ଅଭିନବ ଆନ୍ଦୋଳନ: ଉଠ ବସ କଲେ, ଜୋତା ମାରିଲେ

ଭୁବନେଶ୍ୱର: ଆଇଟିଆର କଲେଜରେ ଫେକ୍ ପ୍ଲେସମେଣ୍ଟ୍‌ ଅଭିଯୋଗ ମାମଲାରେ ସିବିଆଇ ତଦନ୍ତ ଦାବି ନେଇ ଆଜି ଭୁବନେଶ୍ୱର ମାଷ୍ଟରକ୍ୟାଣ୍ଟିନ ଛକରେ ଛାତ୍ର କଂଗ୍ରେସର କର୍ମୀମାନେ ବିକ୍ଷୋଭ କରିଛନ୍ତି। ଏହି ଘଟଣାର ସଂସ୍ଥାର ମାଲିକ ମନୋଜ ନାୟକଙ୍କ ଗିରଫ ଦାବି କରିଛି ସଂଗଠନ। ଏହାସହ ଛାତ୍ର କଂଗ୍ରେସର କର୍ମୀମାନେ ମନୋଜ ନାୟକଙ୍କ କୁଶପୁତ୍ତଳିକା ଦାହ କରିଛନ୍ତି।

ଏହି ଘଟଣାରେ ମନୋଜ ନାୟକ ନିଜ ମାଲିକାନାରେ ଥିବା ଗଣମାଧ୍ୟମର ମଧ୍ୟ ଦୁରୁପଯୋଗ କରିଥିବା ଛାତ୍ର କଂଗ୍ରେସ ପକ୍ଷରୁ ଅଭିଯୋଗ କରାଯାଇଛି।

ଛାତ୍ର କଂଗ୍ରେସ ସଭାପତି ଇତିଶ ପ୍ରଧାନ କହିଛନ୍ତି,“ମନୋଜ ଜ ନାୟକ ନିଜର ସୁରକ୍ଷା ପାଇଁ ଗଣମାଧ୍ୟମକୁ ବ୍ୟବହାର କରୁଛନ୍ତି। ଗଣମାଧ୍ୟମରେ ମିଥ୍ୟା ଖବର ଛାପୁଛନ୍ତି। ଆମେ ଏହାକୁ ତୀବ୍ର ନିନ୍ଦା କରୁଛୁ। ଆଇଟିଆର ଫେକ୍ ପ୍ଲେସମେଣ୍ଟ୍‌ ମାମଲାରେ ଛାତ୍ର କଂଗ୍ରେସ  ସିବିଆଇ ତଦନ୍ତ ଦାବି କରୁଛି।”

ସେ ଆହୁରି କହିଛନ୍ତି,“ଇତିଶ ପ୍ରଧାନ ଘର କିଣିଛି, ତା’ ପାଖରେ ବହୁତ ଟଙ୍କାର ମାଲିକ ବୋଲି ମନୋଜ ନାୟକ ନିଜ ଗଣମାଧ୍ୟମରେ ଗୁଜବ ସୃଷ୍ଟି କରିଥିଲେ। ମୋତେ ଏଥିପାଇଁ ତଦନ୍ତ ପରିସରଭୁକ୍ତ କରାଯାଉ। ମନୋଜ ନାୟକ ସରକାରୀ ବିଶ୍ୱବିଦ୍ୟାଳୟରେ ଚାକିରି କରିଥିଲେ ମଧ୍ୟ ଆଜି କେମିତି ଶହଶହ କୋଟି ଟଙ୍କାର ମାଲିକ ହେଲେ ଆମେ ପ୍ରଶ୍ନ କରୁଛୁ?  ସେହି କଳାଧନ କାହାର? କେଉଁ ନେତାଙ୍କ ଟଙ୍କା ବିନିଯୋଗ ହୋଇଛି ତା’ର ପ୍ରମାଣ ଦିଅନ୍ତୁ। ଯେପର୍ଯ୍ୟନ୍ତ ମନୋଜ ନାୟକଙ୍କୁ ଗିରଫ ନ କରାଯାଇଛି, ସେ ପର୍ଯ୍ୟନ୍ତ ଆନ୍ଦୋଳନ ଜାରି ରହିବ।”