‘ଜଗା-କାଳିଆଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ଅଛି’

ଭୁବନେଶ୍ୱର:  ଦିଲ୍ଲୀ ଏମ୍ସର ଚିକିତ୍ସାଧୀନ ଜଗା-କାଳିଆଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ଅଛି। ସେମାନେ ସୁସ୍ଥ  ଅଛନ୍ତି। ମାସେ ପର୍ଯ୍ୟନ୍ତ ଚିକିତ୍ସାରେ ରହିବେ ବୋଲି ଆଜି ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା କହିଛନ୍ତି।

ସେ କହିଛନ୍ତି,“ଜଗା କାଳିଆଙ୍କ ଚିକିତ୍ସାରେ ଯାହା ଆବଶ୍ୟକ ହେବ ସବୁ ଯୋଗାଇ ଦିଆଯିବ।”

ପରସ୍ପରଠୁ ଅଲଗା ହେବା ପରେ ଦିଲ୍ଲୀ ଏମସ ଆଇସିୟୁରେ ଜଗା-କାଳିଆ ଅଛନ୍ତି। ଜନ୍ମପରଠୁ ପ୍ରଥମ ଥର ପାଇଁ ଦୁଇଟି ବେଡ୍‌ରେ ଅଲଗା ଅଲଗା ଶୋଇଛନ୍ତି ଜଗା ଓ କାଳିଆ।  ଏବେ ଉଭୟଙ୍କୁ ଭେଣ୍ଟିଲେଟରରେ ରଖାଯାଇଛି। ନିଶ୍ଚେତକ ମାତ୍ରା କମିବା ପରେ ସେମାନଙ୍କ  ଶରୀର ପରବର୍ତ୍ତୀ ଚିକିତ୍ସାକୁ କିପରି ଗ୍ରହଣ କରୁଛି ତାଉପରେ ଡାକ୍ତରୀ ଟିମ୍ ନଜର ରଖିଛନ୍ତି।  ଦୁହେଁ ପ୍ରାୟ ୨ଦିନ ପର୍ଯ୍ୟନ୍ତ ଅବଜର୍ଭେସନରେ ରହିବେ। ଦିଲ୍ଲୀ ନ୍ୟୁରୋ ସର୍ଜରୀ ବିଭାଗ  ମୁଖ୍ୟ ପ୍ରଫେସର ଡାକ୍ତର ଅଶୋକ ମହାପାତ୍ରଙ୍କ ନେତୃତ୍ୱରେ ପ୍ରାୟ ୪୦ଜଣ ଡାକ୍ତରଙ୍କୁ ନେଇ  ଗଠିତ ସ୍ୱତନ୍ତ୍ର ଟିମ୍ ବୁଧବାର ୧୮ ଘଣ୍ଟାର ମାରାଥନ ଅସ୍ତ୍ରୋପଚାର ପରେ ଜଗା-କାଳିଆଙ୍କୁ  ପୃଥକ୍ କରିଥିଲେ। ପ୍ରାଥମିକ ଭାବେ ଅସ୍ତ୍ରୋପଚାର ସଫଳତାର ସହ କରାଯାଇ ସେମାନଙ୍କୁ  ଅଲଗା କରାଯାଇଥିବାରୁ ନୂଆ ଆଶା ସଞ୍ଚାର ହୋଇଛି। ଜଗା-କାଳିଆଙ୍କ ଆଶୁ  ଆରୋଗ୍ୟ କାମନା କରି ରାଜ୍ୟ ବ୍ୟାପୀ ବିଭିନ୍ନ ସ୍ଥାନରେ ପୂଜାର୍ଚ୍ଚନା ଚାଲିଛି ।