ଚାରି ହୋମ୍‌ଗାର୍ଡଙ୍କୁ ଆଣ୍ଠେଇ ଦେଲେ ରିଜର୍ଭ ଇନ୍ସପେକ୍ଟର

ବାରିପଦା: ଉପଯୁକ୍ତ ଡ୍ରେସ୍ କୋଡ୍‌ରେ ନ ଥିବାରୁ ହୋମ୍‌ଗାର୍ଡଙ୍କୁ ପନିସ୍‌ମେଣ୍ଟ୍। ପୁଣି ଏମିତି ସେମିତି ପନିସ୍‌ମେଣ୍ଟ ନୁହେଁ। ଦରମା କଟିନି କି ସସ୍‌ପେଣ୍ଡ ହୋଇନାହାନ୍ତି। କିନ୍ତୁ ମିଳିଥିବା ଦଣ୍ଡ ତା’ଠୁ ବଳି। ଏହି ଭୁଲ୍ ପାଇଁ ରିଜର୍ଭ ଇନ୍ସପେକ୍ଟର ସେମାନଙ୍କୁ ଆଣ୍ଠେଇ ଦେଇଥିଲେ। ଘଟଣାଟି ଘଟିଛି ମୟୂରଭଞ୍ଜ ଜିଲ୍ଲା ବାରିପଦାରେ। ଆଣ୍ଠେଇ ଥିବା ହୋମ୍‌ଗାର୍ଡଙ୍କ ମଧ୍ୟରେ ଜଣେ ମହିଳା ମଧ୍ୟ ଥିଲେ।

ମିଳିଥିବା ସୂଚନା ଏହି ହୋମ୍‌ଗାର୍ଡମାନେ ରଥଯାତ୍ରା ଡ୍ୟୁଟିରେ ଯାଇଥିଲେ। ଚେକିଂ ବେଳେ ଏମାନେ ଠିକ୍‌ରେ ୟୁନିଫର୍ମ ପିନ୍ଧି ନ ଥିବା ଜଣାପଡ଼ିଥିଲା। ଏହା ପରେ ରିଜର୍ଭ ଇନ୍ସପେକ୍ଟର ସେମାନଙ୍କୁ ହୋମଗାର୍ଡ କମାଣ୍ଡାଣ୍ଟଙ୍କ କାର୍ଯ୍ୟାଳୟରେ ୨ ମିନିଟ୍ ଆଣ୍ଠେଇ ଦେଇଥିଲେ। ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଅନୁଯାୟୀ ଏଭଳି ଦଣ୍ଡ ଦିଆଯାଏ ବୋଲି ରିଜର୍ଭ ଇନ୍ସପେକ୍ଟର କହିଛନ୍ତି।

ଏନେଇ ହୋମଗାର୍ଡ ଡିଜି ବିନୟ ବେହେରା ମୟୂରଭଞ୍ଜ ଏସ୍‌ପି ଓ ହୋମଗାର୍ଡ କମାଣ୍ଡାଣ୍ଟଙ୍କୁ ରିପୋର୍ଟ ତଲବ କରିଛନ୍ତି। ରିପୋର୍ଟ ମିଳିବା ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ହୋମଗାର୍ଡ ଡିଜି।