡ଼ାଖଣ୍ଡିରେ ପହଞ୍ଚିଛନ୍ତି। ଏଠାରେ ସେ ‘ମୋ ବୁଥ ସବୁଠୁ ମଜବୁତ ଅଭିଯାନ’ କାର୍ଯ୍ୟକ୍ରମରେ ଯୋଗ ଦେବା ପରେ ହୁଗଳାପଟା ଗାଁରେ ପହଞ୍ଚିବେ।

ଏହି ଅବସରରେ ସେ ୫ଟି ପରିବାର ସହ  ଜନସଂପର୍କ ସ୍ଥାପନ କରିବେ। ଆଉ ହୁଗଳାପଟା ଗାଁର ନବୀନ ସ୍ୱାଇଁଙ୍କ ଘରେ ଅମିତ ଶାହାଙ୍କ ପାଇଁ ଭୋଜନ ବ୍ୟବସ୍ଥା କରାଯାଇଛି। ନବୀନ ସ୍ୱାଇଁଙ୍କ କହିବା ଅନୁଯାୟୀ ଅମିତ ଶାହାଙ୍କ ପାଇଁ ଭାତ, ଡାଲି, ଶାଗ, ସନ୍ତୁଳା, ଭଜା ଏବଂ ପାଏସ  ହୋଇଛି। ଜଣେ ଗରିବ ଘରକୁ ଅମିତି ଶାହା ଆସୁଥିବାରୁ ସେ ଅତି ଗର୍ବ ଅନୁଭବ କରୁଛନ୍ତି ବୋଲି ନବୀନ କହିଛନ୍ତି। ଏଥିପାଇଁ ତାଙ୍କ ପୁରା ପରିବାର ଉତ୍ସାହିତ। ଏଥିସହ ସେ କେମିତି ଚାଳ ଘରେ ଦୟନୀୟ ଭାବେ ଚଳୁଛନ୍ତି ତାହା ସେ ନିଜ ଆଖିରେ ଦେଖିବେ ବୋଲି  କହିଛନ୍ତି।