ହାଇଦ୍ରାବାଦ: ଜନ୍ନି ବେୟାରଷ୍ଟୋ ଓ ଡେଭିଡ ୱାର୍ଣ୍ଣରଙ୍କ ଆକର୍ଷଣୀୟ ଶତକକୁ ଆଧାର କରି ସନରାଇଜର୍ସ ହାଇଦ୍ରାବାଦ ଚଳିତ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ)ର ରବିବାର ଖେଳାଯାଇଥିବା ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପକ୍ଷ ମ୍ୟାଚରେ ନିର୍ଦ୍ଧାରିତ ୨୦ ଓଭରରେ ୨ ୱିକେଟ ହରାଇ ୨୩୧ ରନର ବିଶାଳ ସ୍କୋର କରିଛି।
ଫଳରେ ବିରାଟ କୋହଲିଙ୍କ ନେତୃତ୍ୱାଧୀନ ଆରସିବିକୁ ୨୦ ଓଭରରେ ୨୩୨ ରନ କରିବାକୁ ପଡ଼ିବ। ହାଇଦ୍ରାବାଦ ପକ୍ଷରୁ ବେୟାରଷ୍ଟୋ ନିଜର ପ୍ରଥମ ଶତକ ମାରିଥିବା ୱାର୍ଣ୍ଣର ନିଜର ଚତୁର୍ଥ ଶତକ ମାରିଥିଲେ। ଦୁହେଁ ପ୍ରଥମ ୱିକେଟ ପାଇଁ ୧୮୫ ରନର ରେକର୍ଡ ପାଟନରଶିପ୍ କରିଛନ୍ତି। ବେୟାରଷ୍ଟୋ ୧୧୪ (୫୬ ବଲ, ୧୨ ଚୌକା, ୬ ଛକା) ଓ ୱାର୍ଣ୍ଣର ୧୦୦* (୫୫ ବଲ, ୫ ଚୌକା, ୫ ଛକା) ରନ୍ କରିଛନ୍ତି।
ରାଜୀବ ଗାନ୍ଧି ଇଣ୍ଟରନ୍ୟାସନାଲ ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚରେ ଆରସିବି ଅଧିନାୟକ ବିରାଟ କୋହଲି ଟସ୍ ଜିତି ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲେ। ଆମନ୍ତ୍ରଣ ପାଇ ହାଇଦ୍ରାବାଦ ପକ୍ଷରୁ ବେୟାରଷ୍ଟୋ ଓ ୱାର୍ଣ୍ଣର ଇନିଂସ ଓପନ କରିବାକୁ ଆସିଥିଲେ। ଦୁହେଁ ଆରମ୍ଭରୁ ଆରସିବି ବୋଲରଙ୍କୁ ସେଟ୍ ହେବାକୁ ଦେଇନଥିଲେ।
ବିଶେଷ କରି ବେୟାରଷ୍ଟୋ ଅଧିକ ଆକ୍ରମଣାତ୍ମକ ବ୍ୟାଟିଂ କରିଥିଲେ। ଫଳସ୍ୱରୂପ ସେ ୨୮ ବଲରେ ନିଜର ଅର୍ଦ୍ଧଶତକ ପୂରଣ କରିଥିଲେ। ୱାର୍ଣ୍ଣର ମଧ୍ୟ ୩୨ ବଲରେ ଅର୍ଦ୍ଧଶତକ ମାରିଥିଲେ। ଦୁହେଁ ୯.୪ ଓଭରରେ ଦଳର ସ୍କୋରକୁ ୧୦୦ ଅତିକ୍ରମ କରାଇଥିଲେ। ଏହା ପରେ ବେୟାରଷ୍ଟୋ ୫୨ ବଲରେ ନିଜର ପ୍ରଥମ ଆଇପିଏଲ ଶତକ ମାରିଥିଲେ।
ଦଳର ସ୍କୋର ୧୮୫ ଥିବା ବେଳେ ବେୟାରଷ୍ଟୋଙ୍କୁ ୟୁଜବେନ୍ଦ୍ର ଚହଲ ଆଉଟ କରିଥିଲେ। ତେବେ ୱାର୍ଣ୍ଣର ଶେଷ ପର୍ଯ୍ୟନ୍ତ ଅପରାଜିତ ଦଳକୁ ୨୩୨ ରନର ବଡ଼ ସ୍କୋରରେ ପହଞ୍ଚାଇଥିଲେ। ବିଜୟ ଶଙ୍କର ୯ ରନ୍ କରି ଆଉଟ ହୋଇଥିବା ବେଳେ ୟୁସୁଫ ପଠାନ୍ ୬ ରନ୍ କରି ଅପରାଜିତ ଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
