ପାରାଦୀପ ବିବାଦ: ସର୍ବଭାରତୀୟ ଷ୍ଟଭେଡର୍ସ ମହାସଂଘ ଓ ପାରାଦୀପ ଷ୍ଟଭେଡର୍ସ ଆସୋସିଏସନ ମଧ୍ୟରେ ଆଲୋଚନା ଆରମ୍ଭ

ପାରାଦୀପ: ମାଲ୍ ଲୋଡିଂ ଅନଲୋଡିଂକୁ ନେଇ ପାରାଦୀପ ବନ୍ଦରରେ ଦେଖା ଦେଇଥିବା ବିବାଦର ସମାଧାନ ପାଇଁ ସର୍ବଭାରତୀୟ ଷ୍ଟିଭେଡର୍ସର ମହାସଂଘ ଓ ପାରାଦୀପ ଷ୍ଟିଭେଡର୍ସ ଆସୋସିଏସନ୍ କର୍ମକର୍ତ୍ତାଙ୍କ ବୈଠକ ଆରମ୍ଭ ହୋଇଛି । ଏଥିପାଇଁ ସର୍ବଭାରତୀୟ ଷ୍ଟିଭେଡୋର୍ସ ମହାସଂଘର ସଭାପତି କ୍ରୀଷ୍ଣ କୁମାର, ସମ୍ପାଦକ ଯୋଗେଶ ମେହେଟା ଏବଂ ସଦସ୍ୟ ଆଶିଷ ମଚାଡୋ ଗତକାଲି ସନ୍ଧ୍ୟାରେ ପାରାଦୀପରେ ପହଞ୍ଚିଥିଲେ। ବନ୍ଦର ଅଧ୍ୟକ୍ଷ ଅନୁପସ୍ଥିତ ଥିବାରୁ ଏମାନେ ଉପାଧ୍ୟକ୍ଷ ଏମ୍ ଭାୟାପୁରୀଙ୍କ ସହ ଆଲୋଚନା କରିଛନ୍ତି।

ଆଜିର ବୈଠକରେ କ’ଣ ପାଇଁ ବିବାଦ ସୃଷ୍ଟି ହୋଇଛି, ଏଥିପାଇଁ ଦୋଷ କାହାର, ପାରାଦୀପ ଷ୍ଟିଭେଡୋର୍ସ ଆସୋସିଏସନର ନୀତି ନିୟମ କ’ଣ ରହିଛି ଓ ବନ୍ଦର ପ୍ରଶାସନର ଆଭିମୁଖ୍ୟ ଆଦି ବିଷୟରେ ପୁଙ୍ଖାନୁପୁଙ୍ଖ ଆଲୋଚନା କରାଯାଉଛି।

ସେପଟେ ଜଗତସିଂପୁର ଜିଲ୍ଲାପାଳ ମଧ୍ୟ ଏକ ବୈଠକ ଡାକିଛନ୍ତି। ଏହି ବୈଠକରେ ପ୍ରଶାସନିକ ସ୍ତରରେ ଯାହା ନିଷ୍ପତ୍ତି ନିଆଯିବ ତାକୁ ସମସ୍ତେ ମାନିବେ ବୋଲି ସଂଘ ପକ୍ଷରୁ କୁହାଯାଇଛି।