ବିଧାୟକଙ୍କ ଦବଙ୍ଗଗିରି: ନିୟମ ଭାଙ୍ଗି ସଚିବାଳୟରେ ପଶିଲେ, ଅଟକାଇବାରୁ ସୁରକ୍ଷା କର୍ମୀଙ୍କୁ ଗାଳି ଦେଲେ!

<p>ଭୁବନେଶ୍ୱର: ବିଧାୟକଙ୍କ ଦବଙ୍ଗଗିରି। ସଚିବାଳୟର ସୁରକ୍ଷା ଭାଙ୍ଗି ଜୋର ଜବରଦସ୍ତ ଭିତରେ ପ୍ରବେଶ କରିଛନ୍ତି। ଏପରିକି ସୁରକ୍ଷା ଦାୟିତ୍ୱରେ ଥିବା ସୁରକ୍ଷା କର୍ମୀଙ୍କୁ ଦୁର୍ବ୍ୟବହାର ଓ ଆକ୍ରମଣ କରିବାକୁ ଉଦ୍ୟମ କରିଥିବା ଅଭିଯୋଗ ହୋଇଛି। ଏପରି ସଂଗୀନ ଅଭିଯୋଗ ଆସିଛି କୋଟପାଡ଼ ବିଧାୟକ ଚନ୍ଦ୍ରଶେଖର ମାଝିଙ୍କ ନାଁରେ। ଚନ୍ଦ୍ରଶେଖରଙ୍କୁ ସମର୍ଥନ କରି କେନ୍ଦ୍ରାପଡ଼ା ବିଧାୟକ କିଶୋର ତରାଇ ସୁରକ୍ଷା କର୍ମୀଙ୍କ ସହିତ ଯୁକ୍ତିତର୍କ କରିଥିଲେ। ଏପରିକି ସୁରକ୍ଷା କର୍ମୀଙ୍କୁ ଆକ୍ରମଣ ଉଦ୍ୟମ କରିଥିବା ଅଭିଯୋଗ ହୋଇଛି।</p> <p>ଘଟଣାଟି ଘଟିଥିଲା ଆଜି ସକାଳେ। ସଚିବାଳୟର ୧ ନମ୍ୱର ଗେଟ୍&zwnj; ଦେଇ ସକାଳ ୯ରୁ ସନ୍ଧ୍ୟା ୬ ମଧ୍ୟରେ କୌଣସି ଲୋକ ଚାଲିଚାଲି ଓ ବାଇକ୍&zwnj;ରେ ଯିବା ଆସିବା କରିପାରିବେ ନାହିଁ। କେବଳ ୪ ଚକିଆ ଗାଡ଼ି ଏହି ଗେଟ୍&zwnj; ଦେଇ ଯାଆ ଆସ କରିପାରିବ। ଏହି ନିୟମ ସମସ୍ତଙ୍କ ପାଇଁ ଲାଗୁ। ମାତ୍ର ଏହି ନିୟମକୁ ଉଲ୍ଲଂଘନ କରି ଚନ୍ଦ୍ରଶେଖର ତାଙ୍କ ସ୍କୁଟରରେ ଆଜି ଅପରାହ୍ନ ୧.୪୫ ମିନିଟ୍&zwnj;ରୁ ୨ଟା ମଧ୍ୟରେ ସଚିବାଳୟ ଭିତରେ ପ୍ରବେଶ କରିଥିଲେ। ଏହି ସମୟରେ ସୁରକ୍ଷା କର୍ମୀମାନେ ତାଙ୍କୁ ଅଟକାଇ ବାରଣ କରିଥିଲେ। ମାତ୍ର ଚନ୍ଦ୍ରଶେଖର ବଳପୂର୍ବକ ସଚିବାଳୟ ଭିତରେ ପ୍ରବେଶ କରିବା ସହିତ ସୁରକ୍ଷା କର୍ମୀଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ସେହି ସମୟରେ କେନ୍ଦ୍ରାପଡ଼ା ବିଜେଡି ବିଧାୟକ କିଶୋର ତରାଇ ସଚିବାଳୟ ଭିତରୁ ସେହି ଗେଟ୍&zwnj; ଦେଇ ବାହାରକୁ ଆସିବାକୁ ଉଦ୍ୟମ କରିଥିଲେ। ସୁରକ୍ଷା କର୍ମୀମାନେ ତାଙ୍କୁ ମଧ୍ୟ ଅଟକାଇଥିଲେ। ଏଥିରେ ଉତ୍&zwnj;କ୍ଷିପ୍ତ ହୋଇ ଚନ୍ଦ୍ରଶେଖର ଓ କିଶୋର ମିଳିତ ଭାବେ ସୁରକ୍ଷା କର୍ମୀଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ଏପରିକି ଏମାନେ ସୁରକ୍ଷା କର୍ମୀଙ୍କୁ ଆକ୍ରମଣ କରିବାକୁ ଉଦ୍ୟମ କରିଥିବା ଅଭିଯୋଗ ହୋଇଛି।</p> <p>ଏନେଇ ଚନ୍ଦ୍ରଶେଖର ମାଝି କହିଛନ୍ତି-&ldquo;୧ ନମ୍ବର ଗେଟ୍ ଦେଇ ନଯିବା ନିୟମ ସମ୍ପର୍କରେ ମୁଁ ଜାଣିନଥିଲି। ମୋତେ ଅଟକାଇବାରୁ ମୋ ସମ୍ମାନ ପ୍ରତି ଆଞ୍ଚ ଆସିଲା। ମୁଁ ଦୁର୍ବ୍ୟହାର କରିନାହିଁ। କଥା କଟାକଟି ହୋଇଥିଲା।&rdquo; ତେବେ କିଶୋର ତରେଇ କୌଣସି ମତ ଦେଇନାହାଁନ୍ତି।</p>