ଭଙ୍ଗା ଜାଗାରେ ସଜାଡ଼ିଲେ, ତଥାପି…

ପୁରୀ: ମହାପ୍ରଭୁଙ୍କ ରଥଯାତ୍ରାକୁ ତିନି ଦିନ ରହିଛି। ତେବେ ନେତ୍ରଉତ୍ସବ ପୂର୍ବରୁ ଅଘଟଣ ଘଟିଛି। ଏକା ସାଙ୍ଗେ ଦୁଇ ଦୁଇଟି ରଥ ନିର୍ମାଣରେ ତ୍ରୁଟି ଦେଖାଦେଇଛି। ସୁଭଦ୍ରାଙ୍କ ଦେବଦଳନ ରଥର ଅଖ ଭାଙ୍ଗିଥିବା ବେଳେ ବଳଭଦ୍ରଙ୍କ ତାଳଧ୍ୱଜ ରଥରେ ଚାରିନାହାକା ଖଞ୍ଜାରେ ତ୍ରୁଟି ଦେଖାଦେଇଛି। ତେବେ ଏଠି ପ୍ରଶ୍ନ ଉଠୁଛି ଏତେ ସଂଖ୍ୟକ ମହାରଣା, ମାଳ ମାଳ ଭୋଇ ସେବାୟତ ଓ ରଥ ନିର୍ମାଣ କମିଟିର ଯାଞ୍ଚ ସତ୍ତ୍ୱେ କେମିତି ରଥ ନିର୍ମାଣରେ ଏପରି ତ୍ରୁଟି ହେଲା। ଏଥିପାଇଁ ଦାୟୀ କିଏ?

ଦେବଦଳନ ରଥର ବାମପଟ ପ୍ରଥମ ଚକରେ ଲାଗିଥିବା ଅଖ ଭାଙ୍ଗିବା ସହ ଚକ ବଙ୍କା ହୋଇଛି।  ବ୍ରେକ୍ ପାଖ ଚକର ଅଖ ଭାଙ୍ଗିଥିବା ନେଇ ଗତକାଲି ରାତିରେ ଜଣାପଡ଼ିବା ପରେ ଭଙ୍ଗା ଅଖକୁ ଲୁହା ଶିକୁଳିରେ ବନ୍ଧା ଯାଇଥିଲା। ଏହାକୁ ନେଇ ଜଗନ୍ନାଥ ପ୍ରେମୀଙ୍କ ମନରେ ଘୋର ଉଦ୍‌ବେଗ ପ୍ରକାଶ ପାଇବା ପରେ ଆଜି ଜିଲ୍ଲା ପ୍ରଶାସନ, ରଥନିର୍ମାଣ କମିଟି, ବିଶ୍ୱକର୍ମା ମହାରଣା ଓ ଆରଆଣ୍ଡବି ମୁଖ୍ୟଯନ୍ତ୍ରୀ ଓ ନିର୍ବାହୀ ଯନ୍ତ୍ରୀ ତନ୍ନ ତନ୍ନ କରି ଅଖକୁ ଯାଞ୍ଚ କରିଛନ୍ତି। ଧଉରା କାଠରେ ଗଣ୍ଠି ଯୋଗୁଁ ଅଖରେ ଫାଟ ସୃଷ୍ଟି ହେଲା ବୋଲି କୁହାଯାଉଛି।

ସେହିପରି ତାଳଧ୍ୱଜ ରଥର ଚାରି ନାହାକାରେ ତ୍ରୁଟି ଜଣାପଡ଼ିବା ପରେ କାଠ ଅଧିକ କଟିଥିବାରୁ କ୍ଲାମ୍ପ ଲଗାଯାଇଛି।

ନନ୍ଦିଘୋଷ ରଥର ମୁଖ୍ୟ ମହାରଣା ବିଜୟ ମହାପାତ୍ର କହିଛନ୍ତି-“କାଠ ଭିତରେ କଣ ତ୍ରୁଟି ରହିଛି କିଛି କହିହେବନାହିଁ। ଆଖିରେ ଯାହା ପଡେ ସୁଧରା ଯାଏ। ଯଦି ଦରକାର ପଡିଲେ ନୂଆ ଅଖ ତିଆରି କରାଯିବ।”

ଆଜି ସନ୍ଧ୍ୟାରେ ଦେବଦଳନ ରଥର ମରାମତି କାମ ଶେଷ ହୋଇଛି। ଭାଙ୍ଗି ଯାଇଥିବା ନୂଆ ଅଖ ଲାଗିଛି। ତେବେ ଦେବଦଳନ ରଥର ଅଖ ଭାଙ୍ଗିବା ଘଟଣାରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ବରିଷ୍ଠ ଦଇତାପତି ସେବାୟତ ରାମଚନ୍ଦ୍ର ଦାସ ମହାପାତ୍ର। ଅଖ ଲଗାଯିବା ପୂର୍ବରୁ କାହିଁକି ଭଲଭାବେ ଯାଞ୍ଚ କରାଗଲା ନାହିଁ ବୋଲି ସେ ପ୍ରଶ୍ନ କରିଛନ୍ତି।