ପୋସ୍କୋ ପ୍ରସଙ୍ଗରେ ୨୫ରେ ଦିଲ୍ଲୀରେ ବସିବ ବୈଠକ

ଭୁବନେଶ୍ୱର: ଓଡ଼ିଶାରେ ପୋସ୍କୋ ପ୍ରକଳ୍ପ ପ୍ରସଙ୍ଗ ନେଇ ଆସନ୍ତା ୨୫ ତାରିଖରେ ଦିଲ୍ଲୀରେ ବୈଠକ ବସିବ। ଏହି ସୂଚନା ଦେଇଛନ୍ତି ରାଜ୍ୟ ଖଣି ମନ୍ତ୍ରୀ ପ୍ରଫୁଲ୍ଲ ମଲ୍ଲିକ। ଏହି ବୈଠକରେ କେନ୍ଦ୍ର କ୍ୟାବିନେଟ ସଚିବ, କେନ୍ଦ୍ର ଖଣି ସଚିବ, ଓଡ଼ିଶାରୁ ମୁଖ୍ୟ ଶାସନ ସଚିବ, ରାଜ୍ୟ ଖଣି ସଚିବଙ୍କ ସମେତ ପୋସ୍କୋ ପ୍ରତିନିଧି ଉପସ୍ଥିତ ରହିବେ ବୋଲି ମନ୍ତ୍ରୀ ସୂଚନା ଦେଇଛନ୍ତି।

ଏହା ପୂର୍ବରୁ ଗୁରୁବାର ପୋସ୍କୋ ପ୍ରସଙ୍ଗରେ ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଏକ ଉଚ୍ଚ ସ୍ତରୀୟ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ହିଁ ନିଷ୍ପତ୍ତି ହୋଇଥିଲା ଯେ ଦେଶର ସର୍ବାଧିକ ବିଦେଶୀ ପୁଞ୍ଜିନିବେଶ ହେବାକୁ ଥିବା ପୋସ୍କୋ ପ୍ରକଳ୍ପ ପାଇଁ କେନ୍ଦ୍ର ସରକାରଙ୍କୁ ଅନୁରୋଧ କରାଯିବ। ଏହି ବୈଠକ ପରେ ଖଣି ମନ୍ତ୍ରୀ ପ୍ରଫୁଲ ମଲ୍ଲିକ କହିଥିଲେ ଯେ ପୋସ୍କୋ ସଂପର୍କରେ ଆଲୋଚନା କରିବା ପାଇଁ ମୁଖ୍ୟ ଶାସନ ସଚିବଙ୍କୁ ଦାୟିତ୍ୱ ଦିଆଯାଇଛି। ଆଲୋଚନା ପାଇଁ ଏକ ନିର୍ଦ୍ଦିଷ୍ଟ ତାରିଖ ଧାର୍ଯ୍ୟ କରିବାକୁ କେନ୍ଦ୍ରକୁ ଅନୁରୋଧ କରାଯିବ। ଆଲୋଚନାରେ କେନ୍ଦ୍ର, ରାଜ୍ୟ ଓ ପୋସ୍କୋର ପ୍ରତିନିଧିମାନେ ଉପସ୍ଥିତ ରହିବେ।

ସେ ଆହୁରି ମଧ୍ୟ କହିଥିଲେ ଯେ ପୋସ୍କୋ ଓଡ଼ିଶା ଛାଡ଼ି ବାହାରେ ଶିଳ୍ପ ପ୍ରତିଷ୍ଠା କରିବା ନେଇ ରାଜ୍ୟ ସରକାରଙ୍କ ପାଖରେ ସୂଚନା ନାହିଁ। ପୋସ୍କୋ ଓଡ଼ିଶାରେ ଶିଳ୍ପ ପ୍ରତିଷ୍ଠା କରିବା ନା ନାହିଁ, ଶିଳ୍ପ ପ୍ରତିଷ୍ଠା ପାଇଁ ସଂସ୍ଥା ରାଜ୍ୟ ସରକାରଙ୍କଠାରୁ କ’ଣ ସବୁ ସହଯୋଗ ଚାହୁଁଛି ସେ ନେଇ ପ୍ରଥମେ ଆଲୋଚନାକୁ ଆସୁ। ଆଇନର ପରିଧି ମଧ୍ୟରେ ଯାହା କିଛି କରାଯାଇପାରିବେ ରାଜ୍ୟ ସରକାର ତାହା ନିଶ୍ଚିତ କରିବେ।

କିଛି ଦିନ ତଳେ ପୋସ୍କୋ କର୍ତ୍ତୃପକ୍ଷଙ୍କ ସହ ଆଲୋଚନା ପାଇଁ ଦିଲ୍ଲୀରେ ଅର୍ଥମନ୍ତ୍ରୀ ଅରୁଣ ଜେଟଲୀଙ୍କୁ ଭେଟି ଅନୁରୋଧ କରିଥିଲେ ରାଜ୍ୟର ବିଜେଡି ସାଂସଦ।

୫୨ହଜାର କୋଟି ଟଙ୍କାର ଏହି ମେଗା ପ୍ରକଳ୍ପ ପାଇଁ ସମସ୍ୟା ହୋଇଛି ଖଣି। ଅନ୍ୟପକ୍ଷରେ ଏହା ଭିତରେ ପେସ୍କା ମହାରାଷ୍ଟ୍ରରେ ଏକ ପ୍ଲାଣ୍ଟ ପ୍ରତିଷ୍ଠା ପାଇଁ ଏମଓୟୁ ବି ସାଇନ୍ କରିସାରିଛି। ଏହା ପରେ ଆଲୋଚନା ହୋଇଥିଲା ଯେ ପୋସ୍କୋ ଓଡ଼ିଶା ଛାଡ଼ି ଚାଲି ଯାଉଛି। ତେବେ ରାଜ୍ୟ ସରକାର କହିଛନ୍ତି ଏନେଇ ତାଙ୍କ ପାଖରେ କୌଣସି ସୂଚନା ନାହିଁ।