ଶାଳୀନତା ଭୁଲି ଯାଉଛନ୍ତି ନେତା: ସଭାରେ ବି କହୁଛନ୍ତି କଦର୍ଯ୍ୟ ଭାଷା, ଶୁଣନ୍ତୁ କିଏ କ’ଣ କହୁଛନ୍ତି

ଭୁବନେଶ୍ୱର/ଯାଜପୁର (ଓଡ଼ିଶା ରିପୋର୍ଟର): ନେତାଙ୍କ ତୁଣ୍ଡ ବୋଲ ମାନୁନି। ରାଜନୈତିକ ଆକ୍ଷେପ-ପ୍ରତିଆକ୍ଷେପ ବେଳେ ବେଳେ ଶାଳୀନତାର ସବୁ ସୀମା ଡେଇଁ ଯାଉଛନ୍ତି। ବିଜେଡିର ଜନସଂପର୍କ ପଦଯାତ୍ରାରେ ଦଳର ତୁଣ୍ଡ କୁହାଯାଉଥିବା ବରିଷ୍ଠ ମନ୍ତ୍ରୀ ଦାମୋଦର ରାଉତ ଓ ପୂର୍ବତନ ମନ୍ତ୍ରୀ ଦେବାଶିଷ ନାୟକଙ୍କ ଏଭଳି କିଛି ଆକ୍ଷେପ ଭରା ମନ୍ତବ୍ୟ ଏବେ ବିବାଦ ଠିଆ କରିଛି। ଯାଜପୁରରେ ବିଜେଡି ଜନସଂପର୍କ ଯାତ୍ରାରେ ବିଜେପି ନେତ୍ରୀ ଲେଖାଶ୍ରୀ ସାମନ୍ତ ସିଂହାରଙ୍କ ପ୍ରତି ଆକ୍ଷେପ କରି ସ୍ୱାମୀ ଛା଼ଡି ଅଙ୍ଗନବାଡି କହିଥିଲେ ଦାମ ରାଉତ। ଏହା ପରେ ରଣହୁଙ୍କାର ଦେଇଛି ବିଜେପି।

କିଛି ଦିନ ତଳେ ଦଳୀୟ ପ୍ରେସ୍‌ମିଟ୍‌ରେ ଦାମଙ୍କୁ ଶ୍ରୀଖଣ୍ଡି ଓ ନବୀନଙ୍କୁ ଧୃତରାଷ୍ଟ୍ର ବୋଲି କହିଥିଲେ ଲେଖାଶ୍ରୀ। ପୂର୍ବର ଏହି ମନ୍ତବ୍ୟ କଥା ଉଠାଇ ଦାମ ଲେଖାଶ୍ରୀଙ୍କୁ ସାଧାରଣ ସଭାରେ ସ୍ୱାମୀ ଛା଼ଡି ଅଙ୍ଗନବାଡି ବୋଲି କହିଛନ୍ତି। ଯାହାକୁ ସହଜରେ ଗ୍ରହଣ କରିନି ବିଜେପି। ଏକ ସାମ୍ବାଦିକ ସମ୍ମିଳନୀରେ ମହିଳା ମୋର୍ଚ୍ଚା ଦାମଙ୍କୁ ପାଗଳ ବୋଲି କହିଛି। ୨୪ ଘଣ୍ଟା ଭିତରେ ଦାମବାବୁ କ୍ଷମା ନ ମାଗିଲେ ସାରା ରାଜ୍ୟରେ ବିକ୍ଷୋଭ କରିବାକୁ ଚେତାବନୀ ଦେଇଛନ୍ତି ବିଜେପି ମହିଳା ମୋର୍ଚ୍ଚା ସଭାନେତ୍ରୀ ପ୍ରଭାତୀ ପରିଡା।

କେବଳ ଦାମ ନୁହଁନ୍ତି ବିଞ୍ଝାରପୁର ଜନସଂପର୍କ ଯାତ୍ରାରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କୁ ଅତି କଡା ଭାଷାରେ ସମାଲୋଚନା କରିଛନ୍ତି ଦେବାଶିଷ ନାୟକ। ନବୀନ ସରକାରକୁ ଶାହ ଉପାଡି ଫୋଫାଡି ଦେବା ନେଇ ପୂର୍ବରୁ ଦେଇଥିବା ଆହ୍ୱାନର ଜବାବରେ ଦେବାଶିଷ କିଛି ଆପତ୍ତିଜନକ ଶଦ୍ଦ ପ୍ରୟୋଗ କରିଛନ୍ତି। ଯାହାକୁ ଲେଖିବା ସମ୍ଭବ ନୁହେଁ।

ବିଜେପି ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ କହିଛନ୍ତି-“ବିଜେପିର ନେତାଙ୍କ ଉପରେ ଦେବାଶିଷ ବାବୁ ଅତି ଖରାପ ଭାଷା ପ୍ରୟୋଗ କରିଛନ୍ତି। ଏଥିରୁ ଜଣାପଡ଼ୁଛି ବିଜେଡି ନେତାମାନେ ଶାଳୀନତା ହରାଇ ବସିଛନ୍ତି। ବୁଡ଼ି ଯାଉଥିବା ଲୋକର ଗୋଡ଼ ଯେମିତି ତଳତୁ ତଳକୁ ଯାଉଛି, ଆଜି ବିଜେଡିର ଅବସ୍ଥା ସେମିତି ହୋଇଯାଉଛି।”