ବାରିପଦା: ମୟୂରଭଞ୍ଜ ଜିଲ୍ଲା କପ୍ତିପଦା ବ୍ଲକ ମାଙ୍କଡ଼ପଡ଼ା ଚେମଚଟା ଗାଁରେ ବିସ୍ଫୋରଣ ଘଟି ଜଣେ ମହିଳା ଓ ଦୁଇ ଶିଶୁ ଗୁରୁତର ଆହତ ହୋଇଛନ୍ତି। ସେମାନଙ୍କୁ ଉଦଳା ମେଡ଼ିକାଲରେ ଭର୍ତ୍ତି କରାଯାଇଛି। ଖବର ପାଇ କପ୍ତିପଦା ପୋଲିସ୍ ଗାଁରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି। ବିସ୍ଫୋରଣରେ ମହିଳାଙ୍କ ଗୋଡ଼ ଓ ହାତ ପୋଡ଼ି ଯାଇଛି।
ଚେମଚଟା ଗାଁର ଜଣେ ଲୋଧା ସମ୍ପ୍ରଦାୟର ମହିଳା ନିକଟସ୍ଥ ଜଙ୍ଗଲକୁ ଆଜି କାଠ ସଂଗ୍ରହ କରିବାକୁ ଯାଇଥିବା ବେଳେ ଏକ ସାମଗ୍ରୀ ପାଇ ଘରକୁ ନେଇ ଆସିଥିଲେ। ଏହା ବିସ୍ଫୋରକ ସାମଗ୍ରୀ ବୋଲି ସେ ଜାଣି ନ ଥିଲେ। ସାମଗ୍ରୀଟିକୁ ଘରକୁ ଆଣିବା ପରେ ତାଙ୍କର ଦୁଇ ପିଲା ତାକୁ ଖେଳଣା ବୋଲି ଭାବି ଖେଳୁଥିବା ବେଳେ ବିସ୍ଫୋରଣ ଘଟିଥିଲା। ପଡୋଶୀ ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ।