ଧର୍ମେନ୍ଦ୍ର କହିଛନ୍ତି,“ଏ ଘଟଣାରେ ମୁଖ୍ୟମନ୍ତ୍ରୀ ଚୁପ୍ କାହିଁକି ରହିଛନ୍ତି? ତାଙ୍କ ହାତରେ ଉଭୟ ଗୃହ ଓ ଅଗ୍ନିଶମ ବିଭାଗ ଅଛି। ଏ ଘଟଣା ପାଇଁ ତାଙ୍କୁ ଉତ୍ତରଦାୟିତ୍ୱ ନେବାକୁ ପଡ଼ିବ।”
ତେବେ ଧର୍ମେନ୍ଦ୍ରଙ୍କ ଏଭଳି ଦାବିକୁ ସମାଲୋଚନା କରିଛି ବିଜେଡି। ଦଳୀୟ ମୁଖପାତ୍ର ସୂର୍ଯ୍ୟ ନାରାୟଣ ପାତ୍ର କହିଛନ୍ତି,“ଧର୍ମେନ୍ଦ୍ର ପ୍ରଧାନ ସବୁ କଥାରେ ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି କରନ୍ତି। ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି ନ କରି ସେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀଙ୍କ ଇସ୍ତଫା ଦାବି କଲେ ଭଲ ହୁଅନ୍ତା। କାରଣ ସମ୍ ହସ୍ପିଟାଲ୍ ଭଳି ଡାକ୍ତରଖାନାଗୁଡ଼ିକ ଏମ୍ସିଆଇ (ମେଡିକାଲ୍ କାଉନ୍ସିଲ୍ ଅଫ୍ ଇଣ୍ଡିଆ) ଅଧୀନରେ ରହିଛି। ଆଉ ଏମ୍ସିଆଇ ରହିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀଙ୍କ ଅଧୀନରେ।”
ସୂଚନାଯୋଗ୍ୟ, ଏ ଘଟଣା ପାଇଁ ଗତକାଲି ସ୍ୱାସ୍ଥ୍ୟ ମନ୍ତ୍ରୀ ଅତନୁ ସବ୍ୟସାଚୀ ନାୟକ ନିଜ ପଦରୁ ଇସ୍ତଫା ଦେଇଥିଲେ। ନୈତିକତା ଦୃଷ୍ଟିରୁ ସେ ଇସ୍ତଫା ଦେଇଛନ୍ତି ବୋଲି କହିଥିଲେ। ସେହିପରି ସମ୍ ହସ୍ପିଟାଲ୍ ମାଲିକଙ୍କ ସମେତ ୫ ଜଣଙ୍କୁ ପୋଲିସ୍ ଗିରଫ କରିଛି।