ଟ୍ରାଇବାଲ୍ ସ୍ପେଶାଲ କାଉନସିଲ୍: ବାସ୍ତବରେ ଆଦିବାସୀଙ୍କ ପାଇଁ କାନ୍ଦ, ନା ଭୋଟ୍‌ ବ୍ୟାଙ୍କ ଯୋଜନା?

ଭୁବନେଶ୍ୱର: ଆଦିବାସୀ ଭୋଟ୍ ବ୍ୟାଙ୍କ କବ୍‌ଜା ପାଇଁ ବିଜେଡି ପ୍ରୟାସ ଆରମ୍ଭ କରିଛି। ଆଦିବାସୀଙ୍କ ଉନ୍ନତି ପାଇଁ ଅନେକ ପ୍ରକଳ୍ପ କାର୍ଯ୍ୟ କରୁଥିବା ସତ୍ତ୍ୱେ ରାଜ୍ୟ ସରକାର ଗଠନ କରିବେ ଟ୍ରାଇବାଲ୍ ସ୍ପେଶାଲ କାଉନସିଲ୍। ୯ଟି ଜିଲ୍ଲାରେ ପରିଷଦ ଗଠନ ନେଇ କ୍ୟାବିନେଟ୍‌ରେ ମୋହର ପରେ କ’ଣ ହେବ ରୂପରେଖ ଏବଂ ଅଧ୍ୟକ୍ଷ ପଦରେ ଦଳୀୟ ନେତାଙ୍କୁ ଥଇଥାନ କରାଯିବାକୁ ନେଇ ଚର୍ଚ୍ଚା ହେଉଛି।

ପଞ୍ଚାୟତ ନିର୍ବାଚନରେ ଝଟକା ପରେ ଆଦିବାସୀ ଭୋଟ୍ ବ୍ୟାଙ୍କ ଚିନ୍ତା ବିଜେଡିକୁ ଘାରିଛି। ସେଥିପାଇଁ ଆଦିବାସୀ ଅଧ୍ୟୁଷିତ ୯ଟି ଜିଲ୍ଲାରେ ରାଜ୍ୟ ସରକାର ଗଠନ କରିବାକୁ ଯାଉଛନ୍ତି ଟ୍ରାଇବାଲ୍ ସ୍ପେଶାଲ କାଉନସିଲ୍। କ୍ୟାବିନେଟ୍‌ରେ ଏନେଇ ନିଷ୍ପତ୍ତି ପରେ ପ୍ରସ୍ତୁତ ହେଉଛି ବିସ୍ତୃତ ପ୍ଲାନ୍। ଏହି ପରିଷଦରେ ୬୨ ପ୍ରକାର ଆଦିବାସୀଙ୍କ ପ୍ରତିନିଧିତ୍ୱ ରହିବେ। ସେମାନେ ହିଁ ନିଜ ସଂପ୍ରଦାୟର ବିକାଶ ଯୋଜନା ପ୍ରସ୍ତୁତ କରିବେ। ପ୍ରତିବର୍ଷ ୯ଟି ଜିଲ୍ଲାର ୧୧୨ଟି ବ୍ଲକକୁ ଦେଢ଼ କୋଟି ଲେଖାଏଁ ହିସାବରେ ସର୍ବମୋଟ ୧୭୫ କୋଟି ଟଙ୍କାର ବଜେଟ୍ ରଖାଯାଇଛି। ତେବେ ପ୍ରଶ୍ନଉଠୁଛି, ଏଭଳି ଏକ ବଡ ଯୋଜନା ଏବେ କାହିଁକି? ଆଦାବାସୀଙ୍କ ଅଭିବୃଦ୍ଧି ପାଇଁ ନା ତୃଣମୂଳସ୍ତରେ ଭୋଟ ବ୍ୟାଙ୍କ ମଜଭୁତ କରିବାକୁ ଜିଲ୍ଲା ଯୋଜନା କମିଟିରେ ଯେମିତି ବିଧାୟକଙ୍କୁ ଅଧ୍ୟକ୍ଷ ପଦ ମିଳିଛି, ଟ୍ରାଇବାଲ୍ କାଉସିଲ୍‌ରେ ସେହିପରି ଦଳୀୟ ନେତାଙ୍କୁ ଥଇଥାନ କରାଯିବା ନେଇ ଚର୍ଚ୍ଚା ହେଉଛି।

ଅନୁସୂଚିତ ଜାତି ଜନଜାତି ମନ୍ତ୍ରୀ ରମେଶ ମାଝୀ କହିଛନ୍ତି-“ଭୋଟ୍ ସହିତ ଏହାର କିଛି ସଂପର୍କ ନାହିଁ। ପରିଷଦରେ କିଏ ଅଧ୍ୟକ୍ଷ ରହିବେ ପରେ ଜଣାପଡ଼ିବ। ଏନେଇ ବିଜ୍ଞପ୍ତି ପ୍ରକାଶ ପାଇବ। ଆଦିବାସୀଙ୍କ ଜୀବନ ଓ ଜୀବିକା ବିକାଶ ପାଇଁ ଏହି ପରିଷଦ ଗଠନ କରାଯାଇଛି।”

ରାଜ୍ୟ ସରକାରଙ୍କ ଏପରି ଉଦ୍ୟମକୁ କଂଗ୍ରେସ ସ୍ୱାଗତ କରିଛନ୍ତି। ଆଦିବାସୀଙ୍କ ପାଇଁ ସରକାର କରିଥିବା ସ୍କିମ୍ ଠିକ୍ ଭାବେ କାର୍ଯ୍ୟକାରୀ ହେଉ ନାହିଁ, ଏହାସାଙ୍ଗକୁ କାଉନ୍‌ସିଲ ସେଭେଳି ନହେଉ ବୋଲି କହିଛନ୍ତି କଂଗ୍ରେସ ନେତା ପ୍ରଦୀପ ମାଝୀ।

ବିଜେପି ବିଧାୟକ ରବି ନାୟକ କହିଛନ୍ତି-“ଆଦିବାସୀଙ୍କ ଉନ୍ନତି ପାଇଁ ଟ୍ରାଇବାଲ୍ ସ୍ପେଶାଲ କାଉନସିଲ୍ ଗଠନ କରାଯାଇନି। ନିର୍ବାଚନକୁ ଲକ୍ଷ୍ୟ କରି ନିଜର କାର୍ଯ୍ୟକର୍ତ୍ତାଙ୍କୁ ଥଇଥାନ କରିବା ପାଇଁ ଏପରି ବ୍ୟବସ୍ଥା ଗ୍ରହଣ କରାଯାଇଛି।”