ପାରାଦୀପ: ତିନି ଦିନ ଧରି ଅଚଳାବସ୍ଥା ପରେ ବନ୍ଦରରେ ଲାଗିଥିବା ଜାହାଜରୁ ଲୋଡିଂ ଓ ଅନ୍ ଲୋଡିଂ କାମ ଆରମ୍ଭ ହୋଇଛି। ସିକ୍ୟୁ- ୱାନ୍ ବର୍ଥରେ ଏମଭି ହାମ୍ ଜାହାଜରୁ ଅନଲୋଡିଂ ଆରମ୍ଭ ହୋଇଥିବା ବେଳେ ସିୱେଜ୍ ସିପିଂ ଆଣ୍ଡ ଲଜିଷ୍ଟିକ୍ ଲିମିଟେଟ୍ ଅନଲୋଡିଂ କରୁଛି। ଏହାସହ କଡା ସୁରକ୍ଷା ବଳୟରେ ବନ୍ଦର ଭିତରକୁ ସି-ୱେଜ୍ ସଂସ୍ଥାର ୨୫ରୁ ଊର୍ଦ୍ଧ୍ୱ ଡମ୍ପର ପଶିଛି। ତେବେ ସି-ୱେଜ୍ ସଂସ୍ଥାକୁ ବିରୋଧ କରୁଥିବା ପାରାଦୀପ ଷ୍ଟିଭେଡର୍ସ ଆସୋସିଏସନ୍ ପକ୍ଷରୁ କାର୍ଯ୍ୟବନ୍ଦ ଆନ୍ଦୋଳନ ଜାରି ରହିଛି। ଅପରପକ୍ଷରେ ଯେଉଁ ସବୁ ଷ୍ଟିଭେଡର୍ସ ଓ ଆସୋସିଏସନ୍ କାର୍ଯ୍ୟବନ୍ଦ କରିଛନ୍ତି ସେମାନଙ୍କୁ ପୋର୍ଟ କର୍ତ୍ତୃପକ୍ଷ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି। ଆଇନଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ବନ୍ଦର ପରିସରରେ ପୋଲିସ ଓ ସିଆଇଏସଏଫ୍ ମୁତୟନ ହୋଇଛନ୍ତି।
ପାରାଦୀପ ବନ୍ଦର କର୍ତ୍ତୃପକ୍ଷ ଓ ଷ୍ଟିଭେଡର୍ସ ଆସୋସିଏସନ୍ ନିଜ ନିଜ ଜିଦରେ ଅଟଳ ରହିବାରୁ ବନ୍ଦରରେ ମାଲ୍ ଲୋଡ଼ିଂ ଅନଲୋଡିଂ ଠପ୍ ହୋଇଯାଇଥିଲା। ସମସ୍ୟାର ସମାଧାନ ପାଇଁ ଗତକାଲି ପାରାଦୀପ ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟରେ ବସିଥିବା ଦ୍ୱିପାକ୍ଷିକ ବୈଠକରେ ମଧ୍ୟ କୌଣସି ସମାଧାନ ବାହାରି ପାରି ନ ଥିଲା। ଫଳରେ ବନ୍ଦରରେ ସ୍ୱାଭାବିକ ଅବସ୍ଥା ଫେରାଇ ଆଣିବା ଲାଗି କର୍ତ୍ତୃପକ୍ଷ ଉଦ୍ୟମ ଆରମ୍ଭ କରିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
