୨୦୦୮ରେ ରାଜ୍ୟ ସରକାର ଜାରି କରିଥିବା ଅର୍ଡରରେ ପରିବହନ କ୍ଷେତ୍ରରେ ପେପର ଡକ୍ୟୁମେଣ୍ଟକୁ ଇଚ୍ଛାଧୀନ ବୋଲି କୁହାଯାଇଛି। ହେଲେ ରାଜ୍ୟର ପ୍ରାୟ ସବୁ ଆରଟିଓରେ ଏହାର ଖୁଲମଖୁଲ୍ଲା ଉଲ୍ଲଂଘନ କରାଯାଉଛି। ପ୍ରତି ଆରଟିଓରେ ସ୍ମାର୍ଟ କାର୍ଡ ପ୍ରଦାନ ପାଇଁ ସ୍ମାର୍ଟ ଚିପ୍ କମ୍ପାନୀକୁ ଦାୟିତ୍ୱ ଦିଆଯାଇଛି। କମ୍ପାନୀ ପ୍ରତି ପେପର ଡକ୍ୟୁମେଣ୍ଟ ପିଛା ୨୦ ଟଙ୍କ। ନେଉଛି। ପ୍ରତିବର୍ଷ ପ୍ରାୟ ୫ ଲକ୍ଷ ଆବେଦନକାରୀ ଏହି ହରିଲୁଟର ଶିକାର ହେଉଛନ୍ତି। ଓଡ଼ିଶାର ୩୫ଟି ଆରଟିଓ ଅଫିସ ଓ ୩ଟି ବ୍ରାଞ୍ଚ ଅଫିସରେ ୨୦୧୪-୧୫ ବର୍ଷରେ ୩ଲକ୍ଷ ୭୪ହଜାର ୯୪୬ଟି ଡିଏଲ୍ ପ୍ରଦାନ କରାଯାଇଛି। ଏହାଛଡା ଲର୍ନରସ୍ ଲାଇସେନ୍ସ, ଗାଡ଼ି ରେଜିଷ୍ଟ୍ରେସନ, ପରମିଟ, ଫିଟନେସ୍ ଓ ଏହାର ରିନ୍ୟୁଆଲରେ ବି ପେପର ଡକ୍ୟୁମେଣ୍ଟ ଦିଆଯାଉଛି। ଆଉ ବେଆଇନ ଭାବେ ଆଦାୟ ହେଉଛି କୋଟି କୋଟି ଟଙ୍କ।। ଯାହା ପରିବହନ ବିଭାଗକୁ ନ ଯାଇ ସ୍ମାର୍ଟ ଚିପ୍ କଂପାନୀ ପାଖକୁ ଚାଲିଯାଉଛି।
ବସ୍ ମାଲିକ ସଂଘ ସାଧାରଣ ସମ୍ପାଦକ ବରଦା ଆଚାର୍ଯ୍ୟ କହିଛନ୍ତି, ସ୍ମାର୍ଟ କାର୍ଡ ପାଇବା ପରେ ପୁଣି ଏକ କାଗଜ ଦେବାର କିଛି ମାନେ ନାହିଁ। ଜନସାଧାରଣ ଦେଇଥିବା ଟଙ୍କା ଠିକ ବାଟରେ ଯାଉଛି କି ନାହିଁ ତାହାର ତଦନ୍ତ ଲାଗି ସଂଘ ଦାବି କରୁଛି। ସ୍ମାର୍ଟ ଚିପ୍ କମ୍ପାନୀ ମ୍ୟାନେଜର ସାରଦା ନନ୍ଦଙ୍କୁ ପଚରାଯିବାରେ ସେ କହିଛନ୍ତି, ୩୮ଟି ଆରଟିଓରୁ ସରକାରୀ ଭାବେ ଏକ କୋଟି ଟଙ୍କା ଟ୍ୟାକ୍ସ ପାଉଛୁ। କମ୍ପାନୀକୁ କିଛି ଅଧିକ ମିଳୁନାହିଁ। ଏ ନେଇ ସରକାରଙ୍କ ସହ କଥାବାର୍ତ୍ତା ଚାଲିଛି।
୭ବର୍ଷ ହେଲା ଏଭଳି ହରିଲୁଟ୍ ଚାଲିଥିଲେ ମଧ୍ୟ ପରିବହନ ବିଭାଗ ପାଖରେ କୌଣସି ଖବର ନାହିଁ। ପ୍ରକୃତରେ ଏହାର ଖବର ପରିବହନ ବିଭାଗ ପାଖରେ ନାହିଁ ନା କିଛି ଅଧିକାରୀଙ୍କ ସଲାସୁତରାରେ ଏପରି ହରିଲୁଟ ଚାଲିଛି ତାହା ଆଗାମୀ ଦିନରେ ତଦନ୍ତରୁ ଜଣାପଡିବ। ପରିବହନ ମନ୍ତ୍ରୀ ରମେଶ ମାଝି କହିଛନ୍ତି, ପରିବହନ କମିଶନରଙ୍କୁ ଘଟଣାର ତଦନ୍ତ କରି ରିପୋର୍ଟ ଦେବାକୁ ନିର୍ଦ୍ଦେଶ ଦିଆଯାଇଛି। ରିପୋର୍ଟ ଆସିବା ପରେ ସରକାର ପଦକ୍ଷେପ ନେବେ।