ଜଳେଶ୍ୱର: ମାଛ ଧରିବାକୁ ମଝି ଦରିଆକୁ ଯାଇଥିଲେ। ଗଲା ବେଳେ ଫେରିବାର କେତେ ସ୍ୱପ୍ନ ଦେଖିଥିଲେ। ମାତ୍ର ମଝି ଦରିଆରେ ଡଙ୍ଗା ଓଲଟି ପଡ଼ିଥିଲା। ଫଳରେ ଜଣେ ହଜିଗଲେ। ଅନ୍ୟ ୭ ଜଣ କୂଳକୁ ଫେରି ଆସିଛନ୍ତି। ଏଭଳି ଅଭାବନୀୟ ଘଟଣା ଭୋଗରାଇ ଥାନା ଅଞ୍ଚଳରେ ଘଟିଛି।
ଗତକାଲି ରାତିରେ ୮ ଜଣ ମତ୍ସ୍ୟଜୀବୀ ମାଛ ଧରିବାକୁ ଯାଇଥିଲେ। ଆଜି ଦିନ ୧୧ଟା ବେଳେ ହଠାତ୍ ଡଙ୍ଗାଟି ବୁଡ଼ି ଯାଇଥିଲା। ସେମାନଙ୍କ ମଧ୍ୟରୁ ୬ ଜଣ ଅନ୍ୟ ଏକ ଡଙ୍ଗାରେ ବିଚିତ୍ରପୁର କୂଳରେ ପହଞ୍ଚିଥିଲେ। ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ଶ୍ରଦ୍ଧାପୁର ଡାକ୍ତରଖାନାରେ ଭର୍ତ୍ତି କରିଥିଲେ। ସାମାନ୍ୟ ଚିକିତ୍ସା ପରେ ମତ୍ସ୍ୟଜୀବୀମାନେ ଘରକୁ ଫେରିଛନ୍ତି। ଡଙ୍ଗା ବୁଡ଼ିବାର ଦୀର୍ଘ ୬ ଘଣ୍ଟା ପରେ ଶିବଶଙ୍କର ବେହେରାଙ୍କୁ ସଂଜ୍ଞାହୀନ ଅବସ୍ଥାରେ ପଶ୍ଚିମବଙ୍ଗର ଦୀଘା ମୁହାଣରୁ ଉଦ୍ଧାର କରାଯାଇଥିଲା। ଏନେଇ ଦୀଘା ଥାନା ପୋଲିସ ତାଳସାରୀ ସାମୁଦ୍ରିକ ଥାନାକୁ ଖବର ଦେଇଥିଲେ। ଏବେ ମଧ୍ୟ ବିନୋଦ ମହାନ୍ତି ନାମକ ଜଣେ ମତ୍ସ୍ୟଜୀବୀ ନିଖୋଜ ଅଛନ୍ତି।