ଏଠି ପୂଜା ପାଆନ୍ତି ଗଣେଶଙ୍କ ‘ଖଣ୍ଡିତ ମାନବ ମସ୍ତକ’

ଭୁବନେଶ୍ୱର(ଓଡ଼ିଶା ରିପୋର୍ଟର): ହିନ୍ଦୁ ଧର୍ମରେ ଅଗ୍ରପୂଜ୍ୟ ଭଗବାନ ଗଜାନନ ଗଣେଶଙ୍କ କାହାଣୀ ତ ଆପଣ ନିଶ୍ଚିତ ଶୁଣିଥିବେ। ମାତା ପାର୍ବତୀଙ୍କ ଶରୀରର ଧୂଳିରୁ କିପରି ଭଗବାନ ଗଣେଶଙ୍କର ଜନ୍ମ ହେଲା ଓ ଏହାପରେ ମହାଦେବଙ୍କ ସହ ତାଙ୍କର କିପରି ଯୁଦ୍ଧ ହେଲା, ସେ ନେଇ  ପ୍ରାୟ ସମସ୍ତ କଥା ଆପଣମାନେ ଜାଣିଥିବେ। ହେଲେ ଏହି ପ୍ରସଙ୍ଗରେ ମନରେ ସ୍ୱତଃ ପ୍ରଶ୍ନଟିଏ ଆସିଥାଏ । ଯଦି ମହାଦେବଙ୍କ ତ୍ରିଶୂଳ ପ୍ରହାରରେ ଗଣେଶଙ୍କ ମାନବାକୃତି ମସ୍ତକ ଛିଣ୍ଡିଗଲା ଓ ପରେ ଏହି ସ୍ଥାନରେ ହାତୀର ମସ୍ତକ ଯୋଡ଼ି ଦିଆଗଲା, ତା’ହେଲେ ଉକ୍ତ ମାନବ ମସ୍ତକଟି ଗଲା କୁଆଡ଼େ ?

ଏ ନେଇ ସ୍କନ୍ଦ ପୁରାଣରେ ଏକ ବର୍ଣ୍ଣନା ରହିଥିବା କୁହାଯାଏ। ଉତ୍ତରାଖଣ୍ଡ ରାଜ୍ୟର ଏକ ପବିତ୍ର ଗୁମ୍ଫାରେ ଗଣେଶ ଭଗବାନଙ୍କ ଏହି ମାନବାକୃତି ମସ୍ତକଟି ଶିଳା ରୂପେ ପୂଜା ପାଉଛି ବୋଲି କେତେକ ଗବେଷକ ଦାବି କରନ୍ତି। ଏହି ରାଜ୍ୟର ପଥୌରିଗଡ଼ର ଗଙ୍ଗୋଲିହାଟଠାରୁ ୧୪ କିମି ଦୂରରେ ଥିବା ପାତାଳ ଭୁବନେଶ୍ୱର ଗୁମ୍ଫାରେ ଏହି ମସ୍ତକ ପୂଜା ପାଉଥିବା କୁହାଯାଉଛି। ଯାହାର ଦର୍ଶନ ମାତ୍ରେ ଭକ୍ତର ମନୋକାମନା ପୂର୍ଣ୍ଣ ହୁଏ ବୋଲି ଲୋକ ବିଶ୍ୱାସ କରନ୍ତି।