ଏସ୍‌ସିବିରେ ଅଚଳାବସ୍ଥା: ୩ ଦଫା ଦାବିରେ ଡାକ୍ତରଙ୍କ ଆନ୍ଦୋଳନ

କଟକ(ଓଡ଼ିଶା ରିପୋର୍ଟର): କଟକ ଏସ୍‌ସିବିରେ ରୋଗୀ ମୃତ୍ୟୁରୁ ଡାକ୍ତରୀ ଛାତ୍ରଙ୍କୁ ମାଡ଼ ଘଟଣାକୁ ନେଇ ମେଡିକାଲରେ ଅଚଳାବସ୍ଥା ଜାରି ରହିଛି। ହାଉସ ସର୍ଜନଙ୍କ କାର୍ଯ୍ୟବନ୍ଦ ଆନ୍ଦୋଳନ ଯୋଗୁଁ ରୋଗୀ ସେବାରେ ବାଧା ଉପୁଜିଛି। ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ, ଡାକ୍ତରଙ୍କ ସୁରକ୍ଷା ଓ ସିସିଟିଭି ବ୍ୟବସ୍ଥା ସହ ଷ୍ଟାଇପେଣ୍ଡ ବୃଦ୍ଧି ଭଳି ୩ ଦଫା ଦାବି ପୂରଣ ନହେବା ଯାଏଁ ଆନ୍ଦୋଳନ ଚାଲୁ ରଖିବାକୁ ହାଉସ ସର୍ଜନ ଓ ଜୁନିଅର ଡାକ୍ତର ସଂଘ ନିଷ୍ପତ୍ତି ନେଇଛି। ତା’ସହ ଅଧୀକ୍ଷକଙ୍କ ବଦଳି ଦାବି ମଧ୍ୟ କରିଛି ସଂଘ।

ଗତକାଲି ରାତିରେ ଓଲଡ୍ ମେଡିସିନ୍ ୱାର୍ଡରେ ୨ ଜଣ ଡାକ୍ତର ଥିଲେ। ଏହି ସମୟରେ ହଠାତ ଜଣେ ରୋଗୀ ଗୁରୁତର ହୋଇପଡିଥିଲେ। ଡ୍ୟୁଟିରେ ଥିବା ଡାକ୍ତର ସମ୍ପୃକ୍ତ ରୋଗୀଙ୍କୁ ଚିକିତ୍ସା କରୁଥିଲେ। ତେବେ ହଠାତ୍‌ ରୋଗୀଙ୍କ ସମ୍ପର୍କୀୟ ସଂପୃକ୍ତ ଡାକ୍ତରଙ୍କୁ ଆକ୍ରମଣ କରିଥିଲେ। ଘଟଣାକୁ ନେଇ ହାଉସ ସର୍ଜନମାନେ ଏସ୍‌ସିବିର କାଜୁଆଲଟି ବନ୍ଦ କରିଦେଇଥିଲେ। ଏପଟେ ଡାକ୍ତର ମଧ୍ୟ ରୋଗୀଙ୍କ ସମ୍ପର୍କୀୟଙ୍କୁ ମାଡମାରିଥିବା ନେଇ ଅଭିଯୋଗ ହୋଇଛି। ଘଟଣାରେ ପୋଲିସ ଜଣଙ୍କୁ ଅଟକ ରଖିଥିଲା ବେଳେ ଆଉ ୨ଜଣଙ୍କୁ ନୋଟିସ ଦେଇ ଛାଡିଦେଇଛି।

ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା କହିଛନ୍ତି-“ମାଡ଼ ମାରିଥିବା ବ୍ୟକ୍ତି ବିରୋଧରେ ଆଇନ୍‌ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ନିର୍ଦ୍ଦେଶ ଦିଆଯାଇଛି। ଏହା ସତ୍ତ୍ୱେ ଡାକ୍ତରମାନେ ଆନ୍ଦୋଳନ କରିବା ଠିକ୍‌ ହେଉନି। ଏହାଦ୍ୱାରା ଅନ୍ୟ ରୋଗୀମାନେ ଅସୁବିଧାରେ ପଡୁଛନ୍ତି। ସେମାନେ କାର୍ଯ୍ୟରେ ଯୋଗଦେବାକୁ ଅନୁରୋଧ କରୁଛି।ରୋଗୀ ସେବାରେ ବ୍ୟାହତ ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।”

ମେଡିକାଲ ସୁପରିଟେଣ୍ଡେଣ୍ଟ ଡାକ୍ତର ଶ୍ୟାମା କାନୁନଗୋ କହିଛନ୍ତି-“ଡାକ୍ତରଙ୍କ ଆନ୍ଦୋଳନ ଯୋଗୁଁ ରୋଗୀ ସେବା ପ୍ରଭାବିତ ହେବାକୁ ଦିଆଯିବ ନାହିଁ। ଆବଶ୍ୟକ ପଡ଼ିଲେ ବାହାରୁ ଡାକ୍ତର ଅଣାଯିବ। ବର୍ତ୍ତମାନ ସ୍ଥିତି ଯେତିକି ସୁରକ୍ଷା ବ୍ୟବସ୍ଥା ଅଛି, ତାହା ପର୍ଯ୍ୟପ୍ତ ନୁହେଁ। ଆଗକୁ ସୁରକ୍ଷା ବ୍ୟବସ୍ଥା ବଢ଼ାଇବା ପାଇଁ ବ୍ୟବସ୍ଥା କରାଯାଉଛି।”

ସିନିୟର୍ ରେସିଡେଣ୍ଟ ଡାକ୍ତର ଜ୍ୟୋତିର୍ମୟ ନାୟକ କହିଛନ୍ତି-“ସାନ ଭାଇଟା ମାଡ ଖାଇଲା ଖରାପ ଲାଗୁଛି। ମୁଁ ଭାବୁଛି ଏହି ଘଟଣା ସମାଧାନ ହୋଇଯିବ।”